മുത്തങ്ങ ആനപ്പന്തിയില്‍ ആനയൂട്ട്; കുട്ടിയാനകൾക്കും കുംകിയാനകൾക്കും വിഭവസമൃദ്ധമായ ഭക്ഷണം!

മുത്തങ്ങ: കൊവിഡ് നിയന്ത്രണങ്ങള്‍ക്കിടയിലും മുത്തങ്ങയില്‍ ആനയൂട്ട് നടത്തി. പുറമേ നിന്നുള്ള ആളുകള്‍ക്ക് നിയന്ത്രണമേര്‍പ്പെടുത്തിക്കൊണ്ട് ലളിതമായ രീതിയിലായിരുന്നു ഇത്തവണ ആനയൂട്ട് നനടത്തിയത്. സംസ്ഥാന വനം-വന്യജീവി വകുപ്പ് വന്യജീവി വാരാഘോഷത്തിൻ്റെ ഭാഗമായി ഒക്ടോബര്‍ നാല് ഗജദിനമായി ആചരിക്കുന്നതിന്റെ ഭാഗമായാണ് ഇത്തവണയും മുത്തങ്ങയില്‍ ആനയൂട്ട് നടത്തിയത്.

Also Read: ആരെയും അമ്പരപ്പിക്കും ഈ സർക്കാർ കെട്ടിടം! നാലുകെട്ട് മാതൃക... കൊട്ടാരം പോലെ പനമരം ബ്ലോക്ക് പഞ്ചായത്ത് കാര്യാലയം, ചിത്രങ്ങൾ

മുത്തങ്ങ ആനപന്തിയിലെ പത്ത് ആനകള്‍ക്കായാണ് ഇത്തവണ ചടങ്ങ് നടത്തിയത്. പന്തിയിലെ കുട്ടിയാനകളായ അമ്മു, ചന്തു എന്നിവയ്ക്കു പുറമേ കുംകിയാനകളായ പ്രമുഖ, കുഞ്ചു, സൂര്യ, വിക്രം, ഭരത്, ഉണ്ണികൃഷ്ണന്‍, ചന്ദ്രനാഥ്, സുന്ദരി എന്നീ ആനകള്‍ക്കുമാണ് ആനയൂട്ട് നടത്തിയത്. സാധാരണ കൊടുക്കുന്ന ഭക്ഷണത്തിന് പുറമേ പഴവര്‍ഗങ്ങളും മധുര പലഹാരങ്ങളും അടങ്ങിയ ഭക്ഷണമായിരുന്നു ആനകള്‍ക്ക് നല്‍കിയത്. പരിപാടിക്ക് എലിഫന്റ് റെയ്ഞ്ച് ഓഫീസര്‍ ആഷിക്, ബത്തേരി അസിസ്റ്റന്‍ വൈല്‍ഡ് ലൈഫ് വാര്‍ഡന്‍ രമ്യ തുടങ്ങിയവര്‍ നേതൃത്വം നല്‍കി.

Also Read: ആ വാർത്ത വ്യാജം, ഞങ്ങൾ പട്ടിണിയിലല്ല... മനസ് തുറന്ന് കൊമ്പൻമൂലയിലെ ആദിവാസി കുടുംബം!

മുന്‍കാലങ്ങളില്‍ മുത്തങ്ങയിലെ ആനയൂട്ട് വളരെ നല്ല രീതിയില്‍ നടത്താറുണ്ടായിരുന്നെങ്കിലും കൊവിഡ് നിയന്ത്രണങ്ങളുടെ ഭാഗമായി നിരോധനാജ്ഞയടക്കം നിലനില്‍ക്കുന്നതിനെ തുടര്‍ന്നാണ് പുറമേ നിന്നും ആരെയും പ്രവേശിപ്പിക്കാതെ ലളിതമായി ചടങ്ങ് നടത്തിയത്. ചടങ്ങുകള്‍ ലളിതമായിരുന്നെങ്കിലും ആനക്കായി ഒരുക്കിയ വിഭവങ്ങള്‍ സമൃദ്ധമായിരുന്നു. മുത്തങ്ങ വന്യജീവി സങ്കേതത്തിന്റെ കവാടത്തിന് സമീപത്തായാണ് വയനാട്ടിലെ ഏറ്റവും പ്രശസ്തമായ മുത്തങ്ങ ആനപ്പന്തി സ്ഥിതി ചെയ്യുന്നത്. ചടങ്ങില്‍ പങ്കെടുത്ത പ്രമുഖയും കുഞ്ചുവടക്കമുള്ള കുംകിയാനകള്‍ ശല്യക്കാരായ കാട്ടാനകളെ പിടികൂടുന്നതിനും മറ്റും ഉപയോഗപ്പെടുത്തുന്ന ആനകളാണ്.




വയനാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ

വയനാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