തൃശൂര്: വേനല്മഴ ലഭിക്കാത്തതിനാല് തോടുകള് വറ്റി വരണ്ട പരൂര് പടവിലെ 900 ഏക്കര് നെല്കൃഷി ഉണക്ക് ഭീഷണിയില്. 20 ദിവസം കൂടി മൂപ്പെത്താന് വേണ്ട ജ്യോതി നെല്ക്കതിരുകളാണ് വെള്ളം ലഭിക്കാതെ കരിഞ്ഞുണങ്ങുന്നത്. ഇതുമൂലം രണ്ടര കോടിയിലധികം രൂപയുടെ നഷ്ടമാണ് കര്ഷകര് നേരിടേണ്ടി വരിക. ഒരു ഏക്കറിന് മുപ്പതിനായിരം രൂപയോളം ചെലവഴിച്ചാണ് ഓരോ കര്ഷകരും കൃഷിയിറക്കിയത്.
പാടശേഖരത്തിലെ വെള്ളം പമ്പ് ചെയ്ത് വറ്റിക്കാന് വൈകിയതാണ് ഇത്തവണത്തെ കൃഷിയിറക്കാന് കാലതാമസം നേരിട്ടതെന്ന് കര്ഷകര് പറയുന്നു. തൊട്ടടുത്തുള്ള ഉപ്പുങ്ങല് പടവില് നേരത്തെ കൃഷിയിറക്കിയതിനാല് ഈ പാടശേഖരങ്ങളിലെ കൊയ്ത്ത് കഴിയാറായി. പടവ് കമ്മിറ്റിയുടെ അനാസ്ഥയാണ് കൃത്യ സമയത്ത് കൃഷിയിറക്കാന് കഴിയാതെ പോയതെന്ന് കര്ഷകര് പരാതിപ്പെടുന്നു.
Also Read: കൊവിഡ്-19: 15,000 പാട്ടുകള് ഹൃദിസ്ഥമാക്കി ക്യാമ്പിലെ താരമായി വയനാടിന്റെ വാനമ്പാടി
ഇനിയുള്ള ദിവസങ്ങളില് മഴ പെയ്തില്ലെങ്കില് കതിരുകളെല്ലാം പതിരായി മാറുകയും കരിഞ്ഞുണങ്ങിയ നെല്ച്ചെടികളില്നിന്ന് വൈക്കോലുപോലും ലഭിക്കാതെ വരുമെന്ന ആശങ്കയിലാണ് കര്ഷകര്. വലിയ വിളവ് പ്രതീക്ഷിച്ച് ലോണെടുത്തും സ്വര്ണം വിറ്റുമാണ് കര്ഷകര് ഇത്തവണ കൃഷിയിറക്കിയത്. രണ്ട് പ്രളയവും ബണ്ട് പൊട്ടലും അതിജീവിച്ച് കൃഷിയിറക്കിയ തങ്ങളുടെ കണ്ണീരൊപ്പാന് കൃഷി വകുപ്പോ, ജനപ്രതിനിധികളോ പടവ് കമ്മിറ്റിയോ ഇവിടേക്ക് തിരിഞ്ഞുനോക്കിയിട്ടില്ലെന്ന് കര്ഷകര് പരാതിപ്പെട്ടു.