തൃശൂര്: കുന്നംകുളത്തിന് സമീപം മരത്തംകോട്, വെള്ളറക്കാട് പ്രദേശങ്ങളിലെ നാലു സ്ഥാപനങ്ങളില് പി.പി.ഇ. കിറ്റ് ധരിച്ചെത്തി മോഷണം. സ്ഥാപനങ്ങളിലെ നിരീക്ഷണ കാമറകളില് മോഷ്ടാവിന്റേയും ഇയാളുടെ സഹായിയുടേയും ദൃശ്യങ്ങള് പതിഞ്ഞിട്ടുണ്ട്. വെള്ളറക്കാട് എസ്.ആര്. സൂപ്പര് മാര്ക്കറ്റ്, പാദുവ മെഡിക്കല് ഷോപ്പ്, അല്ഷിഫ മെഡിക്കല് ഷോപ്പ്, മരത്തംകോട് സപ്ലൈകോ സൂപ്പര് മാര്ക്കറ്റ് എന്നീ സ്ഥാപനങ്ങളിലാണ് മോഷണം നടന്നിട്ടുള്ളത്. സ്ഥാപനങ്ങളിലെ ഷട്ടറുകളുടെ പൂട്ടുകള് തകര്ത്ത് അകത്തു കയറി മേശവലിപ്പുകള് കുത്തിത്തുറന്നാണ് മോഷണം നടത്തിയിട്ടുള്ളത്.
സപ്ലൈകോ സൂപ്പര് മാര്ക്കറ്റില്നിന്ന് 50,000 രൂപയും പാദുവ മെഡിക്കല് ഷോപ്പില്നിന്ന് പതിനായിരം രൂപയും കവര്ന്നു. മറ്റു സ്ഥാപനങ്ങളില് നിന്ന് ഭക്ഷ്യവസ്തുക്കളും മോഷ്ടിച്ചിട്ടുണ്ട്. കഴിഞ്ഞ ദിവസം പുലര്ച്ചെയാണ് മോഷണം നടന്നത്. പി.പി.ഇ. കിറ്റ് ധരിച്ചയാളാണ് മോഷണം നടത്തിയിട്ടുള്ളത്. സഹായി റോഡില് മാറി നില്ക്കുന്ന ദൃശ്യങ്ങള് കാമറയില് പതിഞ്ഞിട്ടുണ്ട്. എരുമപ്പെട്ടി ഇന്സ്പെക്ടര് കെ.കെ. ഭൂപേഷ്, കുന്നംകുളം അഡീഷണല് എസ്.ഐ. ഹേമലത എന്നിവരുടെ നേതൃത്വത്തില് പോലീസ് സ്ഥലത്തെത്തി അന്വേഷണം ആരംഭിച്ചു. മോഷ്ടാവ് പി.പി.ഇ. കിറ്റും ഗ്ലൗസും ധരിച്ചതും സഹായിയുടെ ദൃശ്യം അവ്യക്തമായതും പോലീസിനെ കുഴയ്ക്കുന്നുണ്ട്.