തിരുവനന്തപുരം: ആർസിസിയിലെ അറ്റകുറ്റപ്പണി നടന്നു കൊണ്ടിരുന്ന ലിഫ്ടിൽ നിന്നും വീണു പരിക്കേറ്റ യുവതിയെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. പത്തനാപുരം സ്വദേശി നജീറ (21)യാണ് ആശുപത്രിയിൽ ചികിത്സയിൽ കഴിയുന്നത്. ശനിയാഴ്ച രാവിലെയാണ് സംഭവം. ആർസിസിയിൽ ചികിത്സയിലുള്ള അമ്മയ്ക്ക് കൂട്ടിരിക്കാനാണ് നജീറ ആശുപത്രിയിലെത്തിയത്.
രാവിലെ പുറത്തേയ്ക്കിറങ്ങിയ നജീറ രണ്ടാമത്തെ നിലയിൽ ലിഫ്ടിൻ്റെ തുറന്ന കവാടത്തിലേയ്ക്ക് അബദ്ധത്തിൽ കയറി. അറ്റകുറ്റപ്പണി നടക്കുന്നതിനാൽ ലിഫ്ടിൻ്റെ പ്ലാറ്റ്ഫോം പലക കൊണ്ട് മറച്ചിരുന്നു. പലകയിൽ ചവിട്ടിയ ഉടൻ പലക മാറി നജീറ താഴേയ്ക്ക് പതിച്ചു. നട്ടെല്ലിനും കാലുകൾക്കും സാരമായി പരിക്കേറ്റ നജീറയെ മെഡിക്കൽ കോളേജ് ആശുപത്രിയിലേയ്ക്ക് മാറ്റി. യുവതി 20-ാം വാർഡിൽ ചികിത്സയിലാണ്. അശ്രദ്ധയോടെ ലിഫ്ടിൻ്റെ വാതിൽ തുറന്നിട്ട് അപകടത്തിന് ഇടയാക്കിയതിന് ജീവനക്കാരനെ അന്വേഷണ വിധേയമായി സസ്പെൻ്റ് ചെയ്തു.