ആശുപത്രികളില്‍ രക്തം കിട്ടാനില്ല; രോഗികള്‍ നെട്ടോട്ടത്തില്‍... ദുരിതം!

തിരുവനന്തപുരം: സംസ്ഥാനത്തെ ആശുപത്രികളില്‍ രക്തത്തിന് വന്‍ ക്ഷാമം. ബ്ലഡ് ബാങ്കിലടക്കം എല്ലാ ഗ്രൂപ്പിലുമുള്ള രക്തം കിട്ടാതായതോടെ രോഗികള്‍ നെട്ടോട്ടത്തിലാണ്. കൊവിഡ് നിയന്ത്രണം വന്നതോടെ ജനങ്ങള്‍ക്ക് ആശുപത്രികളില്‍ പോകാനുള്ള പേടിയും, യാത്രകള്‍ ഒഴിവാക്കുന്നതും സ്ഥാപനങ്ങളും കോളേജുകളും അവധിയായതും എല്ലാമാണ് രക്ത ക്ഷാമത്തിന് ഇടയാക്കിയത്.

Also Read: തിരുവനന്തപുരത്ത് ലോക്ക് ഡൗണ്‍ വീണ്ടും നീട്ടിയേക്കും; കടകൾക്ക് കൂടുതൽ ഇളവ് നൽകിയേക്കും

സംസ്ഥാനത്തെ സര്‍ക്കാര്‍ മെഡിക്കല്‍ കോളേജ് ആശുപത്രികളിലടക്കം രക്തത്തിൻ്റെ ലഭ്യതയില്‍ തടസം നേരിടുന്നുണ്ട്. ആര്‍സിസി പോലുള്ള ആശുപത്രിയില്‍ വരുന്ന 90% ക്യാന്‍സര്‍ രോഗികള്‍ക്കും രക്തം അത്യാവശ്യമാണ്. സിസേറിയന്‍, ശസ്ത്രക്രിയകള്‍, ആക്‌സിഡന്റുകള്‍ ഇവിടെയും ഇതേ പ്രശ്‌നമുണ്ട്. രക്തം കിട്ടാനായി ഇത്തരം രോഗികളുടെ കുടുംബാംഗങ്ങളും സുഹൃത്തുക്കളും ഇപ്പോള്‍ നെട്ടോട്ടത്തിലാണ്. രക്തം കിട്ടാത്ത അവസ്ഥയില്‍ പല ആശുപത്രിയിലെയും ശസ്ത്രക്രിയ അടക്കമുള്ള ചികിത്സകള്‍ മുടങ്ങുകയാണ്. പണ്ട് നെഗറ്റീവ് ഗ്രൂപ്പുകള്‍ക്ക് മാത്രമായിരുന്നു ഡിമാന്‍ഡെങ്കിലും ഇപ്പോള്‍ ഒരു ഗ്രൂപ്പും കിട്ടാനില്ലാത്ത സ്ഥിതിയാണ്.

Also Read: വാട്‌സ്ആപ് ഗ്രൂപ്പിലൂടെ പരിചയപ്പെട്ട് വീട്ടിലെത്തിച്ച് പെണ്‍കുട്ടികളെ പീഡിപ്പിച്ചു; 2 യുവാക്കള്‍ അറസ്റ്റില്‍

രക്തദാതാക്കള്‍ എത്താത്തതിനാല്‍ ബ്ലഡ് ബാങ്കുകളുടെ പ്രവര്‍ത്തനവും പ്രതിസന്ധിയിലാണ്. സന്നദ്ധ സംഘടനകളും സമൂഹമാധ്യമങ്ങളിലെ ഗ്രൂപ്പുകളില്‍ നിന്നുമാണ് പ്രധാനമായും രക്തം ശേഖരിച്ചിരുന്നത്. കൊറോണ ജാഗ്രത വന്നതോടെ പലരും രക്തം ദാനം ചെയ്യാന്‍ മടിക്കുകയാണെന്ന് സമൂഹ്യപ്രവര്‍ത്തകര്‍ പറയുന്നു.

Also Read: തലസ്ഥാന നഗരിയില്‍ ഭിക്ഷാടകര്‍ക്കും കൊവിഡ്; കനത്ത ആശങ്ക

കോളജ് വിദ്യാര്‍ഥികളാണ് രക്തദാനത്തില്‍ മുന്‍പില്‍ ഉണ്ടായിരുന്നത്. എന്നാല്‍ കോളേജുകള്‍ അവധിയായതും ടെക്‌നോപാര്‍ക്ക് ഉള്‍പ്പെടെയുള്ള ഇടങ്ങളില്‍ വര്‍ക്ക് അറ്റ് ഹോം രീതിയിലേക്ക് മാറിയതും പ്രതിസന്ധി രൂക്ഷമാക്കി. അതേസമയം വരും ദിവസങ്ങളില്‍ കൂടുതല്‍ ബോധവത്കരണം നടത്തി ബ്ലഡ് ബാങ്കിന്റെ പ്രതിസന്ധി പരിഹരിക്കാനാകുമെന്ന പ്രതീക്ഷയിലാണ് ആരോഗ്യവകുപ്പ്.