തൃശൂരില്‍ വീണ്ടും കൊവിഡ് മരണം; മരിച്ചത് നെന്‍മണിക്കര സ്വദേശിനി, 326 പേര്‍ക്ക് കൂടി രോഗം

തൃശൂര്‍: തൃശൂരില്‍ വീണ്ടും കൊവിഡ് മരണം. കൊവിഡ് ബാധിച്ച് ചികിത്സയിലായിരുന്ന വയോധിക മരിച്ചു. നെന്‍മണിക്കര ചിറ്റിശ്ശേരി പനയമ്പാടം തണ്ടിയേക്കല്‍ മേരി (64) ആണ് മരിച്ചത്. കിഡ്‌നി, ഹൃദയ സംബന്ധമായ അസുഖവും പ്രമേഹവും ഉണ്ടായിരുന്നു. പുതുക്കാട് കാഞ്ഞൂരിലെ വിവാഹ വീട്ടില്‍ നിന്ന് സമ്പര്‍ക്കത്തിലൂടെയാണ് മേരിക്ക് രോഗം പകര്‍ന്നത്. ബുധനാഴ്ച ശ്വാസതടസം നേരിട്ടതിനെ തുടര്‍ന്ന് മുളങ്കുന്നത്തുകാവ് മെഡിക്കല്‍ കോളേജ് ആശുപത്രിയില്‍ ചികിത്സയിലായിരുന്നു. വെള്ളിയാഴ്ച രാവിലെയാണ് മരിച്ചത്. സംസ്‌കാരം മുളയത്തുള്ള രൂപതയുടെ ക്രിമിറ്റോറിയത്തില്‍ നടക്കും. മേരിയുടെ വീട്ടുകാരും കൊവിഡ് ബാധിച്ച് ചികിത്സയിലാണ്. മക്കള്‍: ബൈജു, ബിജി, ബിജോയ്. മരുമക്കള്‍: സൗമ്യ, ജിയോ, സ്‌നേഹ.

Also Read: മികച്ച കൈപ്പുണ്യം, നിഷ്‌കാമകര്‍മി, ജ്ഞാനി; അവണപ്പറമ്പ് മഹേശ്വരന്‍ നമ്പൂതിരിപ്പാട് ഇനി ഓർമ്മ, വിട പറഞ്ഞത് കണ്ണൻ്റെ ആനകളുടെ വാത്സല്യ ഭിഷഗ്വരന്‍

അതേസമയം തൃശൂരില്‍ രോഗികള്‍ കുതിച്ചുയരുകയാണ്. വെള്ളിയാഴ്ച 326 പേര്‍ക്കാണ് കൊവിഡ് ബാധ. 142 പേര്‍ക്കു രോഗമുക്തി. സമ്പര്‍ക്കം വഴി 319 പേര്‍ക്കാണു രോഗം. അഞ്ചുപേരുടെ രോഗ ഉറവിടം അറിയില്ല. 8009 പേര്‍ക്ക് ഇതുവരെ രോഗബാധയുണ്ടായി. 5376 പേര്‍ രോഗമുക്തരായി ആശുപത്രി വിട്ടു. ചികിത്സയില്‍ കഴിയുന്നവരുടെ എണ്ണം 2553 ആണ്. തൃശൂര്‍ സ്വദേശികളായ 45 പേര്‍ മറ്റു ജില്ലകളില്‍ ചികിത്സയില്‍ കഴിയുന്നു.

Also Read: താപനില അളക്കാൻ റോബോട്ടിക് നഴ്‌സ്, ഭക്ഷണം വിളമ്പാൻ ഇ-ബൈക്ക്; തൃശൂരിലെ ഹൈടെക്ക് സിഎഫ്എല്‍ടിസിയിലെ കാഴ്ചകൾ

ഇന്നലെ രോഗം ബാധിച്ചവരിൽ 60 വയസിനു മുകളില്‍ 23 പുരുഷന്മാരും 20 സ്ത്രീകളുമുണ്ട്. 10 വയസിനു താഴെ 12 ആണ്‍കുട്ടികളും 13 പെണ്‍കുട്ടികളും രോഗം സ്ഥിരീകരിച്ചവരില്‍ ഉള്‍പ്പെടുന്നു. 734 പേര്‍ വീടുകളില്‍ ചികിത്സയില്‍ കഴിയുന്നുണ്ട്. 10029 പേര്‍ വീടുകളില്‍ നിരീക്ഷണത്തിലാണ്. 232 പേരേയാണ് ആശുപത്രിയില്‍ പുതിയതായി പ്രവേശിപ്പിച്ചത്. 1983 സാംപിളുകളാണ് ഇന്നലെ പരിശോധിച്ചത്. 1912 പേര്‍ക്ക് ഇന്നലെ ആൻ്റിജന്‍ ടെസ്റ്റ് നടത്തി. ഇതോടെ ആകെ പരിശോധിച്ച സാംപിളുകളുടെ എണ്ണം 123491 ആയി. റെയില്‍വേ സ്റ്റേഷനുകളിലും ബസ് സ്റ്റാന്‍ഡുകളിലുമായി 288 പേരെ ഇതുവരെ സ്‌ക്രീനിങ്ങിന് വിധേയമാക്കി.

Also Read: കവിയും ഗാനരചയിതാവുമായ റഫീഖ് അഹമ്മദ് തിരക്കഥാകൃത്താകുന്നു

തൃശൂർ ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ

തൃശൂർ ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