മീനഭരണി: ഏപ്രിൽ 10ന് പ്രാദേശിക അവധി

ചിറയിൻകീഴ്: ശാർക്കര ദേവീ ക്ഷേത്രത്തിലെ മീനഭരണിമഹോത്സവത്തിന്റെ ഭാഗമായി ചിറയിൻകീഴ്, വർക്കല (പഴയ ചിറയിൻകീഴ് താലൂക്ക്) താലൂക്കുകളിലെ സർക്കാർ സ്ഥാപനങ്ങൾക്കും വിദ്യാഭ്യാസ സ്ഥാപനങ്ങൾക്കും ഏപ്രിൽ 10ന് തിരുവനന്തപുരം ജില്ലാ കളക്ടർ ജെറോമിക് ജോർജ് പ്രാദേശിക അവധി പ്രഖ്യാപിച്ചു. മുൻ നിശ്ചയ പ്രകാരമുള്ള പൊതുപരീക്ഷകൾക്ക് അവധി ബാധകമായിരിക്കില്ല.

ഭദ്രകാളീ പ്രതിഷ്ഠയുള്ള ക്ഷേത്രമാണ് ശാർക്കര ക്ഷേത്രം. 1748 -ൽ തിരുവിതാംകൂർ മഹാരാജാവ് അനിഴം തിരുനാൾ മാർത്താണ്ഡവർമ്മ ഈ ക്ഷേത്രത്തിൽ കാളിയൂട്ട് ഉത്സവം ആരംഭിച്ചു. ഇതോടെ ക്ഷേത്രത്തിന് വലിയ പ്രാധാന്യം കൈവന്നു.


കേരളത്തിന്റെ വടക്കൻ പ്രദേശങ്ങളിലുള്ള കാളിയൂട്ട് തെക്കോട്ട് വരുന്നത് മാർത്താണ്ഡവർമ്മയുടെ ഈ ഇടപെടലോടെയാണ്.

തിരുവിതാംകൂർ രാജാക്കന്മാരുടെ മാതൃഭവനം എന്നറിയപ്പെടുന്ന ആറ്റിങ്ങൽ റാണിമാരുടെ ഭരണത്തിൻകീഴിലായിരുന്നു ശാർക്കര ക്ഷേത്രം. ആറ്റിങ്ങൽ റാണിമാരാണ് ഭരിച്ചിരുന്നതെങ്കിലും അത് തിരുവിതാംകൂറിന്റെ പരമാധികാരത്തിൻകീഴിലായിരുന്നു. കാളിയൂട്ട് ഉത്സവത്തിന് പണം വന്നത് തിരുവിതാംകൂർ ഖജനാവിൽ നിന്നായിരുന്നു. പക്ഷെ ഉത്സവത്തിന്റെ നടത്തിപ്പ് പൂർണമായും ആറ്റിങ്ങൽ റാണിമാരുടെ മേൽനോട്ടത്തിലായിരുന്നു.