കെഇ ഇസ്മയില് എക്സ്ക്ലൂസീവ് ഇന്റര്വ്യൂ
സീറ്റ് ചര്ച്ചകള് തുടങ്ങിയിട്ടില്ല
ചാനലുകളിലും പത്രങ്ങളിലും നടക്കുന്ന ചര്ച്ചകള് അല്ലാതെ നിയമസഭാ തെരഞ്ഞെടുപ്പുമായി ബന്ധപ്പെട്ട ചര്ച്ചകളൊന്നും മുന്നണിയില് തുടങ്ങിയിട്ടില്ല. സമയമാകുമ്പോള് എല്ലാം പരിശോധിക്കും. വിജയസാധ്യതയും മറ്റ് ഘടകങ്ങളെല്ലാം പരിശോധിച്ചാകും സ്ഥാനാര്ത്ഥികളെ തീരുമാനിക്കുക. യുവാക്കള്, സ്ത്രീകള്, ന്യൂനപക്ഷങ്ങള് എന്നിവര്ക്കെല്ലാം അര്ഹമായ പരിഗണന ലഭിക്കും.
വല്യേട്ടന് ചെറിയേട്ടന് എന്ന രീതിയില്ല
കൂടുതല് പാര്ട്ടികള് ഇടതുമുന്നണിയിലേക്ക് കടന്നുവരുമ്പോള് സിപിഐ സീറ്റുകളില് വിട്ടുവീഴ്ച ചെയ്യേണ്ടി വരുമോ എന്ന ചോദ്യത്തിന് കെഇ ഇസ്മയിലിന്റെ മറുപടി ഇങ്ങനെ: 'ഞങ്ങളിവിടെ ഒരു മുന്നണിയായാണ് മത്സരിക്കുന്നത്. മുന്നണിക്ക് വ്യക്തമായ കാഴ്ചപ്പാടുകളും ധാരണകളുമുണ്ട്. മുന്നണിയില് പുതിയ ഒരു പാര്ട്ടി വന്നതുകൊണ്ട് പരസ്പരം കടിച്ചുകീറാനോ ബാര്ഗൈന് ചയ്യേണ്ട കാര്യമോ ഇല്ല. സീറ്റുകള് സംബന്ധിച്ച് ഓരോ പാര്ട്ടികള്ക്കും അവരുടെതായ കാഴ്ചപ്പാടുകളും ധാരണകളുമുണ്ട്. ഇടതുപക്ഷ മുന്നണിയില് വല്യേട്ടന് ചെറിയേട്ടന് എന്ന രീതിയില്ല. ജോസ് കെ മാണിയുടെ വരവ് ഇടതുമുന്നണിക്ക് തദ്ദേശ തെരഞ്ഞെടുപ്പില് ഗുണം ചെയ്തു. നിയമസഭാ തെരഞ്ഞെടുപ്പിലും അതാവര്ത്തിക്കും'.
ഭരണത്തുടര്ച്ച
ഇടതുമുന്നണിക്ക് ഭരണത്തുടര്ച്ചയുണ്ടാകുമെന്നും കെഇ ഇസ്മയില് ആത്മവിശ്വാസം പ്രകടിപ്പിച്ചു. ഈ നാടിനോ ജനങ്ങള്ക്ക് വേണ്ടിയോ ഒന്നും ചെയ്യാതെ എല്ലാ ദിവസവും ചാനലുകളില് വന്നിരുന്ന് വിവാദങ്ങള് ഉന്നയിച്ച് ജനങ്ങളെ തെറ്റിദ്ധരിപ്പിച്ച് കളയാം എന്ന മിഥ്യാധാരണയാണ് പ്രതിപക്ഷത്തിനുള്ളത്. എന്നാല് പ്രതിപക്ഷത്തിന്റെ കപടമുഖം ജനം തിരിച്ചറിഞ്ഞതുകൊണ്ടാണ് ഇടതുമുന്നണിക്ക് തദ്ദേശ തെരഞ്ഞെടുപ്പില് മിന്നുന്ന വിജയമുണ്ടായത്.
