കല്പ്പറ്റ: ജില്ലാ ആസ്ഥാനത്ത് നിന്നും ബാണാസുരസാഗര് ഡാം അടക്കമുള്ള ടൂറിസം കേന്ദ്രത്തിലേക്ക് പോകുന്ന പ്രധാനപാതയായ കല്പ്പറ്റ-വാരാമ്പറ്റ റോഡ് നിര്മ്മാണം ഇഴഞ്ഞുനീങ്ങുന്നത് പ്രദേശവാസികള്ക്ക് ദുരിതമായി മാറുന്നു. ഡിസംബര് 31ന് റോഡ് പണി പൂര്ത്തിയാക്കുമെന്ന അധികൃതരുടെ ഉറപ്പ് പാഴ്വാക്കായി മാറുമെന്ന് ഉറപ്പായി. ഈ വര്ഷം അവസാനിക്കാന് വെറും ഏഴ് ദിവസങ്ങള് മാത്രം ബാക്കിയുള്ളപ്പോള് റോഡ് പ്രവൃത്തി ഇനിയും നീളുമെന്ന് ഉറപ്പായി കഴിഞ്ഞു.
റോഡിന്റെ പ്രവര്ത്തി ആരംഭിച്ച് ഒന്നരവര്ഷം കഴിഞ്ഞിട്ടും പാതിവഴിയില് പോലുമെത്തിയിട്ടില്ലെന്നതാണ് വാസ്തവം. നിര്മ്മാണം കഴിഞ്ഞ ഭാഗത്ത് ഡ്രൈനേജിന്റെയും, വൈദ്യുതിപോസ്റ്റുകള് മാറ്റുന്നതടക്കമുള്ള പ്രവൃത്തികള് ഇനിയും പൂര്ത്തിയാകാനുമുണ്ട്. കിഫ്ബി മുഖേന തുക വകയിരുത്തി നിര്മ്മിക്കുന്ന റോഡാണ് ഇപ്പോള് പ്രദേശവാസികള്ക്ക് ദുരിതമായി മാറിയിരിക്കുന്നത്. പൊടിശല്യത്താല് പൊറുതിമുട്ടിയ ജനങ്ങള് ഇനിയെന്ത് ചെയ്യണമെന്ന്
അറിയാത്ത അവസ്ഥയിലാണ്. ഡിസംബര് ആദ്യവാരത്തില് ടാറിങ് പ്രവൃത്തികള് പൂര്ത്തിയാക്കുമെന്ന് പറഞ്ഞിരുന്നെങ്കിലും അതിനുള്ള ഒരു നടപടികളും ഇതുവരെ ആരംഭിച്ചിട്ടില്ല. പൊടിശല്യം കാരണം നിരവധി പേര്ക്ക് ആരോഗ്യ പ്രശ്നങ്ങളും രൂക്ഷമായിട്ടുണ്ട്.
ടാങ്കറുകള് ഉപയോഗിച്ച് ഇടക്ക് നനക്കുന്നുണ്ടെങ്കിലും പതിനഞ്ച് കിലോമീറ്ററോളം വരുന്ന റോഡില് ഇത് പ്രായോഗികമാവുന്നില്ലെന്നാണ് വാസ്തവം. റോഡിന്റെ ആദ്യഘട്ടത്തില് കല്പ്പറ്റ മുതല് പിണങ്ങോട് വരെയുള്ള ഭാഗത്ത് ഓവുചാല് അടക്കമുള്ളവ തീര്ക്കാതെയാണ് ടാറിങ് പ്രവൃത്തി പൂര്ത്തിയാക്കിയത്. ഈ റോഡിന്റെ ബാക്കി പ്രവൃത്തികള് പൂര്ത്തിയാക്കണമെങ്കില് പോലും മാസങ്ങളെടുക്കും. ഡിസംബര് ആദ്യത്തില് പിണങ്ങോട് മുതല് പടിഞ്ഞാറത്തറ വരെയുള്ള ഭാഗങ്ങളില് ടാറിംഗ് നടത്തുമെന്നായിരുന്നു പൊതുമരാമത്ത് അധികൃതര് പറഞ്ഞിരുന്നത്. മറ്റ് അനുബന്ധ പ്രവൃത്തികള് ശേഷം പൂര്ത്തിയാക്കുമെന്നും ഉറപ്പ് നല്കിയിരുന്നു. എന്നാല് ഇതൊന്നും പ്രായോഗിക തലത്തിലേക്ക് കൊണ്ടു വരാന് അധികൃതര്ക്ക് സാധിച്ചിട്ടില്ല.
