17കാരിയെ വിവാഹം ചെയ്ത് 32കാരൻ; അറസ്റ്റിനിടെ വരൻ കൈ ഞരമ്പ് മുറിച്ചു, നാടകീയ രംഗങ്ങൾ

ചാലക്കുടി: 17 വയസുള്ള പ്ലസ് ടൂ വിദ്യാർഥിനിയെ വിവാഹം കഴിച്ച 32കാരൻ അറസ്റ്റിൽ. അറസ്റ്റിലായതിന് പിന്നാലെ പ്രതി കൈയ്യിലെ ഞരമ്പ് മുറിച്ച് ആത്മഹത്യക്ക് ശ്രമിച്ചു. ചാലക്കുടി സിത്താരനഗർ പണിക്കാട്ടിൽ വിപിൻ (32) ആണ് അറസ്റ്റിലായത്. വിപിനെതിരെ പോക്സോ കേസും ചുമത്തിയിട്ടുണ്ട്. കൈ ഞരമ്പ് മുറിച്ചതിനെ തുടർന്ന് താലൂക്ക് ആശുപത്രിയിൽ പ്രവേശിപ്പിച്ച് പ്രഥമശുശ്രൂഷ നൽകിയ ശേഷമാണ് വിപിന്‍റെ അറസ്റ്റ് രേഖപ്പെടുത്തിയത്.

Also Read: തീവ്രമതമൗലികവാദികളുമായി കോൺഗ്രസ് ചേരുന്നു, യുഡിഎഫിന് ലഭിച്ചത് അർഹിക്കുന്ന തിരിച്ചടി; കടുത്ത വിമർശനമുയർത്തി തൃശൂർ അതിരൂപത

വിപിൻ വിവാഹം ചെയ്ത പെൺകുട്ടി താൻ പീഡനത്തിന് ഇരയായതായി പോലീസിനോട് പറഞ്ഞു. മാടായിക്കോണം സ്വദേശിയാണ് പെൺകുട്ടി. ഇന്നലെ രാവിലെ 10 മണിയോടെയായിരുന്നു വിവാഹം നടന്നത്. പെൺകുട്ടിയുടെ അമ്മയും വിപിന്‍റെ മാതാപിതാക്കളും മറ്റൊരു ബന്ധുവും കേസിൽ പ്രതികളാണെന്ന് പോലീസ് പറഞ്ഞു. പോലീസ് കസ്റ്റഡിയിൽ എടുത്തപ്പോൾ വിപിൻ ശുചിമുറിയിൽ പോകണമെന്ന് പറഞ്ഞു. പോലീസ് പുറത്ത് കാവൽ നിന്നു. ഏറെ നേരമായിട്ടും വിപിൻ പുറത്തുവരാതിരുന്നതിനെ തുടർന്ന് ബലമായി വാതിൽ തുറന്നപ്പോഴാണ് വിപിനെ അവശനിലയിൽ കണ്ടെത്തി. കേസിലെ മറ്റ് പ്രതികളെ ഉടൻ അറസ്റ്റ് ചെയ്യുമെന്നാണ് പോലീസ് പറയുന്നത്.