അണുവിമുക്തമാക്കുന്നില്ല
രോഗവ്യാപനത്തിന്റെ ആദ്യഘട്ടത്തില് കടകളുടെയും മറ്റ് സ്ഥാപനങ്ങളുടെയും മുന്നില് കൈകഴുകാനുള്ള സൗകര്യം ഒരുക്കിയിരുന്നെങ്കില് ഇപ്പോള് ഇവ അപ്രത്യക്ഷമായിരിക്കുകയാണ്. എടിഎമ്മുകളില് സാനിറ്റൈസര് പലയിടത്തും കാലിയാണ്. നഗരത്തിലെ ഭൂരിഭാഗം എടിഎമ്മുകളിലും സാനിറ്റൈസറിന്റെ കാലി കുപ്പികളാണുള്ളത്. സ്ഥാപിച്ചിരിക്കുന്നവ ആകട്ടെ പെട്ടെന്ന് ആളുകളുടെ ശ്രദ്ധയിലും പെടില്ല. അതുകൊണ്ട് പണമെടുത്ത് ആളുകള് ഉടന് മടങ്ങും. കൂടാതെ ഇവയെല്ലാം കൈകൊണ്ട് അമര്ത്തി ഉപയോഗിക്കുന്ന സാനിറ്റൈസറുകളുമാണ്. കാലുകൊണ്ട് അമര്ത്തി ഉപയോഗിക്കാന് കഴിയുന്നവ പലയിടത്തും സ്ഥാപിച്ചിട്ടില്ല. എടിഎം യന്ത്രങ്ങളെ അണുമുക്തമാക്കാനും നടപടിയില്ല. പ്രതിരോധനിര്ദേശങ്ങള് പല ബാങ്കുകളിലും എടിഎമ്മുകളിലും കൃത്യമായി നടപ്പാക്കുന്നില്ല.
പല സ്ഥാപനങ്ങള്ക്കും ജാഗ്രത കുറവ്
പെട്രോള് പമ്പുകളില് നിന്നും അണുനശീകരണ സംവിധാനം അപ്രത്യക്ഷമായി. റീഫില് ചെയ്യാതെ ഒഴിഞ്ഞുകിടക്കുന്ന സാനിറ്റൈസര്, ഹാന്ഡ്വാഷ് കുപ്പികളാണ് പലയിടത്തും. കടകളിലും സ്ഥാപനങ്ങളിലും കൈകഴുകല് സംവിധാനം നിലച്ച മട്ടാണ്. രോഗവ്യാപനം വര്ധിച്ച തലസ്ഥാനത്തു പ്രതിരോധ നടപടികള് പാലിക്കുന്നതില് പല സ്ഥാപനങ്ങള്ക്കും ജാഗ്രത കുറവു സംഭവിച്ചെന്നാണു പൊലീസ് സ്പെഷല് ബ്രാഞ്ചിന്റെ കണ്ടെത്തല്. ആളുകള് ദിനംപ്രതി സമ്പര്ക്കം പുലര്ത്തുന്ന മാര്ക്കറ്റുകള്, തൊഴില് ഇടങ്ങള്, വാഹനങ്ങള്, ആശുപത്രികള്, പൊതു സ്ഥലങ്ങള് തുടങ്ങി വിവിധ ഇടങ്ങളില് നിന്നു ആരില് നിന്നും ആര്ക്കും രോഗം പകരാം എന്ന അവസ്ഥയാണ്.
ആരില് നിന്നും രോഗം പകരാം
വ്യക്തികള് തമ്മില് മിനിമം രണ്ടു മീറ്റര് അകലം പാലിച്ചു സ്വയം സുരക്ഷിത വലയം തീര്ക്കാനാണ് സര്ക്കാര് നല്കുന്ന നിര്ദേശം. എന്നാല് വ്യാപാര സ്ഥാപനങ്ങളില് അകലം പാലിക്കാതെ തിക്കി തിരക്കുന്ന കാഴ്ചയാണ് നഗരത്തില്. പച്ചക്കറി, ഇറച്ചി, പലചരക്ക് കടകളിലാണ് നിയന്ത്രണ ലംഘനം കൂടുതല്. കയര് കെട്ടിയും കടയ്ക്കു മുന്പില് നില്ക്കേണ്ട സ്പോട്ടുകള് മാര്ക്കു ചെയ്തും ആദ്യഘട്ടത്തില് സ്വീകരിച്ച പ്രതിരോധ നടപടികളില് നിന്നും സ്ഥാപനങ്ങള് പിന്നാക്കം പോയി. ജീവന്റെ വിലയുള്ള ജാഗ്രത എന്ന മുദ്രാവാക്യം ഉയര്ത്തി ബ്രേക്ക് ദി ചെയിന് ക്യാംപയിന് ഇപ്പോള് മൂന്നാം ഘട്ടത്തിലാണ്. ആരില് നിന്നും രോഗം പകരാം എന്ന ജാഗ്രത നിര്ദേശമാണ് സര്ക്കാര് ഇതിലൂടെ നല്കുന്നത്.
ശ്രദ്ധിക്കാം ഇക്കാര്യങ്ങള്
1. മാസ്ക് ധരിക്കാതെ പുറത്തിറങ്ങരുത്. മാസ്ക്കില് ഇടയ്ക്കിടെ തൊടുന്നത് പൂര്ണമായും ഒഴിവാക്കണം.
2. ഉപയോഗിച്ച ശേഷം മാസ്ക് അലക്ഷ്യമായി വലിച്ചെറിയരുത്. കഴുകി ഉപയോഗിക്കാവുന്ന മാസ്ക് ആണെങ്കില് ഓരോ ഉപയോഗത്തിനു ശേഷവും അണുവിമുക്തമാക്കണം.
3. കുറഞ്ഞത് ഒരു മീറ്റര് എങ്കിലും സാമൂഹിക അകലം പാലിക്കണം.
4. കൈകള് കൃത്യമായ ഇടവേളകളില് സോപ്പ് അല്ലെങ്കില് സാനിറ്റൈസര് ഉപയോഗിച്ച് വൃത്തിയാക്കണം.
5. ലിഫ്റ്റ്, എടിഎം, കൈവരി തുടങ്ങി ആളുകള് കൂടുതല് തൊടാന് ഇടയുള്ള സ്ഥലങ്ങളില് നേരിട്ടുള്ള സ്പര്ശനം ഒഴിവാക്കണം.