116 Days After Movie Theaters Closed; Employees In Distress
സിനിമ തിയേറ്ററുകള്‍ അടച്ചിട്ട് 116 ദിവസം; ജീവനക്കാര്‍ ദുരിതത്തില്‍...
കൊറോണ വൈറസ് വ്യാപനത്തെത്തുടര്‍ന്നു സിനിമാ തിയേറ്ററുകള്‍ അടച്ചുപൂട്ടിയിട്ടു 116 ദിനം. മള്‍ട്ടിപ്ലക്‌സുകള്‍ ഉള്‍പ്പെടെ അറുന്നൂറ്റി അമ്പതോളം തിയേറ്ററുകളാണ് അടച്ച് പൂട്ടിയത്.
തൃശൂര്‍: കൊറോണ വൈറസ് വ്യാപനത്തെത്തുടര്‍ന്നു സിനിമാ തിയേറ്ററുകള്‍ അടച്ചുപൂട്ടിയിട്ടു 116 ദിനം. മള്‍ട്ടിപ്ലക്‌സുകള്‍ ഉള്‍പ്പെടെ അറുന്നൂറ്റി അമ്പതോളം തിയേറ്ററുകളാണ് അടച്ച് പൂട്ടിയത്. ആയിരക്കണക്കിന് വരുന്ന ജീവനക്കാരുടെ ജീവിതം വഴിമുട്ടിയ അവസ്ഥയില്‍. സൂപ്പര്‍ ഹിറ്റ് സിനിമകള്‍ നൂറ് ദിനങ്ങള്‍ പ്രദര്‍ശിപ്പിച്ചതിന്റെ ആഘോഷങ്ങള്‍ കണ്ട തിയേറ്റര്‍ ഉടമകളും ജീവനക്കാരും ചരിത്രത്തില്‍ സമാനതകളില്ലാത്ത ദുരിതത്തിനു മുന്നില്‍ പകച്ചുനില്‍ക്കുന്നു.
ചെറുതും വലുതുമായ തിയേറ്ററുകളില്‍ നാലായിരത്തോളം വരുന്ന ജീവനക്കാരാണുള്ളത്. ടിക്കറ്റ് കൗണ്ടറില്‍ ജോലി ചെയ്യുന്നവര്‍ മുതല്‍ ടിക്കറ്റ് കളക്ട് ചെയ്യുന്നവര്‍, കാന്റീന്‍ ജീവനക്കാര്‍, പോസ്റ്റര്‍ ഒട്ടിക്കുന്നവര്‍, പോസ്റ്റര്‍ ഡിസൈന്‍ ചെയ്യുന്നവര്‍, പോസ്റ്റര്‍ പ്രിന്റ് ചെയ്യുന്നവര്‍, ഫ്‌ളക്‌സ് കെട്ടുന്നവര്‍, സാറ്റലൈറ്റ് മേഖലയിലുള്ളവര്‍, വിതരണക്കമ്പനികള്‍, റെപ്രസെന്ററ്റീവ്‌സ്, ക്ലീനിങ്ങ് തൊഴിലാളികള്‍ തുടങ്ങിയവര്‍ ഇതില്‍ ഉള്‍പ്പെടും.
മൂന്നു മാസത്തിലേറെയായി വരുമാനം നിലച്ച കുടുംബങ്ങളുടെ ജീവിതം ചോദ്യചിഹ്നമായി മാറിയെങ്കിലും സഹായങ്ങളില്ല. ഭീമമായ സംഖ്യ ലോണ്‍ എടുത്ത് തിയേറ്റര്‍ നടത്തിയിരുന്ന ഉടമകള്‍ ലോണിന്റെ തിരിച്ചടവ്, വൈദ്യുതി ചാര്‍ജ് തുടങ്ങിയവയ്ക്ക് പണം കണ്ടെത്താനാകാതെ നെട്ടോട്ടത്തിലാണ്. പല തിയേറ്ററുകളിലും പ്രൊജക്ട്‌റുകള്‍ ആഴ്ചയില്‍ രണ്ട് ദിവസമെങ്കിലും പ്രവര്‍ത്തിപ്പിക്കേണ്ടതുണ്ട്. ഇല്ലെങ്കില്‍ പ്രൊജക്ടറിന് കേടുപാടുകള്‍ ഉണ്ടാകാനുള്ള സാധ്യത ഏറെയാണെന്ന് പറയുന്നു. Also Read: പുതുതായി പണിയുന്ന വീട്ടില്‍ കഞ്ചാവ് ശേഖരം; യുവാവിനെ കാത്തിരുന്ന് പിടികൂടി പോലീസ്‌
കൂടാതെ ജനറേറ്ററും രണ്ടോ, മൂന്നോ വട്ടം പ്രവര്‍ത്തിക്കേണ്ടി വരുന്നുണ്ട്. വരുമാനം പൂര്‍ണമായും നിലച്ച അവസ്ഥയില്‍ ഇതിനെല്ലാമുള്ള പണം കണ്ടെത്താന്‍ തിയേറ്റര്‍ ഉടമകള്‍ ഏറെ ബുദ്ധിമുട്ടാണ് അനുഭവിക്കുന്നത്. കൂടാതെ പുതിയ റിലീസ് ചിത്രങ്ങള്‍ക്കായി നല്‍കിയ പണം തിരിച്ച് കിട്ടാത്ത സ്ഥിതിയിലുമാണ്. തിയേറ്ററുകള്‍ പൂരപ്പറമ്പാകുന്ന വേനലവധിയും വിഷുവും ഈസ്റ്ററും ചെറിയ പെരുന്നാളും കഴിഞ്ഞുപോയി. ഇനി തിയേറ്ററുകള്‍ തുറന്നാല്‍ തന്നെ എന്താകുമെന്ന ആശങ്കയും തിയേറ്റര്‍ ഉടമകള്‍ക്കും തൊഴിലാളികള്‍ക്കുമുണ്ട്. ആരാധനാലയങ്ങളിലുള്‍പ്പെടെ ആളുകളെ പ്രവേശിപ്പിക്കുന്നതിന് അനുമതി നല്‍കിയ സര്‍ക്കാര്‍, സിനിമാ തിയേറ്ററുകളുടെ കാര്യത്തില്‍ എന്ന് അനുകൂല നിലപാട് സ്വീകരിക്കുമെന്ന കാത്തിരിപ്പിലാണ് ഉടമകള്‍ക്കൊപ്പം തൊഴിലാളികളും അവരുടെ കുടുംബാംഗങ്ങളും.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.
