തിരുവനന്തപുരം: കഠിനംകുളം ചാന്നാങ്കരയില് ഇന്നോവ കാറിലെത്തിയ സംഘം പടക്കമെറിഞ്ഞ് ഭീകരാന്തരീക്ഷം സൃഷ്ടിച്ച ശേഷം ജ്വല്ലറിയില് നിന്ന് സ്വര്ണം കവര്ന്നു. ചാന്നാങ്കരയിലുള്ള സിഎസ് ഗോള്ഡ് വര്ക്ക് എന്ന കടയില് നിന്നാണ് അഞ്ചുപവന് സ്വര്ണം കവര്ന്നത്. ഇന്നലെ രാതി 9.30ഓടെയാണ് സംഭവം.
ജ്വല്ലറി അടയ്ക്കാനുള്ള സമയത്താണ് കവര്ച്ച നടന്നത്. വീടിന് സമീപത്തുള്ള ജ്വല്ലറിയില് സ്വര്ണാഭരണങ്ങളും നിര്മിച്ചിരുന്നു. കടയുടമ സുരേഷ് കുമാര് അകത്തെ മുറിയിലേക്കു കടന്ന സമയത്താണ് കാറിലെത്തിയ രണ്ടുപേര് കടയില് അതിക്രമിച്ചു കയറിയത്. പുറംമതിലില് ഇവര് പടക്കമെറിഞ്ഞു.
ശബ്ദംകേട്ട് സുരേഷ്കുമാര് പുറത്തെത്തിയപ്പോള് രണ്ടുപേര് ജ്വല്ലറിയില് കയറി വാളുകൊണ്ട് അലമാര വെട്ടിപ്പൊളിക്കുന്നതാണ് കണ്ടത്. അലമാരയിലുണ്ടായിരുന്ന അഞ്ചുപവന്റെ സ്വര്ണാഭരണം കവര്ന്ന ശേഷം രണ്ടുപേരും കാറില് രക്ഷപ്പെട്ടു. സിറ്റിയിലേക്കുള്ള റോഡിലേക്കാണ് ഇവര് പോയതെന്ന് സുരേഷ്കുമാര് പോലീസിനെ അറിയിച്ചു. സ്ഥലത്തെത്തിയ കഠിനംകുളം പോലീസ് കേസെടുത്ത് അന്വേഷണം ആരംഭിച്ചു.