തിരുവനന്തപുരം: വീട്ടിലെ വൈദ്യുതി വിച്ഛേദിച്ചതില് മനംനൊന്ത് ദേഹത്ത് മണ്ണെണ്ണ ഒഴിച്ച് തീകൊളുത്തിയയാള് മരിച്ചു. നെയ്യാറ്റിന്കര പെരുങ്കടവിള സ്വദേശി സനല് ആണ് മരിച്ചത്. കഴിഞ്ഞ തെരഞ്ഞെടുപ്പില് പെരുങ്കടവിള ഗ്രാമപഞ്ചായത്ത് പ്രസിഡന്റ് സുരേന്ദ്രനെതിരെ സ്വതന്ത്രനായി മത്സരിച്ചയാളാണ് മരിച്ച സനല്. വീട്ടിലെ വൈദ്യുതി മുടക്കിയത് പഞ്ചായത്ത് പ്രസിഡന്റാണെന്ന് സനലിന്റെ മക്കള് ആരോപിച്ചു. സുരേന്ദ്രന്റെ വീട്ടില് പോയി തിരിച്ചുവന്നശേഷമാണ് സനല് ജീവനൊടുക്കിയതെന്നും മക്കള് പറയുന്നു.
ലോക്ക്ഡൗണ് തുടങ്ങിയതു മുതലുള്ള കുടിശിക കാരണമാണ് സനലിന്റെ വീട്ടിലെ വൈദ്യുതി വിഛേദിച്ചതെന്നാണ് കെ.എസ്.ഇ.ബിയുടെ വിശദീകരണം. എന്നാല് പഞ്ചായത്ത് പ്രസിഡന്റിന്റെ നിര്ദേശ പ്രകാരമാണ് വൈദ്യുതി വിച്ഛേദിച്ചതെന്നാണ് മരിക്കുന്നതിന് മുമ്പ് സനില് പറഞ്ഞിരുന്നത്. ''സുരേന്ദ്രന് തന്നെ വ്യക്തിഹത്യ നടത്തുകയും, സമൂഹത്തില് ഒറ്റപ്പെടുത്തുകയും ചെയ്തിരുന്നു. തനിക്ക് ആനുകൂല്യങ്ങള് നിഷേധിച്ചിരുന്നു. വീട്ടിലെ വൈദ്യുതി ബില്ലിന് രണ്ടുദിവസം സാവകാശം ചോദിച്ചിട്ട് നല്കാതെ സുരേന്ദ്രന് പറഞ്ഞത് പ്രകാരം കെഎസ്ഇബി വദ്യുതി വിച്ഛേദിക്കുകയായിരുന്നു. ഇതിന്റെ മനോവിഷമത്തിലാണ് താന് ആത്മഹത്യാശ്രമം നടത്തിയത്' - ആത്മഹത്യാശ്രമത്തിന് ശേഷം ചികിത്സയിലിരിക്കെ സനല് പറഞ്ഞതിങ്ങനെ.
സംഭവത്തില് വിശദമായ അന്വേഷണം വേണമെന്ന് സനലിന്റെ കുടുംബം ആവശ്യപ്പെട്ടു. വീട്ടിലെ വൈദ്യുതി വിച്ഛേദിച്ചതിന്റെ വിഷമത്തിലാണ് ആത്മഹത്യയെന്ന് സനലിന്റെ സഹോദരന് സുരേഷും പറഞ്ഞു. ഇന്ന് കുടിശ്ശിക തീര്ക്കാമെന്ന് അറിയിച്ചെങ്കിലും തിടുക്കത്തില് വൈദ്യുതി വിച്ഛേദിച്ചു. മറ്റ് പ്രശ്നങ്ങളുണ്ടോയെന്ന് തനിക്കറിയില്ലെന്നും അദ്ദേഹം വ്യക്തമാക്കി. അതേസമയം കെഎസ്ഇബി പറയുന്നത് സനലിന് മാസങ്ങളായി വൈദ്യുത കുടിശ്ശിക ഉണ്ടായിരുന്നുവെന്നും പിന്നാലെയാണ് വൈദ്യുതി വിച്ഛേദിച്ചതെന്നുമാണ്. സമീപത്തെ 9 വീടുകളിലെ വൈദ്യുതി കൂടി വിച്ഛേദിച്ചുവെന്നും കെഎസ്ഇബി പറയുന്നു.