തൃശൂര്‍: വാക്കുകള്‍ തെറ്റാതെ സംസാരിക്കാനോ, അക്ഷരങ്ങള്‍ കൂട്ടി വായിക്കാനോ പ്രായമായില്ലെങ്കിലും ആദര്ശ് നേടിയത് ഇന്ത്യന്‍ ബുക്ക് ഓഫ് റെക്കോര്‍ഡും, കലാം വേള്‍ഡ് റെക്കാര്‍ഡും. ഒരു വയസും പതിനൊന്ന് മാസവും മാത്രം പ്രായമുള്ള കണ്ടാണശ്ശേരി പന്നിശ്ശേരിയില്‍ വാടകയ്ക്ക് താമസിക്കുന്ന നിധീഷ്-ഈശ്വരി ദമ്പതികളുടെ മകനാണ് ആദര്ശ്. വിവിധതരം പച്ചക്കറികള്‍, തൊഴില്‍മേഖലകള്‍, കമ്പ്യൂട്ടറിന്റെ ഭാഗങ്ങള്‍, സ്വാതന്ത്ര്യ സമരസേനാനികള്‍, ദേശീയചിഹ്‌നങ്ങള്‍, ആഭരണങ്ങള്‍, വീട്ടുപകരണങ്ങള്‍, മെഡിക്കല്‍ ഉപകരണങ്ങള്‍, ഇന്ത്യയുടെ ചരിത്രപ്രധാനമായ സ്മാരകങ്ങള്‍, മൃഗങ്ങളും അവയുടെ ശബ്ദങ്ങളും, ഇലക്‌ട്രോണിക് ഉപകരണങ്ങള്‍, സംഗീത ഉപകരണങ്ങള്‍,
വ്യത്യസ്ത നൃത്ത രൂപങ്ങള്‍, എന്നിവയുടെയെല്ലാം ചിത്രങ്ങള്‍ തെറ്റുകൂടാതെ പറഞ്ഞതിനാണ് ഇന്ത്യന്‍ ബുക്ക് ഓഫ് റെക്കോര്‍ഡിനും, കലാം വേള്‍ഡ് റെക്കോര്‍ഡിനും ഈ മിടുക്കന്‍ അര്‍ഹനായത്.
മെയ് 16 ന് റെക്കോര്‍ഡിന് അര്‍ഹമാണെന്ന് അറിയിപ്പ് ലഭിച്ചു. കഴിഞ്ഞ ദിവസം റെക്കോര്‍ഡിന്റെ ഭാഗമായുള്ള സര്‍ട്ടിഫിക്കറ്റും, മെഡലുള്‍പ്പെടെയുള്ള മറ്റു സമ്മാനങ്ങളും ആദര്‍ശിനെ തേടിയെത്തുകയും ചെയ്തു. കിട്ടിയ അംഗീകാരത്തിന്റെ വലിപ്പമറിയാതെ ആദര്ശ് പുതിയ ചിത്രങ്ങള്‍ തിരിച്ചറിയാനുള്ള ശ്രമം തുടരുകയാണ്.