രാജ്യത്ത് ഇതുവരെ ഒരു സര്‍ക്കാറിനും നേരിടേണ്ടി വന്നിട്ടില്ലാത്ത അവസ്ഥ!
സിപിഎം പ്രതിരോധത്തില്‍
രാജി ആവശ്യം തളളി എല്‍ഡിഎഫ്‌
പിണറായി വിജയന് പാര്‍ട്ടിയിലും മന്ത്രിസഭയിലും ഇടതുമുന്നണിയിലും ഇപ്പോഴും വലിയ സ്വീകാര്യതയാണുള്ളത്. അതിന് ഒരു കോട്ടവും തട്ടിയിട്ടില്ല. അതുകൊണ്ടുതന്നെ മുഖ്യമന്ത്രിയുടെ രാജി ആവശ്യം പാര്‍ട്ടിയും എല്‍ഡിഎഫും തള്ളുന്നു. പക്ഷേ മുഖ്യമന്ത്രിയുടെ ഏറ്റവും വിശ്വസ്തനായിരുന്ന മുന്‍ പ്രിന്‍സിപ്പല്‍ സെക്രട്ടറിയാണ് കള്ളപ്പണം വെളുപ്പിക്കല്‍ നിരോധന നിയമപ്രകാരം അറസ്റ്റിലായത്. ഉപ്പ് തിന്നവന്‍ വെള്ളം കുടിക്കും, തെറ്റ് ചെയ്തവര്‍ ശിക്ഷിക്കപ്പെടും, രക്ഷിക്കാന്‍ സര്‍ക്കാര്‍ ഇടപെടില്ല തുടങ്ങി ഇതുവരെ പറഞ്ഞ ന്യായീകരണങ്ങള്‍ പൊതുസമൂഹത്തില്‍ തുടര്‍ന്നും എത്രത്തോളം വിശ്വാസ്യത സൃഷ്ടിക്കാന്‍ പ്രാപ്തമാണെന്നതിന്റെ പരീക്ഷണഘട്ടം കൂടിയാണ് വരുന്നത്. ശിവശങ്കര്‍ ചെയ്ത കുഴപ്പം ഇനി മുഖ്യമന്ത്രിയിലേക്കു വരരുതെന്ന ജാഗ്രതയാണ് ഇക്കാര്യത്തില്‍ സിപിഎം പുലര്‍ത്തുന്നത്. ശിവശങ്കറിനെ തള്ളിപ്പറഞ്ഞ് ഉറച്ചുനില്‍ക്കാനാണ് സിപിഎം തീരുമാനം. ദേശീയനേതൃത്വവും ഒപ്പമുണ്ടെന്നത് കേരള നേതാക്കള്‍ക്ക് വലിയ ആശ്വാസവും നല്‍കുന്നു.
വിവാദങ്ങളില്‍ വലഞ്ഞ് കോടിയേരി
കോടിയേരി ബാലകൃഷ്ണന്റെ കാര്യം എടുക്കുകയാണെങ്കില്‍, ആരോഗ്യപ്രശ്‌നങ്ങളും മക്കളുടെ വിവാദ പരമ്പരകളും പിന്തുടരുമ്പോഴും പാര്‍ട്ടിക്കകത്തു കോടിയേരിക്കു ഇപ്പോഴും സ്വീകാര്യതയുണ്ട്. പ്രായപൂര്‍ത്തിയായ മകന്റെ തെറ്റിന് അച്ഛനെ ക്രൂശിക്കേണ്ടതില്ലെന്ന ന്യായമാണു സിപിഎം നിരത്തുന്നത്. അതുകൊണ്ടുതന്നെ കോടിയേരിയുടെ രാജി ആവശ്യവും അപ്രസക്തമാകും. എന്തായാലും സിപിഎമ്മിനുണ്ടായ ഇരട്ടപ്രഹരം പ്രതിപക്ഷത്തിനും ബിജെപിക്കും കൂടുതല്‍ ഇന്ധനം പകരുന്നതാണ് എന്നതില്‍ സംശയമില്ല. രാജ്യത്ത് ഇതുവരെ ഒരു സര്‍ക്കാറിനും നേരിടേണ്ടി വന്നിട്ടില്ലാത്ത പ്രതിച്ഛായ നഷ്ടത്തിലാണ് പിണറായി സര്‍ക്കാര്‍. ഭരണകൂടത്തെ രക്ഷപ്പെടുത്തേണ്ട പാര്‍ട്ടി നേതൃത്വമാകട്ടെ, അതിലും വലിയ പൊല്ലാപ്പിലും. കളങ്കിത പ്രതിച്ഛായയില്‍ പെട്ടുപോയ മുഖ്യമന്ത്രിക്കും പാര്‍ട്ടിനേതൃത്വത്തിനും സംശയശുദ്ധി വരുത്തി മാത്രമേ രാഷ്ട്രീയകേരളത്തിന്റെ വിശ്വാസ്യത തിരിച്ചുപിടിക്കാനാവൂ. ഈ ഇരട്ട പ്രതിച്ഛായനഷ്ടത്തില്‍ നിന്നു പാര്‍ട്ടിയും സര്‍ക്കാരും എങ്ങനെ കരകയറുമെന്ന് വരും ദിവസങ്ങളില്‍ കണ്ടറിയാം.......