Thiruvananthapuram; വീണ്ടും പോലീസ് സേനയിൽ മേലുദ്യോഗസ്ഥ പീഡനം, സജിയുടെ മരണത്തിന് പിന്നിൽ ഉന്നത ഉദ്യോഗസ്ഥരോ? കുടുംബം പറയുന്നത് ഇങ്ങനെ...

സേനാംഗങ്ങൾ നേരിടുന്ന പീഡനങ്ങൾക്കെതിരെ സംഘടനാ നേതൃത്വം ഇടപെടണമെന്ന് 2019ൽ കണ്ണൂരിൽ സമാപിച്ച കേരള പോലീസ് ഓഫീസേഴ്സ് അസോസിയേഷൻ സംസ്ഥാന സമ്മേളനം ആവശ്യപ്പെട്ടതും കേരളം ഏറെ ചർച്ച ചെയ്തിരുന്നു. തൊഴിലിടങ്ങളിലെ മാനസിക പീഡനം കാരണം ജീവൻ നഷ്ടപ്പെടുത്താതിരിക്കാൻ സംഘടന അതീവ ജാഗ്രതയോടെ പ്രവർത്തിക്കണം. ചില മേലുദ്യോഗസ്ഥരുടെ അമിതാധികാര പ്രവണത പൊലീസുദ്യോഗസ്ഥരെ കൂടുതൽ മാനസിക സമ്മർദ്ദങ്ങളിലേക്ക് തള്ളിവിടുന്നുണ്ടെന്നായിരുന്നു പ്രതിനിധികൾ പറഞ്ഞത്.

എന്നാൽ മേലുദ്യോഗസ്ഥ പീഡനങ്ങൾക്ക് ഒരു കുറവും ഇല്ലെന്നാണ് പുറത്ത് വരുന്ന വാർത്തകൾ സൂചിപ്പിക്കുന്നത്. തമ്പാനൂരിലെ സ്വകാര്യ ഹോട്ടലിൽ സിവിൽ പോലീസ് ഓഫീസറെ തൂങ്ങിമരിച്ച നിലയിൽ വെള്ളിയാഴ്ച കണ്ടെത്തിയിരുന്നു. നെയ്യാറ്റിൻകര സ്റ്റേഷനിലെ എസ് ജെ സജിയാണ് മരിച്ചത്. മേലുദ്യോഗസ്ഥരുടെ പീഡനമാണ് മരണ കാരണമെന്നാണ് ബന്ധുക്കൾ ആരോപിക്കുന്നത്. പുലർച്ചെ ഹോട്ടൽ ജീവനക്കാരാണ് സജിയെ മുറിയിൽ തൂങ്ങിമരിച്ച നിലയിൽ കണ്ടെത്തിയത്.

നെയ്യാറ്റിൻകര സ്റ്റേഷനിലെ സി ഐ ഉൾപ്പെടെയുള്ള മേലുദ്യോഗസ്ഥരുടെ പീഡനമാണ് ആത്മഹത്യയ്ക്ക് പിന്നിലെന്നും കൂടുതൽ കാര്യങ്ങൾ വെളിപ്പെടുത്താനുണ്ടെന്നും കുടുംബം ആരോപിക്കുന്നു. മരണത്തിൽ സമഗ്രമായ അന്വേഷണം വേണമെന്നാണ് കുടുംബം ആവശ്യപ്പെടുന്നത്. വ്യാഴാഴ്ച ഉച്ചയോടെയാണ് സജി ഹോട്ടലിൽ മുറിയെടുത്തത്. രണ്ട് ദിവസമായി സജിയെ കാണാനില്ലാതിരുന്നതിനാൽ കുടുംബം പൊലീസിൽ പരാതി നൽകിയിരുന്നു. പരാതിയിൽ പോലീസ് അന്വേഷണം നടക്കുന്നതിനിടയിലാണ് ആത്മഹത്യ വിവരം പുറത്ത് വരുന്നത്.