കൊടുങ്ങല്ലൂരിൽ വൻ കഞ്ചാവ് വേട്ട; പുതുവത്സരാഘോഷത്തിനായി കൊണ്ട് വന്ന 10 കിലോ കഞ്ചാവ് പിടികൂടി

ചന്തപ്പുരയിൽ നിന്നും അഴിക്കോട് - എറിയാട് - കാര ഭാഗങ്ങളിലെ ന്യൂ ഇയർ ആഘോഷങ്ങൾക്ക് വേണ്ടിയാണ് കഞ്ചാവ് കൊണ്ട് വന്നത്. ഹാൻഡ് ബാഗിൽ അഞ്ച് കവറുകളിലായാണ് പത്ത് കിലോത്തോളം തൂക്കം വരുന്ന കഞ്ചാവ് സൂക്ഷിച്ചിരുന്നത്.

| Edited by Samayam Desk | Lipi 29 Dec 2020, 8:32 pm

തൃശൂർ: കൊടുങ്ങല്ലൂരിൽ വൻ കഞ്ചാവ് വേട്ട. പുതുവത്സരാഘോഷത്തിനായി കൊണ്ട് വന്ന പത്തു കിലോ കഞ്ചാവ് പിടികൂടി. കൊച്ചി തോപ്പുംപടി സ്വദേശി കണ്ടക്കാപ്പിള്ളി സനോജ് (26), തൊടുപുഴ മുട്ടം സ്വദേശി പുത്തൻപുരയ്ക്കൽ മുനീർ (25) എന്നിവരെയാണ് കൊടുങ്ങല്ലൂർ പോലീസ് അറസ്റ്റ് ചെയ്തത്. ചന്തപ്പുരയിൽ നിർത്തിയിട്ടിരിക്കുന്ന കാറിൽ കഞ്ചാവ് കൈമാറാൻ വന്നിട്ടുണ്ടന്ന രഹസ്യവിവരം റൂറൽ എസ്പി ആർ വിശ്വനാഥന് ലഭിച്ചതിനെ തുടർന്ന് നടന്ന പരിശോധനയിലാണ് പ്രതികൾ പിടിയിലായത്.

Also Read: ആംബുലന്‍സിലെ പീഡനം മുതല്‍ പോപ്പുലര്‍ ഫിനാന്‍സ് തട്ടിപ്പ് വരെ, പത്തനംതിട്ടയില്‍ സംഭവ ബഹുലമായ മുഹൂർത്തങ്ങൾ സമ്മാനിച്ച 2020

നിർത്തിയിട്ടിരുന്ന റിറ്റ്സ് കാറിന്‍റെ പുറകിലെ സീറ്റിന് അടിയിലായി പുറത്ത് നിന്ന് കാണാൻ കഴിയാത്ത വിധത്തിൽ ഒളിപ്പിച്ച നിലയിലായിരുന്നു കഞ്ചാവ്. ഹാൻഡ് ബാഗിൽ അഞ്ച് കവറുകളിലായാണ് പത്ത് കിലോത്തോളം തൂക്കം വരുന്ന കഞ്ചാവ് സൂക്ഷിച്ചിരുന്നത്. ചന്തപ്പുരയിൽ നിന്നും അഴിക്കോട് - എറിയാട് - കാര ഭാഗങ്ങളിലെ ന്യൂ ഇയർ ആഘോഷങ്ങൾക്ക് വേണ്ടിയാണ് കഞ്ചാവ് കൊണ്ട് വന്നത്. ഇരിങ്ങാലക്കുട ഡിവൈഎസ്പി ടിആർ രാജേഷിന്‍റെ നിർദ്ദേശത്തെ തുടർന്ന് കൊടുങ്ങല്ലൂർ ഇൻസ്പെക്ടർ പികെ പത്മരാജൻ, എസ്ഐ ഇആർ ബൈജു എന്നിവരുടെ നേതൃത്വത്തിലുള്ള അന്വേഷണ സംഘമാണ് പ്രതികളെ പിടികൂടിയത് .

Also Read: പറളിക്കുന്ന് കൊലപാതകം; പ്രതികളുടെ സഹോദരന്‍റെ മരണത്തില്‍ ദുരൂഹത, അന്വേഷണം തൃപ്തികരമല്ലെന്ന് ആക്ഷന്‍ കൗണ്‍സില്‍

അഴീക്കോട് എറിയാട് തീരദേശ മേഖലകളിൽ ലഹരി ഉപയോഗം വർധിച്ചത് മൂലം 15 വയസിനും 30 വയസിനും ഇടയിലുള്ള നിരവധി പേർ മനോരോഗികളെ പോലെ പെരുമാറുകയും രക്ഷിതാക്കളേയും കുടുംബാംഗങ്ങളേയും ആക്രമിക്കുകയും ചെയ്യുന്നതായി നിരവധി പരാതികൾ ലഭിച്ചതിനെ തുടർന്ന് കൊടുങ്ങല്ലൂർ ഇൻസ്പെക്ടർ പികെ പത്മരാജന്‍റെ നേതൃത്വത്തിൽ അന്വേഷങ്ങൾ നടക്കുകയായിരുന്നു. എ എസ് ഐ പ്രദീപ്, പോലീസുകാരായ ബിജു, ഫൈസൽ, ദിലീപ്, പ്രദീഷ്, റിയാസുദ്ദീൻ എന്നിവരും അന്വേഷണ സംഘത്തിൽ ഉണ്ടായിരുന്നു. പ്രതികൾ സഞ്ചരിച്ച കാറും പോലീസ് കസ്റ്റഡിയിൽ എടുത്തിട്ടുണ്ട്. പ്രതി സനോജ് ടൂറിസ്റ്റ് ബസ്സിലെ ഡ്രൈവറാണ്. ഇയാൾ ഒഡീഷയിൽ നിന്നുമാണ് കഞ്ചാവ് എത്തിച്ചത്. തീരദേശ മേഖലകളിലെ ഇവരുടെ വിതരണക്കാരെ പറ്റിയും അന്വേഷിച്ചു വരികയാണെന്ന് ഇൻസ്പെക്ടർ പത്മരാജൻ അറിയിച്ചു.

തൃശ്ശൂർ ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ
തൃശ്ശൂർ ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ

കൊടുങ്ങല്ലൂരിൽ വൻ കഞ്ചാവ് വേട്ട; പുതുവത്സരാഘോഷത്തിനായി കൊണ്ട് വന്ന 10 കിലോ കഞ്ചാവ് പിടികൂടി

ആര്‍ട്ടിക്കിള്‍ ഷോ