ശിവലിംഗ കാഴ്ചകളെ തേടിയെത്തുന്ന ജനപ്രവാഹം എവിടെ? ഇവിടം നിശബ്ദമാണ്...

ഒരിക്കലും പ്രതീക്ഷിക്കാത്ത മഹാമാരി നാടിനെ നടുക്കിയപ്പോൾ അടച്ച് പൂട്ടലുകൾക്ക് വിധേയമായ ചില കാഴ്ചകളും കൗതുകങ്ങളും നമുക്ക് ചുറ്റുമുണ്ട്. അതിലൊന്നാണ് ലോകത്തിലെ ഏറ്റവും വലിയ ശിവലിംഗമായ ചെങ്കൽ മഹേശ്വരം ശിവപാർവതി ക്ഷേത്രത്തിലെ ശിവലിംഗ കാഴ്ച. ഏകദേശം ഒന്നര വർഷങ്ങൾക്കു മുൻപുവരെ ചെങ്കൽ മഹേശ്വരം ശിവപാർവതി ക്ഷേത്രത്തിലെ മഹാ ശിവലിംഗത്തിൻ്റെ വിസ്മയക്കാഴ്ചകൾ കാണാൻ ജനപ്രവാഹമായിരുന്നു. സ്വദേശികൾ മാത്രമല്ല വിദേശികളും ഒരുപോലെ തന്നെ ഈ 111 അടി ഉയരമുള്ള ശിവലിംഗത്തിന്റെ മനോഹര കാഴ്ചകൾ കൗതുകത്തോടെ ആസ്വദിക്കും. എന്നാൽ കൊറോണാ വൈറസിൻ്റെ രൂക്ഷ വ്യാപനം കൊണ്ട് ശിവലിംഗ കാഴ്ചകൾ കാണാൻ എത്തുന്ന തീർഥാടകരുടെ വരവിനും നിയന്ത്രണം ഏർപ്പെടുത്തി. ദർശനത്തിന് എത്തുന്നവരെക്കാൾ കൂടുതലും കാഴ്ചകൾ കാണാനും ഫോട്ടോഗ്രാഫിക്കായി തിരക്കിടുന്നവരുമാണ് ഏറെയും.അതേസമയം കൊറോണ വൈറസിൻ്റെ രണ്ടാം തരംഗത്തിൽ സർക്കാർ ആരാധനാലയങ്ങൾക്കും തീർത്ഥാടക കേന്ദ്രങ്ങൾക്കും നിയന്ത്രണങ്ങൾ പ്രഖ്യാപിച്ചിരുന്നു. ഇളവുകൾ നൽകിയ പശ്ചാത്തലത്തിൽ കഴിഞ്ഞയാഴ്ച മുതൽ ക്ഷേത്രം വീണ്ടും ഭക്തജനങ്ങൾക്കായി തുറന്നു. എന്നാൽ, ശിവലിംഗ കാഴ്ചകൾ കാണാനോ ദർശനത്തിനോ ആളുകൾ ഒട്ടും എത്തുന്നില്ലെന്ന് ചെങ്കൽ മഹേശ്വരം ശിവപാർവതി ക്ഷേത്രത്തിലെ മഠാധിപതി മഹേശ്വരാനന്ദ സ്വാമി പറയുന്നു. വൈറസിൻ്റെ രണ്ടാംതരംഗ വ്യാപനം പൂർണമായും മാറിയിട്ടില്ല. എന്നിരുന്നാൽ തന്നെയും ക്ഷേത്രങ്ങളിൽ ഭക്തർക്ക് പ്രവേശനം അനുവദിച്ച സാഹചര്യത്തിൽ കൃത്യമായും മാനദണ്ഡങ്ങൾ പാലിച്ച് മാത്രമാണ് ദർശനത്തിന് അനുമതി നൽകിയിരിക്കുന്നത്. സാനിറ്റൈസർ നൽകിയും കൃത്യമായ പരിശോധന നടത്തിയുമാണ് ക്ഷേത്രത്തിനുള്ളിലേക്ക് ആളുകളെ കടത്തിവിടുന്നത്. നിലവിൽ നൂറിനകത്ത് വരുന്ന ആളുകൾ മാത്രമാണ് ദിവസേന ഇവിടെ എത്താറുള്ളത്. കഴിഞ്ഞ കാലങ്ങളെ അപേക്ഷിച്ച് ഇത് നന്നേ കുറവുള്ള സംഖ്യയാണ്.