കുന്നംകുളം എസിപിയും 6 പോലീസുകാരും നിരീക്ഷണത്തില്‍; ഈസ്റ്റ് പോലീസ് സ്റ്റേഷനിലെ 14 പോലീസുകാരുടെ ഫലം നെഗറ്റീവ്

തൃശൂര്‍: പ്രതിക്ക് കൊവിഡ് സ്ഥിരീകരിച്ചതോടെ നിരീക്ഷണത്തില്‍ കഴിയുന്ന തൃശൂര്‍ നഗരത്തിലെ ഈസ്റ്റ് എസ്ഐ അടക്കം 14 പോലീസുകാരുടെ പരിശോധനാഫലം നെഗറ്റീവ്. കഴിഞ്ഞദിവസം പ്രതിയെ പിടിച്ച പോലീസ് സംഘത്തില്‍പെട്ടവര്‍ക്കാണ് നിരീക്ഷണത്തില്‍ പോകേണ്ടിവന്നത്. പ്രതിയെ അറസ്റ്റുചെയ്തതുമായി ബന്ധപ്പെട്ടാണ് സമ്പര്‍ക്കമുണ്ടായത്. 50 വയസിനു മുകളില്‍ ഉള്ള 10 പോലീസുകാരോടും നിരീക്ഷണത്തിനു പോകാന്‍ നിര്‍ദേശിച്ചിരുന്നു. ഇതുള്‍പ്പെടെ 24 പോലീസുകാരാണ് നിരീക്ഷണത്തിലിരുന്നത്.

Also Read: എറണാകുളത്ത് 9 കൊവിഡ് രോഗികളുടെ അവസ്ഥ അതീവ ഗുരുതരം; 4 നാവികർക്ക് കൂടി കൊവിഡ്!

പോലീസുകാരുടെ സ്രവ പരിശോധനാ ഫലം ഇന്നലെ ലഭിച്ചു. എല്ലാം നെഗറ്റീവ് ആയതോടെ പൊതുവേ ആശ്വാസമായി. കഴിഞ്ഞദിവസം കസ്റ്റഡിയിലെടുത്ത പ്രതിക്ക് കൊവിഡ് ബാധ സ്ഥിരീകരിച്ചതോടെയാണ് പ്രതിസന്ധിയുണ്ടായത്. മൊത്തം 24 പേരോടാണ് നിരീക്ഷണത്തില്‍ പോകാന്‍ നിര്‍ദേശിച്ചത്. തുടര്‍ന്നാണ് എസ്.ഐ.ക്ക് അടക്കം നിരീക്ഷണത്തില്‍ പോകേണ്ടിവന്നത്. അതേസമയം പരിശോധനാഫലം നെഗറ്റീവ് ആണെങ്കിലും എല്ലാവരും നിശ്ചിതകാലം നിരീക്ഷണത്തില്‍ തുടരേണ്ടിവരും.

ഈസ്റ്റ് പോലീസ് സ്റ്റേഷനില്‍ അണുനശീകരണം നടത്തി. എട്ടു പോലീസുകാരെ അടിയന്തരാവശ്യങ്ങള്‍ക്കായി പോലീസ് അക്കാദമിയില്‍നിന്നു വിട്ടുനല്‍കി. ആവശ്യമെങ്കില്‍ കൂടുതല്‍ പേരെ നിയോഗിക്കുമെന്ന് എസിപി വികെ രാജു അറിയിച്ചു. കൊവിഡ് സാമൂഹ്യ വ്യാപന സാഹചര്യത്തില്‍ കുന്നംകുളം സബ്ഡിവിഷനു കീഴിലെ പോലീസ് ഓഫീസര്‍മാര്‍ക്കും സിവില്‍ പോലീസുകാര്‍ക്കും നടത്തിയ ആന്‍റിബോഡി പരിശോധനയില്‍ പോസിറ്റീവ് ആയ എസിപിയും ആറ് പോലീസുകാരും നിരീക്ഷണത്തില്‍ പോയി. പോലീസ് അസോസിയഷന്‍റെ നേതൃത്വത്തില്‍ കുന്നംകുളം സബ്ഡിവിഷന്‍, ഗുരുവായൂര്‍ സബ്ഡിവിഷന്‍ എന്നിവിടങ്ങളിലെ 300 പോലീസുകാര്‍ക്ക് കുന്നംകുളം ബഥനി ഇംഗ്ലീഷ് മീഡിയം സ്‌കൂളില്‍ ഇന്നലെ ആന്‍റിബോഡി പരിശോധന നടത്തി. പരിശോധനയില്‍ എസിപി ഉള്‍പ്പെടെ വിവിധ പോലീസ് സ്റ്റേഷനിലെ പോലീസുകാര്‍ക്കും പോസിറ്റീവാണ് ഫലം.

