തൃശൂർ( Thrissur): സംസ്ഥാന സർക്കാർ തീവ്രവാദ സംഘടനകളോടും പിസി ജോർജിനോടും സ്വീകരിക്കുന്നത് ഇരട്ട നീതിയെന്ന് ബിജെപി സംസ്ഥാന അധ്യക്ഷൻ കെ സുരേന്ദ്രൻ. കേന്ദ്രം രണ്ടുതവണ ഇന്ധന നികുതി കുറച്ചിട്ടും സംസ്ഥാന സർക്കാർ കുറക്കാത്തത് ധിക്കാരപരമായ നടപടിയാണ്. കേന്ദ്രം കുറച്ചതിന് പുറമെ സംസ്ഥാനവും നികുതി കുറയ്ക്കണമെന്നും സുരേന്ദ്രൻ ആവശ്യപ്പെട്ടു.
കേന്ദ്രം ഇന്ധനത്തിനു നികുതി വാങ്ങുമ്പോൾ കേരളത്തിന് ഒന്നും കിട്ടില്ലെന്ന് പച്ച കള്ളം പ്രചരിപ്പിച്ചവരാണ് പിണറായി വിജയനും ധനമന്ത്രിയും. അവരാണ് ഇപ്പോൾ കേന്ദ്രം കുറച്ചതിന് ആനുപാതികമായി വില കുറയ്ക്കുമെന്ന് പറയുന്നത്. കേന്ദ്ര നികുതിയിൽ 42 ശതമാനവും സംസ്ഥാനമാണ് കൊണ്ടുപോകുന്നത്. സംസ്ഥാന സർക്കാർ പ്രളത്തിന്റെ പേരിലും ജനങ്ങളിൽ നിന്നും സെസ് പിഴിയുകയാണ്. കേന്ദ്രം രണ്ടുതവണ കുറച്ചിട്ടും സംസ്ഥാന സർക്കാർ കുറക്കാത്തത് ധിക്കാരപരമായ നടപടിയാണ്.
കേന്ദ്രം കുറച്ചതിന് പുറമെ സംസ്ഥാനവും നികുതി കുറയ്ക്കണം. ഇത്രത്തോളം ജനദ്രോഹ നടപടികൾ സ്വീകരിക്കുന്ന ഒരു സർക്കാർ മുൻപുണ്ടായിട്ടില്ല. എല്ലാ സാഹചര്യങ്ങൾ ഉണ്ടായിട്ടും നികുതി കുറക്കില്ലെന്ന പിണറായി വിജയൻ സർക്കാരിന്റെ ധിക്കാരം വലിയ ജനകീയ പ്രക്ഷോഭം നേരിടേണ്ടി വരുമെന്നും കെ സുരേന്ദ്രൻ തൃശ്ശൂരിൽ പറഞ്ഞു. സിപിഎം - കോൺഗ്രസ് ബന്ധമുപേക്ഷിച്ചു ബിജെപിയിൽ ചേർന്നവർക്ക് തൃശൂർ ജില്ലാ കമ്മിറ്റി നൽകിയ സ്വീകരണ യോഗത്തിന് ശേഷം മാധ്യമങ്ങളോട് പ്രതികരിക്കുകയായിരുന്നു കെ സുരേന്ദ്രൻ.
Topic:K Surendran, PC George, PC George speech