ആറ്റുകാല് പൊങ്കാല വീട്ടില് ഇടേണ്ടത് എങ്ങനെ ? അറിയേണ്ടതെല്ലാം
എല്ലാ വർഷത്തിൽ നിന്നും വിപരീതമായി ഇക്കുറി ഭക്തർ വീട്ടിൽ തന്നെയാണ് പൊങ്കാല ഒരുക്കുന്നത്. ക്ഷേത്രപരിസരത്ത് ഇക്കുറി ഭക്തർക്ക് പൊങ്കാല ഇടാനുള്ള അനുമതി ഇല്ല
Lipi 26 Feb 2021, 8:59 am
ഹൈലൈറ്റ്:
- നാളെ രാവിലെ ക്ഷേത്രതന്ത്രി ശ്രീകോവിലില് നിന്നു ദീപം പകർന്നു നൽകും
- ക്ഷേത്രതന്ത്രി പകർന്നു നൽകുന്ന ദീപം മേൽശാന്തി അടുപ്പിൽ തെളിക്കുന്നതോടെ ചടങ്ങ് ആരംഭിക്കും
- കൊവിഡ് മാനദണ്ഡം ഉറപ്പാക്കാൻ സെക്ടറല് മജിസ്ട്രേറ്റുമാർക്കാണ് ചുമതല
തിരുവനന്തപുരം: കുംഭത്തിലെ പൂരവും പൗര്ണമിയും ഒന്നിക്കുന്ന നാളെ ആറ്റുകാല് പൊങ്കാല. ഒരു വര്ഷത്തെ വ്രതനിഷ്ഠമായ കാത്തിരിപ്പിനൊടുവില് പതിവില് നിന്ന് വ്യത്യസ്തമായി ഭക്തര് സ്വന്തം വീടുകളില് ഇക്കുറി പൊങ്കാല അര്പ്പിക്കും. ക്ഷേത്രത്തിലെ പണ്ടാരയടുപ്പില് മാത്രമാണ് ഇക്കുറി പൊങ്കാല സമര്പ്പണവും നിവേദ്യവും.
രാവിലെ 10.50-ന് ക്ഷേത്രതന്ത്രി ശ്രീകോവിലില് നിന്നു പകര്ന്നു നല്കുന്ന ദീപം മേല്ശാന്തി അടുപ്പില് തെളിക്കും. ഉച്ചയ്ക്ക് 3.40-ന് ഉച്ചപൂജയും നിവേദ്യവും നടക്കും. ഈ സമയത്ത് ഭക്തര് വീടുകളില് പതിവുള്ള ആചാരപ്രകാരം പൊങ്കാലയര്പ്പിക്കണം. കൊവിഡ് നിയന്ത്രണങ്ങള് കര്ശനമായി പാലിക്കേണ്ടതിനാല് പൊങ്കാല നിവേദ്യത്തിനായി ക്ഷേത്രത്തില് നിന്ന് പൂജാരിമാരെ നിയോഗിച്ചിട്ടില്ല.
മുന്വര്ഷങ്ങളിലേത് പോലെ തന്നെയാണ് ഇത്തവണയും പൊങ്കാല അര്പ്പിക്കേണ്ടതെന്ന് ക്ഷേത്രം വൈസ് പ്രസിഡന്റ് ശോഭ പറഞ്ഞു. സോഷ്യല് മീഡിയിയല് പലതരത്തിലുള്ള വ്യാജപ്രചരണങ്ങള് പൊങ്കാല ചടങ്ങുകളുമായി ബന്ധപ്പെട്ട് നടക്കുന്നുണ്ട്. ഇത്തരം പ്രചരണങ്ങളില് വീഴരുതെന്നും മുന്കാലങ്ങളിലെ ആചാരപ്രകാരം തന്നെ ഭക്തര് പൊങ്കാല അര്പ്പിച്ചാല് മതിയെന്നും ഭാരവാഹികള് അറിയിച്ചു. പൊങ്കാലയുമായി ബന്ധപ്പെട്ട സംശയങ്ങള് പരിഹരിക്കാന് വീഡിയോ കാണാം.