പിന്നീട് ഇവര്‍ കുന്നംകുളം ഗവ. ആശുപത്രിയില്‍ ആന്‍റിജന്‍ പരിശോധനയ്ക്ക് വിധേയരായപ്പോള്‍ നെഗറ്റീവ് ഫലമാണ് കണ്ടത്. ഈ സാഹചര്യത്തിലാണ് എസിപിയുള്‍പ്പെടെയുള്ളവര്‍ നിരീക്ഷണത്തില്‍ പോയത്. ലക്ഷണമില്ലാതെ രോഗം വന്ന് പോയവരുടെ ആന്‍റിബോഡി പരിശോധനയിലാണ് പോസിറ്റീവ് ഫലം കാണുകയെന്ന് ആരോഗ്യ പ്രവര്‍ത്തകര്‍ പറഞ്ഞു. എന്നാല്‍ ആന്‍റിജന്‍ പരിശോധനയില്‍ നെഗറ്റീവ് കണ്ടതാണ് ആശയക്കുഴപ്പത്തിലാക്കിയത്. ഇതിനിടയിലും കുന്നംകുളം താലൂക്ക് ആശുപത്രിയില്‍ കൊവിഡ് പരിശോധന തുടരുകയാണ്.

Also Read: തലസ്ഥാനത്ത് ഭീതി അകലുന്നില്ല... സെക്രട്ടേറിയറ്റിലെ ജീവനക്കാരിക്കും കൊവിഡ്!

കഴിഞ്ഞ ദിവസങ്ങളിലായി കുറുക്കന്‍പ്പാറ, ചിറളയം പ്രദേശങ്ങളില്‍ നിന്നും ആളുകള്‍ക്ക് കൊവിഡ് സ്ഥിരീകരിച്ചതോടെ സ്രവം ശേഖരിച്ച് പരിശോധന നടത്തിയതില്‍ 37 പേര്‍ നെഗറ്റീവായി. പ്രദേശത്തെ കൂടുതല്‍ ആളുകളുടെ പരിശോധന നടത്തി വരികയാണ്. നിലവില്‍ 12 രോഗികളാണ് താലൂക്ക് ആശുപത്രി കൊറോണ വാര്‍ഡില്‍ ഉള്ളത്. അതില്‍ രണ്ടുപേര്‍ ഇന്നലെ രോഗവിമുക്തരായി വീടുകളിലേക്ക് മടങ്ങിയിട്ടുണ്ട്. നിലവില്‍ 70 പേരുടെ സ്രവമാണ് ഓരോ ദിവസവും ശേഖരിക്കുന്നത്. താലൂക്ക് പരിധിയിലുള്ള ചൊവ്വന്നൂര്‍, ആര്‍ത്താറ്റ്, കണ്ടാണശ്ശേരി, ചൂണ്ടല്‍, പേര്‍ക്കുളം, കടവല്ലൂര്‍, കടങ്ങോട് പ്രദേശങ്ങളില്‍ ഉള്ളവരുടെ പരിശോധനയും നടന്നുവരികയാണ്.