കൊവിഡ് ഭീതിയില്‍ പുഴയില്‍ ചാടിയ ഹെല്‍ത്ത് ഇന്‍സ്‌പെക്ടറുടെ മൃതദേഹം കണ്ടെത്തി; ഫലം പോസിറ്റീവ്

തിരുവനന്തപുരം: തിരുവനന്തപുരം ജില്ലയിലെ കുണ്ടമണ്‍കടവില്‍ ആറ്റില്‍ ചാടി ആത്മഹത്യ ചെയ്ത ഹെല്‍ത്ത് ഇന്‍സ്‌പെക്ടര്‍ക്ക് കൊവിഡ്. ട്രൂനാറ്റ് പരിശോധനയിലാണ് വൈറസ് ബാധ സ്ഥിരീകരിച്ചത്. ഹെല്‍ത്ത് ഡയറക്ട്രേറ്റിലെ ജീവനക്കാരനായ പേയാട് സ്വദേശി കൃഷ്ണകുമാറിന്റെ (54) മൃതദേഹം മങ്കാട്ട്ക്കടവ് ഭാഗത്ത് നിന്ന് ഇന്ന് രാവിലെയാണ് കണ്ടെടുത്തത്. സഹപ്രവര്‍ത്തകന്റെ അച്ഛന് കൊവിഡ് സ്ഥിരീകരിച്ചതിനെ തുടര്‍ന്ന് ഇദ്ദേഹം നിരീക്ഷണത്തിലായിരുന്നു.

Also Read: 'മന്ത്രി കെടി ജലീല്‍ സത്യപ്രതിജ്ഞാ ലംഘനം നടത്തി; നടപടി വേണ്ടിവരും'

ഇന്നലെ രാവിലെ കൃഷ്ണകുമാറിനെ കാണാതായതിനെ തുടര്‍ന്ന് ഭാര്യയും മക്കളും നടത്തിയ അന്വേഷണത്തില്‍ കിടപ്പു മുറിയില്‍ നിന്നു കൃഷ്ണകുമാര്‍ എഴുതിയത് എന്ന് കരുതുന്ന കത്ത് കിട്ടി. തുടര്‍ന്ന് വീടിനു സമീപമുള്ള കരമനയാറ്റിലെ നീലചാംകടവ് ഭാഗത്തു പരിശോധിച്ചപ്പോള്‍ കൃഷ്ണകുമാറിന്റെ ചെരിപ്പ് കണ്ടെത്തി. വീട്ടിലെ സിസിടിവി ദൃശ്യത്തില്‍ കൃഷ്ണകുമാര്‍ പുലര്‍ച്ചെ 1.30ന് വീട്ടില്‍ നിന്നു പുറത്തിറങ്ങുന്നത് വ്യക്തമാണ്. ഇതോടെയാണ് ആറ്റില്‍ ചാടിയിരിക്കാം എന്ന നിഗമനത്തില്‍ വീട്ടുകാര്‍ പോലീസിനെ വിവരം അറിയിച്ചത്. തുടര്‍ന്ന് നടത്തിയ തെരച്ചിലിലാണ് മൃതദേഹം കണ്ടെത്തിയത്.

Also Read: ആരോഗ്യ പ്രവര്‍ത്തകര്‍ക്കെതിരായ ആക്രമണം; കര്‍ശന നടപടിയെടുക്കാന്‍ കളക്ടറുടെ നിര്‍ദ്ദേശം

സഹപ്രവര്‍ത്തകന്റെ പിതാവിന് കൊവിഡ് സ്ഥിരീകരിച്ചത് അറിഞ്ഞ ദിവസം മുതല്‍ കൃഷ്ണകുമാര്‍ അസ്വസ്ഥനായിരുന്നതായി ബന്ധുക്കള്‍ സൂചിപ്പിച്ചു. എന്നാല്‍ സഹപ്രവര്‍ത്തകന്റെ പരിശോധനാ ഫലം നെഗറ്റീവ് ആണെന്നു അറിഞ്ഞിട്ടും മുന്‍കരുതല്‍ എന്ന നിലയില്‍ സ്വയം ക്വാറന്റീനില്‍ പ്രവേശിക്കുകയായിരുന്നു. ആരോഗ്യ വകുപ്പിന്റെ കൊവിഡ് ജാഗ്രതാ നിര്‍ദേശങ്ങള്‍ ജനങ്ങളില്‍ എത്തിക്കുന്നതില്‍ ഇദ്ദേഹം നിറഞ്ഞു നിന്നു. കൂടാതെ നാട്ടുകാര്‍ക്കും അടുപ്പക്കാര്‍ക്കും രോഗ പ്രതിരോധ കാര്യങ്ങള്‍ പറഞ്ഞു കൊടുക്കുന്നതും കൃഷ്ണകുമാറിന്റെ പതിവ് രീതിയായിരുന്നു.

Also Read: നെടുമങ്ങാട് കരുപ്പൂര്‍ റോഡില്‍ ജീവന് ഭീഷണിയായി ഉണക്ക മരം; മരംവീണ് ബൈക്ക് യാത്രക്കാരന്‍ മരിച്ചിട്ടും നടപടിയില്ല


നിങ്ങള്‍ ഒറ്റയ്ക്കല്ല. സഹായം തേടാം ഉടനെ. ദയവായി വിളിക്കൂ;

ദിശ ഹെല്‍പ്പ്‍ലൈന്‍ - 1056 (ടോള്‍ ഫ്രീ)