പുതിയ പരീക്ഷണം
വെറും എഴുത്തല്ല. പുത്തന്‍ ആശയങ്ങളും ഗ്രാമീണ ഭംഗിയും ചുവരെഴുത്തിലും പരീക്ഷിക്കുകയാണ് ഷിബു. ട്രെയിനിന്റെ മാതൃക വരച്ച് മലയാളത്തിലും ഇംഗ്ലീഷിലും ഹിന്ദിയിലും തമിഴിലും സ്ഥാനാര്‍ഥിയുടെ പേരെഴുതിയ മതിലില്‍ ആരുടെയും കണ്ണ് പതിയും. നേമം എംഎല്‍എ ഒ രാജഗോപാലിന്‍റെ ഡ്രൈവര്‍ കൂടിയാണ് ഷിബു.
ഒ രാജഗോപാലും സ്ഥലത്തെത്തി
മുന്‍ റെയില്‍വേ മന്ത്രി കൂടിയായിരുന്ന ഒ രാജഗോപാലിനോടുള്ള ആരാധന പ്രകടിപ്പിക്കാന്‍ കൂടിയാണ് ഷിബു ട്രെയിന്‍ വരച്ചിട്ടത്. നാല്‍പതടി നീളമുള്ള ചുവരില്‍ കോറിയിട്ട ട്രെയിന്‍ എഞ്ചിനൊപ്പം പത്തിലേറെ ബോഗികളുമുണ്ട്. ഇത് നേരില്‍ കാണാന്‍ ഒ രാജഗോപാലും സ്ഥലത്തെത്തി. തെരഞ്ഞെടുപ്പില്‍ ഷിബുവിന് കെട്ടിവയക്കാനുള്ള പണവും നല്‍കിയാണ് രാജഗോപാല്‍ മടങ്ങിയത്.
മാറ്റത്തിന്‍റെ വെളിച്ചം വാര്‍ഡില്‍ എത്തും
വള്ളംകളിയും പൂക്കളമിടുന്ന മങ്കമാരും, കഥകളിയുമൊക്കെ ഷിബുവിന്‍റെ പ്രചാരണ ചുവരുകളില്‍ കാണാം. ഒരേ മുന്നണിയില്‍ സഹോദരന്‍ സുനില്‍കുമാറും മത്സര രംഗത്തുണ്ടെന്നതു മറ്റൊരു പ്രത്യേകത. സുനില്‍ എന്‍ഡിഎ സ്വതന്ത്രനായി മാറനല്ലൂര്‍ വാര്‍ഡില്‍ ജനവിധി തേടുന്നു. പക്ഷേ, സുനിലിന്‍റെ പ്രചാരണ ചുവരുകള്‍ കളര്‍ഫുള്‍ അല്ലെന്നു മാത്രം. വോട്ടര്‍മാരുടെ പരമ്പരാഗത പോളിങ് ശൈലി മാറ്റി മാറ്റത്തിന്‍റെ വെളിച്ചം വാര്‍ഡില്‍ എത്തിക്കുകയാണ് ലക്ഷ്യമെന്ന് ഷിബുവിന്‍റെ പറയുന്നു. ജയിച്ചാലും രാജഗോപാലിന്‍റെ ഡ്രൈവറായി തുടരാന്‍ തന്നെയാണ് തീരുമാനമെന്നും ഷിബു പറഞ്ഞു.