ദിവസവും ആയിരക്കണക്കിന് വാഹനങ്ങള് സര്വ്വീസ് നടത്തുന്ന ഈ റോഡില് പൊടിയും മെറ്റലും ചിതറിക്കിടന്ന് ഇരുചക്രവാഹനങ്ങളടക്കം അപകടത്തില് പെടാനും ഇടയാക്കിയിട്ടുണ്ട്. റോഡ് പണി തീരാത്തതിനാല് സ്വകാര്യബസുകള് സര്വ്വീസ് നടത്താത്തതിനാല് യാത്രക്കാരും ഏറെ ബുദ്ധിമുട്ട് അനുഭവിക്കുകയാണ്. വൈദ്യുതി തൂണുകള് മാറ്റുന്ന പണികളും ഇഴയുകയാണ്. എത്രയും പെട്ടെന്ന് പണികള് പൂര്ത്തിയാക്കുന്നതിന് ആവശ്യമായ ഇടപെടലുകള് ഭരണതലത്തില് വേണമെന്ന് കര്മ്മസമിതി ആവശ്യപ്പെടുന്നു. ബാണാസുരസാഗര് ഡാമിനെ കൂടാതെ മറ്റൊരു വിനോദസഞ്ചാരകേന്ദ്രമായ കര്ലാട് തടാകത്തിലേക്ക് പോകാനുള്ള വഴിയും ഇത് തന്നെയാണ്. തരിയോട് ഗ്രാമപഞ്ചായത്തുകാര് ആശ്രയിക്കുന്ന ആരോഗ്യകേന്ദ്രവും ഇതേവഴിയിലെ ചെന്നലോടാണ് സ്ഥിതി ചെയ്യുന്നത്. ഇവിടേക്കെല്ലാമുള്ള യാത്ര ഇപ്പോള് നാട്ടുകാര്ക്ക് ദുരിതമായി മാറി കഴിഞ്ഞു.
കിഫ്ബിയില് തുക വകയിരുത്തി നിര്മ്മാണം നടത്തുന്ന മറ്റൊരു റോഡായ സുല്ത്താന്ബത്തേരി നിയോജകമണ്ഡലത്തിലെ ബീനാച്ചി-പനമരം റോഡിന്റെ അവസ്ഥയും ഇത് തന്നെയാണ്. റോഡ് നിര്മ്മാണത്തിനായി പഴയപാതകള് കുത്തിപ്പൊളിച്ച് മെറ്റല് വിതറിയിട്ട അവസ്ഥയിലാണുള്ളത്. നിരവധി പ്രക്ഷോഭങ്ങള്ക്ക് ശേഷമാണ് കല്പ്പറ്റ-വരാമ്പറ്റ റോഡിന്റെ നിര്മ്മാണ പ്രവൃത്തി ആരംഭിച്ചത്. റോഡ് നിര്മ്മാണം വേഗത്തിലാക്കണമെന്നാവശ്യപ്പെട്ട് കര്മ്മസമിതി നിരവധി സമരങ്ങളും നടത്തിയിട്ടുണ്ട്. ഇനിയെങ്കിലും റോഡ് പ്രവൃത്തി വേഗം വര്ധിപ്പിച്ച് പ്രാവര്ത്തികമാക്കണമെന്നാണ് നാട്ടുകാരും കര്മ്മസമിതിയും ആവശ്യപ്പെടുന്നത്.