Narendra Modi in Triprayar Temple: പ്രധാനമന്ത്രി തൃപ്രയാർ ക്ഷേത്രത്തിലേക്കും, 17ന് സന്ദർശിക്കുന്നത് രണ്ട് ക്ഷേത്രങ്ങൾ? സുരക്ഷാ പരിശോധന

തൃശൂ‍ർ: പ്രധാനമന്ത്രി നരേന്ദ്ര മോദി ഗുരുവായൂർ ക്ഷേത്രത്തിനു പുറമേ തൃപ്രയാർ ശ്രീരാമക്ഷേത്രത്തിലും ദർശനം നടത്തിയേക്കും. ഈ മാസം 17ന് നടനും ബിജെപി നേതാവുമായ സുരേഷ് ഗോപിയുടെ മകളുടെ വിവാഹച്ചടങ്ങിൽ പങ്കെടുക്കാനാണ് പ്രധാനമന്ത്രി ഗുരുവായൂരിലെത്തുന്നത്. ഗുരുവായൂർ ക്ഷേത്ര ദർശനത്തിനും വിവാഹച്ചടങ്ങിനും ശേഷം പ്രധാനമന്ത്രി റോഡ് മാർഗം തൃപ്രയാറിൽ എത്തിയേക്കുമെന്നാണ് വിവരം. ഇതിനു മുന്നോടിയായി പോലീസ് ഇന്ന് തൃപ്രയാർ ക്ഷേത്രത്തിൽ സുരക്ഷാ പരിശോധന നടത്തും. സുരേഷ് ഗോപിയുടെ മകൾ ഭാഗ്യ സുരേഷിൻ്റെ വിവാഹച്ചടങ്ങിൽ പങ്കെടുക്കുന്നതിനാണ് പ്രധാനമന്ത്രി ഗുരുവായൂർ ശ്രീകൃഷ്ണസ്വാമി ക്ഷേത്രത്തിൽ എത്തുന്നത്. 17ന് രാവിലെ എട്ടിന് പ്രധാനമന്ത്രി ശ്രീകൃഷ്ണ കോളേജ് ഗ്രൗണ്ടിലെ ഹെലിപാഡിൽ ഹെലികോപ്ടർ ഇറങ്ങും. റോഡ് മാർഗം 8:10ന് ശ്രീവത്സം ഗസ്റ്റ് ഹൗസിൽ എത്തും. 8:15ന് ക്ഷേത്ര ദർശനം നടത്തും. 20 മിനിറ്റ് നേരം ക്ഷേത്രത്തിൽ ചെലവഴിച്ച ശേഷം ക്ഷേത്രനടയിൽ 8:45ന് നടക്കുന്ന വിവാഹച്ചടങ്ങിൽ പങ്കെടുക്കും.


പ്രധാനമന്ത്രിയുടെ സന്ദർശനം പ്രമാണിച്ച് 17ന് ഗുരുവായൂർ ക്ഷേത്രത്തിൽ നിയന്ത്രണങ്ങൾ ഏർപ്പെടുത്തിയിട്ടുണ്ട്. 17ന് രാവിലെ ആറുമുതൽ ഒൻപത് വരെ മറ്റ് വിവാഹങ്ങൾ നടക്കില്ല. ഈ സമയം നിശ്ചയിച്ചിരുന്ന 48 വിവാഹങ്ങൾ പുലർച്ചെ അഞ്ചിനും ആറിനും ഇടയിൽ നടത്തും. വിവാഹ സംഘത്തിൽ 20 പേർക്ക് മാത്രമാണ് അനുമതി. ഇവർ ഫോട്ടോയും തിരിച്ചറിയൽ കാർഡിൻറെ പകർപ്പും നൽകി പോലീസിൽനിന്ന് പാസെടുക്കണം. കൂടാതെ, രാവിലെ ചോറൂൺ, തുലാഭാരം എന്നീ വഴിപാടുകൾ നടക്കില്ല.

Guruvayur Temple Wedding on 17 January: മോദിയുടെ സന്ദർശനം: ഗുരുവായൂരിൽ 48 വിവാഹങ്ങളുടെ സമയത്തിൽ മാറ്റം, ചോറൂണിനും തുലാഭാരത്തിനും നിയന്ത്രണം
16ന് വൈകുന്നേരമാണ് പ്രധാനമന്ത്രി കൊച്ചിയിൽ എത്തുക. 16ന് ആറുമണിക്ക് മഹാരാജാസ് കോളേജ് ഗ്രൗണ്ടിനു മുന്നിൽനിന്ന് പ്രധാനമന്ത്രിയുടെ റോഡ് ഷോ നടക്കും. ഹോസ്പിറ്റൽ റോഡ് വഴി എറണാകുളം ഗസ്റ്റ് ഹൗസിനു മുന്നിൽ റോഡ് ഷോ സമാപിക്കും. അന്നേ ദിവസം രാത്രിയിൽ വില്ലിങ്ടൺ ഐലൻഡിലെ താജ് ഹോട്ടലിൽ താമസിക്കും.

Narendra Modi Roadshow in Kochi: മഹാരാജാസ് ഗ്രൗണ്ടിൽനിന്ന് ഗസ്റ്റ് ഹൗസ് വരെ പ്രധാനമന്ത്രിയുടെ റോഡ് ഷോ; അര ലക്ഷം പേർ പങ്കെടുക്കുമെന്ന് ബിജെപി
17ന് രാവിലെ 11 മണിക്ക് മറൈൻഡ്രൈവിൽ ശക്തികേന്ദ്ര ഇൻ ചാർജുമാരുടെ സമ്മേളനത്തിലും പ്രധാനമന്ത്രി പങ്കെടുക്കും. ഈ മാസം രണ്ടാം തവണയാണ് പ്രധാനമന്ത്രി കേരളത്തിൽ എത്തുന്നത്. നേരത്തെ തൃശൂർ തേക്കിൻകാട് മൈതാനിയിൽ ബിജെപി സംഘടിപ്പിച്ച മഹിളാസമ്മേളനത്തിൽ പ്രധാനമന്ത്രി പങ്കെടുത്തിരുന്നു.

തൃശൂ‍ര്‍ ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം

Read Latest Local News and Malayalam News