തിരുവനന്തപുരം: അച്ഛനെ കാണാനും അന്ത്യകര്മ്മങ്ങള് ചെയ്യാനുമുള്ള എബിന്റെ ആഗ്രഹം ഒടുവില് സാധിച്ചു. സൗദിയില് കെട്ടിടത്തില് നിന്ന് വീണുമരിച്ച നെടുമങ്ങാട് സ്വദേശി ബാബുവിന്റെ മൃതദേഹം നാട്ടിലെത്തിച്ച് സംസ്കരിച്ചു. പ്രമുഖ മലയാളി വ്യവസായിയും ലുലു ഗ്രൂപ്പ് ചെയര്മാനുമായ എംഎ യൂസഫലിയുടെ ഇടപെടലോടെയാണ് ബാബുവിന്റെ മൃതദേഹം നാട്ടിലെത്തിച്ചത്.
സൗദിയില് നിന്ന് മൃതദേഹം എത്തിക്കാന് സഹായം അഭ്യര്ത്ഥിച്ച് കഴിഞ്ഞയാഴ്ച ലോക കേരള സഭ ഓപ്പണ് ഫോറത്തില് എബിന് യുസഫലിയെ സമീപിച്ചിരുന്നു. സ്പോണ്സറെ ഒഴിവാക്കി മതിയായ രേഖകളില്ലാതെയാണ് ബാബു സൗദിയില് ജോലി ചെയ്തിരുന്നത്. ഇതേ തുടര്ന്നുള്ള പിഴ ലുലു ഗ്രൂപ്പ് അധികൃതരുടെ ഇടപെടലിനെ തുടര്ന്ന് സൗദി ജവാസത്ത് ഒഴിവാക്കി. ബാബുവിന്റെ ആദ്യ സ്പോണ്സറില് നിന്ന് നിരാക്ഷേപ പത്രം ശേഖരിച്ച് അധികൃതര്ക്ക് കൈമാറി. ഇതോടെ മൃതദേഹം കേരളത്തിലെത്തിക്കാനുള്ള സാങ്കേതിക നടപടിക്രമങ്ങള് പൂര്ത്തിയായി.
ഫൈനല് എക്സിറ്റ് ലഭിച്ച ശേഷം ഫോറന്സിക് പരിശോധന പൂര്ത്തിയാക്കി മൃതദേഹം ലുലു ഗ്രൂപ്പ് അധികൃതര് റിയാദില് നിന്ന് വിമാനമാര്ഗം കൊച്ചിയില് എത്തിച്ചു. കൊച്ചിയില് നിന്ന് റോഡ് മാര്ഗം തിരുവനന്തപുരത്തെത്തിച്ചു. ഇതിനാവശ്യമായ ചിലവുകള് യൂസഫലി വഹിച്ചു. ചെക്കക്കോണം സെന്റ് ജോര്ജ് മലങ്കര കത്തോലിക്ക പള്ളി സെമിത്തേരിയിലാണ് സംസ്കാര ചടങ്ങുകള് നടന്നത്.