കേന്ദ്ര ഏജന്സികള് ഇരുട്ടില് തപ്പുന്നു
സ്വര്ണ്ണക്കടത്തും കേരള സര്ക്കാരും തമ്മില് പുലബന്ധം പോലുമില്ല. തെരഞ്ഞെടുപ്പ് കാലഘട്ടങ്ങളില് അനാവശ്യമായി ജനങ്ങളെ തെറ്റിദ്ധിരിപ്പിക്കാനുള്ള പാഴ്ശ്രമമാണ് സ്വര്ണ്ണക്കടത്ത് കേസിലൂടെ കേന്ദ്രസര്ക്കാര് നടത്തിയത്. കേന്ദ്ര ഏജന്സികള് ഇപ്പോഴും ഇരുട്ടില് തപ്പുകയാണ്. തെളിവുകള് ഉണ്ടെങ്കില് കൊണ്ടുവരട്ടെ. എല്ലാ കേന്ദ്ര ഏജന്സികളും വേറെ ഒരു പണിയുമില്ലാതെ കേരളത്തിലാണ്. ഇന്ത്യയില് ഇത്രയും സംസ്ഥാനങ്ങള് ഉണ്ടായിട്ടും കേന്ദ്ര ഏജന്സികള്ക്ക് കേരളത്തില് മാത്രം എന്താണിത്ര പണി. എല്ലാ കാര്യത്തിലും നമ്പര് വണ് സംസ്ഥാനമായ കേരളത്തെ കരുതുക്കൂട്ടി തകര്ക്കാനുള്ള ശ്രമമാണ് നടക്കുന്നത്. പ്രതിപക്ഷ പാര്ട്ടികളും കേന്ദ്ര ഏജന്സികളും ചേര്ന്ന് ഒരേ ജോലിയാണ് ഇപ്പോള് ചെയ്യുന്നത്.
ദൈവം തമ്പുരാന്റെ മകനായാലും നടപടി
അഴിമതിയുടെ പേരില് ആക്ഷേപങ്ങള് ഉന്നയിച്ച് ലക്ഷക്കണക്കിന് ആളുകള്ക്ക് ലഭിക്കേണ്ട ആനുകൂല്യങ്ങള് തടയുകയാണ് പ്രതിപക്ഷം ചെയ്യുന്നത്. ലൈഫ് മിഷനില് അഴിമതിയുണ്ടെങ്കില് അന്വേഷിക്കട്ടേ. അഴിമതിക്കാരെ കണ്ടെത്തി ശിക്ഷിക്കണം. ഈ സര്ക്കാര് വന്ന ശേഷം അഴിമതി കുറഞ്ഞു. ആക്ഷേപങ്ങള് ഉന്നയിച്ചതല്ലാതെ ഒരു അഴിമതിയും പ്രതിപക്ഷത്തിന് തെളിയിക്കാന് കഴിഞ്ഞിട്ടില്ല. അഴിമതി ചൂണ്ടിക്കാണിച്ചാല് ഏത് ദൈവം തമ്പുരാന്റെ മകനായാലും നടപടി എടുക്കും. അതാണ് കമ്മ്യൂണിസ്റ്റ് പാര്ട്ടി. അഴിമതി തുടച്ചുനീക്കണമെന്ന് ആഗ്രഹിക്കുന്നവരാണ് കമ്മ്യൂണിസ്റ്റ് പാര്ട്ടി.
മോദി പാട്ട കൊട്ടാന് പറഞ്ഞു, പിണറായി
പിണറായി സര്ക്കാരിന് ജനങ്ങള് നല്കിയ ഗുഡ് സര്ട്ടിഫിക്കറ്റാണ് തദ്ദേശ തെരഞ്ഞുപ്പ് വിജയം. കൊവിഡ് കാലഘട്ടില് മോദി പാട്ട കൊട്ടാന് പറഞ്ഞപ്പോള് പിണറായി സര്ക്കാര് നിരവധി സഹായങ്ങളാണ് നല്കിയത്. പിണറായി സര്ക്കാര് നടപ്പാക്കിയ ജനക്ഷേ പ്രവര്ത്തനങ്ങള് നിയമസഭാ തെരഞ്ഞെടുപ്പില് ഇടതുമുന്നണിക്ക് ഭരണത്തുടര്ച്ച നല്കുമെന്നും കെഇ ഇസ്മയില് പറഞ്ഞു.