തൃശൂര്: ജില്ലയില് കാലവര്ഷം ശക്തിപ്രാപിക്കുന്നു. മിക്കയിടത്തും നല്ലരീതിയില് മഴ ലഭിച്ചു. മഴ ശക്തമായതോടെ തീരമേഖലയില് കടല്ക്ഷോഭം ശക്തമായി. പെരിങ്ങല്ക്കുത്ത് ഡാമിന്റെ ഒരു ഷട്ടര് തുറന്നു. എറിയാട് തീരമേഖലയില് കടല്ക്ഷോഭം പിന്നെയും രൂക്ഷമായി. ശക്തിയായ കടലാക്രമണത്തില് ജിയോ ബാഗ് തടയണകള് തകര്ന്നു. പ്രദേശത്തെ രണ്ടു വീടുകള് തകരുകയും നിരവധി കുടുംബങ്ങള് വെള്ളക്കെട്ടിലാവുകയും ചെയ്തു.
എറിയാട് മണപ്പാട്ട് പ്രദേശത്താണ് 50 മീറ്ററോളം ദൂരത്തില് തടയണ തകര്ന്നിട്ടുള്ളത്. കാലവര്ഷത്തെ തുടര്ന്നുള്ള കടല്ക്ഷോഭത്തെ പ്രതിരോധിക്കുന്നതില് ജിയോ ബാഗ് തടയണകള് തീരദേശവാസികള്ക്ക് ഒരു ആശ്വാസമായിരുന്നു. ശക്തമായ കടലാക്രമണം ഉള്ള പ്രദേശങ്ങളില് പഞ്ചായത്തിന്റെ നേതൃത്വത്തില് ജിയോ ബാഗ് ഉപയോഗിച്ച് തടയണ നിര്മ്മിച്ചിട്ടുണ്ട്. തടയണ ഇല്ലാത്ത ഭാഗങ്ങളില് ജിയോ ബാഗ് ഉപയോഗിച്ച് തടയണ നിര്മ്മാണം പുരോഗമിക്കുന്നതിനിടയിലാണ് കടല്ക്ഷോഭം വീണ്ടും രൂക്ഷമായത്.
Also Read: തൃശൂര് ജില്ലയില് 6 പേര് രോഗമുക്തരായി; ചൊവ്വാഴ്ച 10 പേര്ക്ക് കൂടി രോഗം സ്ഥിരീകരിച്ചു, 183 പേര് ജില്ലയില് ചികിത്സയില്!
മണ്ണഞ്ചേരി ഇബ്രാഹിം, വടക്കുംപുറത്ത് ഇബ്രാഹിം എന്നിവരുടെ വീടുകളാണ് തകര്ന്നത്. ഇതില് ഒരു കുടുംബം ബന്ധുവീട്ടിലേക്കും ഒരു കുടുംബത്തെ എറിയാട് എ എം ഐ യു പി സ്കൂളില് ആരംഭിച്ച ദുരിതാശ്വാസ ക്യാമ്പിലേക്കും മാറ്റിപ്പാര്പ്പിച്ചിട്ടുണ്ട്. കാലവര്ഷം കനത്തതോടെ പെരിങ്ങല്ക്കുത്ത് ഡാമിന്റെ ഒരു ഷട്ടര് തുറന്നു. ദുരന്തനിവാരണ അതോറട്ടിയുടെ നിര്ദ്ദേശപ്രകാരം കലക്ടറാണ് ഡാം തുറക്കാന് ഉത്തരവിട്ടത്. 2018ലെ പ്രളയത്തില് ഡാമിന്റെ ഒരു ഷട്ടറിന് കേടുപാട്
സംഭവിച്ചിരുന്നു. ഇത് നന്നാക്കിയിട്ടില്ല.
ഷട്ടറുകള് തുറന്നുവച്ചിരിക്കുന്നതിനാല് വൃഷ്ടി പ്രദേശത്തിലെ മഴയ്ക്കനുസരിച്ച് ജലനിരപ്പ് 419.41 മീറ്ററില് എത്തുമ്പോള് അധികജലം ചാലക്കുടി പുഴയിലേക്ക് ഒഴുകും. പുഴയിലെ ജലനിരപ്പ് 418 മീറ്റര് ആയതിനെ തുടര്ന്ന് നേരത്തെ ഓറഞ്ച് അലേര്ട്ട് പുറപ്പെടുവിച്ചിരുന്നു. ചാലക്കുടി പുഴയില് പൊതുജനങ്ങളും കുട്ടികളും ഇറങ്ങുന്നതിനും കുളിക്കുന്നതിനും വസ്ത്രങ്ങള് അലക്കുന്നതിനും ഫോട്ടോ എടുക്കുന്നതിനും നിയന്ത്രണം ഏര്പ്പെടുത്തിയിട്ടുണ്ട്. പുഴയില് മത്സ്യബന്ധനത്തിന് കര്ശന നിയന്ത്രണമുണ്ടാവും.
പുഴയുടെ തീരത്തുള്ള വിനോദ സഞ്ചാര കേന്ദ്രങ്ങളില് വിനോദ സഞ്ചാരികള്ക്ക് പൂര്ണ നിയന്ത്രണം ഏര്പ്പെടുത്തും. കര്ശന സുരക്ഷയും ഒരുക്കും. അടിയന്തര സാഹചര്യം നേരിടുന്നതിന് റൂറല്, സിറ്റി ജില്ലാ പോലീസ് മേധാവികള്ക്കും ചാലക്കുടി, വാഴച്ചാല് ഡിഎഫ്ഒമാര്ക്കും ജില്ലാ ഫയര് ഓഫീസര്ക്കും നിര്ദേശം നല്കി. പുഴയിലെ ജലനിരപ്പ് ഉയരുന്നത് സംബന്ധിച്ച് പൊതുജനങ്ങള്ക്ക് മുന്നറിയിപ്പ് നല്കാന് ചാലക്കുടി നഗരസഭാ സെക്രട്ടറിക്കും അതിരപ്പിള്ളി, പരിയാരം, മേലൂര്, കാടുകുറ്റി, അന്നമനട, കുഴൂര്, കൊരട്ടി ഗ്രാമപഞ്ചായത്ത് സെക്രട്ടറിമാര്ക്കും നിര്ദേശം നല്കി.