തിരുവനന്തപുരം: നെയ്യാറ്റിന്കരയില് ഗൃഹനാഥന് ആത്മഹത്യയ്ക്ക് ശ്രമിച്ചു. വെണ്പകല് സ്വദേശി രാജനാണ് ആത്മഹത്യയ്ക്ക് ശ്രമിച്ചത്. രാജനെ തടയാന് ശ്രമിച്ച ഭാര്യ അമ്പിളിക്കും പോലീസ് ഉദ്യോഗസ്ഥനും പൊള്ളലേറ്റിട്ടുണ്ട്. ഗുരുതരമായി പരുക്കേറ്റ രാജനെ ആശുപത്രിയില് പ്രവേശിപ്പിച്ചിരിക്കുകയാണ്.
രാജനും അയല്വാസിയുമായി ഭൂമിസംബന്ധമായ തര്ക്കം നിലനിന്നിരുന്നു. ഇതുമായി ബന്ധപ്പെട്ട കേസ് നെയ്യാറ്റിന്കര കോടതിയുടെ പരിഗണനയിലാണ്. അടുത്തിടെ രാജന് കെട്ടിയ താല്ക്കാലിക ഷെഡ്ഡ് പൊളിച്ച് നീക്കാന് കോടതി ഉത്തരവിട്ടിരുന്നു. ഇത് അനുസരിച്ച് ഷെഡ് പൊളിച്ച് നീക്കാന് ഉദ്യോഗസ്ഥര് എത്തിയപ്പോഴാണ് രാജന് ആത്മഹത്യയ്ക്ക് ശ്രമിച്ചത്.
രാജനെ പിടിച്ചുമാറ്റാന് ശ്രമിച്ച ഗ്രേഡ് എസ്ഐ അനില് കുമാറിന് സാരമായി പൊള്ളലേറ്റിട്ടുണ്ട്. ഗുരുതരമായി പൊള്ളലേറ്റ രാജനേയും ഭാര്യയേയും ആശുപത്രിയില് പ്രവേശിപ്പിച്ചിരിക്കുകയാണ്.
( ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക. Toll free helpline number: 1056)