തിരുവനന്തപുരം: കുളത്തൂര് പഞ്ചായത്ത് പ്രസിഡന്റ് ബെല്സിയുടെ ഭര്ത്താവ് ജയചന്ദ്രന് മാനസികാസ്വാസ്ഥ്യമുള്ള യുവാവിനെ മര്ദ്ദിക്കുന്ന ദൃശ്യങ്ങള് പുറത്ത്. അജി എന്ന യുവാവിനാണ് മര്ദ്ദനമേറ്റത്. ഇഷ്ടികച്ചൂളയിലെ തൊഴിലാളിയായ അജി, ചെയ്ത ജോലിയുടെ കൂലി ചോദിച്ചപ്പോഴാണ് ജയചന്ദ്രന് മര്ദ്ദിച്ചത്. അജിക്ക് ജയചന്ദ്രന് കൂലിയിനത്തില് പതിനായിരം രൂപയോളം നല്കാനുണ്ട്.
പല തവണയായി കാശ് ചോദിച്ചു പോയെങ്കിലും നല്കിയില്ല. തുടര്ന്ന് ഇന്നലെ വൈകിട്ട് വീണ്ടും ജയചന്ദ്രനെ സമീപിച്ച അജി കാശ് ആവശ്യപ്പെട്ടു. നല്കാതെ വന്നപ്പോള് ചീത്ത വിളിച്ചു. ഇതാണ് മര്ദ്ദനത്തിന് പ്രകോപനം. മര്ദ്ദനത്തില് അജിയുടെ കാലിന് പരിക്കേല്ക്കുകയും രക്തം വാര്ന്ന് ഒഴുകുകയും ചെയ്തു.
Also Read: ആശുപത്രികളില് രക്തം കിട്ടാനില്ല; രോഗികള് നെട്ടോട്ടത്തില്... ദുരിതം!
തുടര്ന്ന് ഇയാള് നെയ്യാറ്റിന്കര ജനറല് ആശുപത്രിയില് ചികിത്സ തേടി. മനോനില തെറ്റിയ ഒരാളെ പട്ടാപ്പകല് പരസ്യമായി മര്ദിച്ചിട്ടും പോലീസ് കേസെടുത്തില്ലെന്നും ആക്ഷേപമുണ്ട്. രാഷ്ട്രീയ സ്വാധീനം ഉപയോഗിച്ച് കേസ് ഒഴിവാക്കാന് ശ്രമം നടക്കുന്നതായും പരാതിയുണ്ട്.
അതേസമയം, കുളത്തൂര് പഞ്ചായത്ത് പ്രസിഡന്റ് ബെല്സി ഒരു കുറി കമ്പനിയിലെ ജീവനക്കാരിയായിരുന്നു. പലരില്നിന്നും ഇവര് കുറി പിരിച്ചിരുന്നു. എന്നാല് കാലാവധി തീര്ന്നതിനു ശേഷവും ഇവര് പൈസ തിരികെ നല്കിയില്ല. ഈ പണം തിരികേ ചോദിച്ചതിനാണ് അജിയെ
ക്രൂരമായി മര്ദ്ദിച്ചത് എന്നും ആരോപണമുണ്ട്.