ബിജെപിയുടെ എ പ്ലസ് മണ്ഡലത്തില്‍ കോണ്‍ഗ്രസ് സുധീരനെ ഇറക്കുമോ? വട്ടിയൂര്‍ക്കാവില്‍ പുതിയ സാധ്യതകള്‍

ബിജെപി ഏറ്റവും വിജയ സാധ്യതയുള്ള എ പ്ലസ്‌ കാറ്റഗറിയില്‍ വട്ടിയൂര്‍ക്കാവിനെ ഉള്‍പ്പെടുത്തിയതിനാല്‍ ശക്തനായ സ്ഥാനാര്‍ത്ഥി വന്നാലെ വികെ പ്രശാന്തിനെ തകര്‍ത്ത് വിജയിക്കാനാകൂ എന്നാണ് യുഡിഎഫ് വിലയിരുത്തല്‍. കെ. മുരളീധരന്‍ എംപി സ്ഥാനം രാജിവച്ച് മല്‍സരിക്കാന്‍ താല്‍പര്യം പ്രകടിപ്പിച്ചെങ്കിലും എംപിമാര്‍ മത്സരിക്കേണ്ടെന്ന ഹൈക്കമാന്‍ഡ് തീരുമാനം വന്നതോടെ ആ നീക്കം ഉപേക്ഷിച്ചു. ഇതോടെയാണ് വി എം സുധീരന്റെയും ജിജി തോംസണ്‍ന്റെയും പേരുകള്‍ സജീവമായത്. എന്നാല്‍ തെരഞ്ഞെടുപ്പ് രാഷ്ട്രീയം അവസാനിപ്പിച്ചുവെന്ന വാക്കില്‍ മാറ്റമൊന്നുമില്ലെന്നാണ് സുധീരന്‍ പറയുന്നത്. സുധീരന്‍ മത്സരിക്കാന്‍ സാധ്യത കുറവാണെന്ന് അദ്ദേഹവുമായി അടുത്തു നില്‍ക്കുന്ന നേതാക്കളും പറയുന്നു. പക്ഷേ ഹൈക്കമാന്‍ഡ് നിര്‍ബന്ധിച്ചാല്‍ തീരുമാനം മാറ്റുമോ എന്ന് കണ്ടറിയണം.

സുധീരന്‍ മത്സരിച്ചില്ലെങ്കില്‍ മുന്‍ ചീഫ് സെക്രട്ടറി ജിജി തോംസണ്‍ ഇറങ്ങിയേക്കുമെന്നും പ്രചാരണമുണ്ട്. എന്നാല്‍ തന്നോട് ആരും അത്തരമൊരു കാര്യം സംസാരിച്ചിട്ടില്ലെന്നും

തെരഞ്ഞെടുപ്പ് രാഷ്ട്രീയത്തിലേക്ക് ഇറങ്ങേണ്ട സമയവും പ്രായവും കഴിഞ്ഞു പോയെന്നാണ് തന്റെ വിലയിരുത്തലെന്നുമാണ് ജിജി തോംസണ്‍ പറയുന്നത്. ഒരുകാലത്ത് കോണ്‍ഗ്രസിലെ പ്രധാന നേതാക്കള്‍ സീറ്റ് നേടാന്‍ ക്യൂ നിന്ന മണ്ഡലമായിരുന്നു ഇത്. എന്നാല്‍ ഇത്തവണ മത്സരിക്കാന്‍ വമ്പന്‍മാരാരും വട്ടിയൂര്‍ക്കാവിലേക്ക് ഇല്ല എന്ന സൂചനയാണ് നേതൃത്വം നല്‍കുന്നത്.

പരമ്പരാഗതമായി യുഡിഎഫിന് അനുകൂലമായ മണ്ഡലാണ് വട്ടിയൂര്‍ക്കാവ്. എന്നാല്‍ 2019ലെ വോട്ടിംഗ് ഘടനയിലെ മാറ്റങ്ങളും വി കെ പ്രശാന്ത് നേടിയ മികച്ച വിജയവുമാണ് യുഡിഎഫിനെ ആശങ്കയാകുന്നത്. 2011ലാണ് ഉള്ളൂര്‍, കടകംപള്ളി പഞ്ചായത്തുകള്‍ വേര്‍പെടുത്തി തിരുവനന്തപുരം നോര്‍ത്ത് വട്ടിയൂര്‍ക്കാവ് മണ്ഡലമായി മാറുന്നത്. പിന്നെ നടന്ന രണ്ട് തെരഞ്ഞെടുപ്പുകളിലും യുഡിഎഫ് സ്ഥാനാര്‍ഥി കെ മുരളീധരന്‍ വിജയിച്ചു. എന്നാല്‍ 2011ല്‍ 16167 ആയിരുന്ന മുരളിയുടെ ഭൂരിപക്ഷം 2016ല്‍ പകുതിയായി കുറഞ്ഞു. നിര്‍ണായകമായത് ബിജെപിയുടെ മുന്നേറ്റമാണ്. ക്ഷീണമുണ്ടായത് യുഡിഎഫിനും.

2001ല്‍ 35.8 ശതമാനമുണ്ടായിരുന്ന വോട്ട് 29.8 ശതമാനമായി കുറഞ്ഞു. വിജയിച്ചെങ്കിലും യുഡിഎഫിനും വലിയ നഷ്ടമുണ്ടായി. 50 ശതമാനം കിട്ടിയിരുന്നത് 37.8 ആയി. ബിജെപി 12 ശതമാനത്തില്‍ നിന്ന് 32.1 ശതമാനത്തിലേക്ക് കുതിച്ചു. 2016ലെ തെരഞ്ഞെടുപ്പില്‍ യുഡിഎഫ് 51,332, എന്‍ഡിഎ 43,700, എല്‍ഡിഎഫ് 40,441 എന്നിങ്ങനെയായിരുന്നു വട്ടിയൂര്‍ക്കാവിലെ വോട്ടുനില. 2019ല്‍ നിയമസഭാ ഉപതെരഞ്ഞെടുപ്പ് എത്തിയപ്പോള്‍ അത് എല്‍ഡിഎഫ് 51,332, യുഡിഎഫ് 40,465, എന്‍ഡിഎ 27,453 എന്ന സ്ഥിതിയിലേക്കെത്തി.