തിരുവനന്തപുരം: തലസ്ഥാന നഗരത്തില് അപ്രതീക്ഷിതമായുണ്ടായ വെള്ളപ്പൊക്കത്തില് ജില്ലാ ഭരണകൂടത്തിനെതിരെ വിമര്ശനവുമായി മേയര് കെ ശ്രീകുമാര് രംഗത്ത്. അരുവിക്കര ഡാമിന്റെ ഷട്ടറുകള് തുറന്നത് ആവശ്യമായ മുന്നൊരുക്കങ്ങള് സ്വീകരിക്കാതെയാണെന്നും ജനങ്ങള്ക്ക് മുന്നറിയിപ്പ് നല്കിയില്ലെന്നും മേയര് വിമര്ശിച്ചു.
വെള്ളത്തിന്റെ അളവ് ക്രമാതീതമായി കൂടിയതുകൊണ്ടാകാം ഡാമിന്റെ ഷട്ടര് തുറന്നുവിട്ടത്. എന്നാല് ഷട്ടര് തുറക്കുന്നതുമായി ബന്ധപ്പെട്ടുള്ള നിര്ദ്ദേശങ്ങള് നഗരസഭയ്ക്ക് ലഭിച്ചില്ല. അതുകൊണ്ട് തന്നെ ജാഗ്രതാ നിര്ദ്ദേശം നല്കാന് കഴിഞ്ഞില്ലെന്നും മേയര് വ്യക്തമാക്കി.
Also Read: മലപ്പുറത്ത് നാല് പേര്ക്ക് കൂടി കൊവിഡ്-19 സ്ഥിരീകരിച്ചു; രോഗം ബാധിച്ചത് അന്യസംസ്ഥാനങ്ങളില് നിന്നും എത്തിയവര്ക്ക്!
എന്നാല് അര്ധരാത്രിക്ക് ശേഷം പ്രതീക്ഷിച്ചതിലും അധികം മഴ കനത്തതോടെയാണ് മുന്നറിയിപ്പ് ഇല്ലാതെ ഡാം തുറക്കേണ്ടി വന്നതെന്നാണ് ജില്ലാ ഭരണകൂടത്തിന്റെ വിശദീകരണം. ദുരന്ത നിവാരണ അതോരിറ്റിയേയും ജില്ലാ ഭരണകൂടത്തേയും അറിയിച്ച ശേഷമാണ് ഡാം തുറന്നത് എന്നാണ് ഡാമിന്റെ 5 ഷട്ടറുകളും തുറന്നത് എന്നാണ് ജല അതോരിറ്റിയുടെ വിശദീകരണം.
കനത്ത മഴയോടൊപ്പം അപ്രതീക്ഷിതമായി ഡാം തുറക്കുക കൂടി ചെയ്തതോടെ നഗരത്തിലെ താഴ്ന്ന പ്രദേശങ്ങള് വെള്ളത്തിനടിയിലായിരുന്നു. വീടുകളില് വെള്ളം കയറുകയും നിരവധി കെട്ടിടങ്ങള്ക്ക് കേടുപാടുണ്ടാകുകയും ചെയ്തിട്ടുണ്ട്. കിള്ളിയാര് കരകവിഞ്ഞതുകൊണ്ടാണ് താഴ്ന്ന പ്രദേശങ്ങളില് വെള്ളം കയറിയതെന്നും അരുവിക്കര ഡാം തുറന്നതുമായി ഇതിന് ബന്ധമില്ലെന്നുമാണ് ജല അതോരിറ്റി വ്യക്തമാക്കുന്നത്.