തിരുവനന്തപുരം: ഒരാഴ്ച മുന്പ് അനുഭവപ്പെട്ട അതി തീവ്രമഴയെ തുടര്ന്ന് തകര്ന്ന പൊന്മുടി - വിതുര റോഡിന്റെ പുനര്നിര്മ്മാണപ്രവര്ത്തനങ്ങള് വിലയിരുത്താന് മന്ത്രി പിഎ മുഹമ്മദ് റിയാസ് പൊന്മുടിയിലെത്തി. റോഡ് പണി അടിയന്തരമായി പൂര്ത്തീകരിച്ച് പൊന്മുടി തുറക്കാന് മന്ത്രി ഉദ്യോഗസ്ഥര്ക്ക് നിര്ദ്ദേശം നല്കി. നിര്മാണപ്രവര്ത്തനങ്ങള് വിലയിരുത്തിയ മന്ത്രി ഉയര്ന്നുവന്ന പരാതികളെക്കുറിച്ചും ഉദ്യോഗസ്ഥരോട് ചോദിച്ചറിഞ്ഞു. കനത്ത മഴയെ തുടര്ന്ന് പൊന്മുടി പതിനൊന്നാംവളവിന് സമീപത്താണ് റോഡിന്റെ ഒരു വശം ഇടിഞ്ഞു താഴ്ന്നത്. പത്ത് ദിവസം മുന്പാണ് റോഡ് തകര്ന്നത്. ഇതോടെ പൊന്മുടിയിലേക്കുള്ള ഗതാഗാതം നിലയ്ക്കുകയും,പൊന്മുടി നിവാസികള് ഒറ്റപ്പെടുകയും ചെയ്തു. കെഎസ്ആര്ടിസി ബസുകള് കല്ലാര് വരെ എത്തി മടങ്ങുകയാണ്.
മുന്നൂറില് പരം തോട്ടം തൊഴിലാളികള് പൊന്മുടിയില് താമസിക്കുന്നുണ്ട്. പൊന്മുടിയില് നിന്ന് പന്ത്രണ്ട് കിലോമീറ്റര് നടന്ന് കല്ലാറില് എത്തി ബസില് കയറി വിതുരയില് എത്തേണ്ട അവസ്ഥയിലാണ് ഇപ്പോള് ഇവിടെയുള്ളവര്ക്ക്. മാത്രമല്ല വഴി മദ്ധ്യേ കാട്ടാന ശല്യവുമുണ്ട്. രണ്ടാഴ്ച കൊണ്ട് റോഡ് പണി പൂര്ത്തീകരിച്ച് പൊന്മുടി തുറക്കുമെന്നാണ് വനംവകുപ്പ് വ്യക്തമാക്കിയിരുന്നത്. എന്നാല് പത്ത് ദിവസം കഴിഞ്ഞിട്ടും പണിയില് പുരോഗതിയില്ലെന്നാണ് നാട്ടുകാരുടെ ആക്ഷേപം. റോഡ് പണി അടിയന്തരമായി പൂര്ത്തീകരിച്ച് പൊന്മുടി ഉടന് തുറന്നില്ലെങ്കില് സമരപരിപാടികള് സംഘടിപ്പിക്കാനുള്ള തീരുമാനത്തിലായിരുന്നു നാട്ടുകാര്. ഇതിനിടയിലായിരുന്നു മന്ത്രിയുടെ സന്ദര്ശനം. മന്ത്രിക്കൊപ്പം ഡികെ മുരളി എംഎല്എ, പൊതുമരാമത്ത് വകുപ്പ് ഉദ്യോഗസ്ഥരും, രാഷ്ട്രീയകക്ഷി നേതാക്കളും ഉണ്ടായിരുന്നു.
Read Latest Local News and Malayalam News
തെറ്റായ പ്രവണതകള്, കാലാവസ്ഥാ വ്യതിയാനം, ശാസ്ത്രീയ നിര്മ്മാണ രീതികള് എന്നിവ പരിഗണിച്ച് നിര്മ്മാണ രീതികള് നവീകരിക്കുമെന്ന് റിയാസ് പറഞ്ഞു. അതാത് കാലത്തെ ആവശ്യങ്ങള്ക്ക് അനുസരിച്ച് നാട്ടുവഴികള് വികസിപ്പിച്ച് ഉണ്ടാക്കിയതാണ് കേരളത്തിലെ റോഡുകള്. അതിന്റെ പരിമിതികള് അനുഭവിക്കുന്നത് വാഹനപെരുപ്പവും ജനസാന്ദ്രതയും കൂടിയ ഈ കാലത്താണ്. അതുകൊണ്ട് തന്നെ ഭാവി കേരളത്തെ മുന്നില് കണ്ടുകൊണ്ട് മാത്രമേ സംസ്ഥാനത്ത് റോഡ് വികസനം നടപ്പിലാക്കാന് സാധിക്കുകയുള്ളൂവെന്നും മന്ത്രി പറഞ്ഞു.