കൊവിഡ്; വയനാട്ടില്‍ മൂന്ന് പേര്‍ക്ക് കൂടി രോഗമുക്തി, നിരീക്ഷണത്തിലുള്ളത് 3628 പേര്‍

കല്‍പ്പറ്റ: വയനാട്ടില്‍ മൂന്ന് പേര്‍ കൂടി രോഗമുക്തരായി ആശുപത്രി വിട്ടു. ലോറി ഡ്രൈവറുടെ സമ്പര്‍ക്ക പട്ടികയിലുളള മാനന്തവാടിയിലെ 11 മാസം പ്രായമായ കുട്ടിയും ലോറി ഡ്രൈവറുടെ മരുമകന്‍റെ സമ്പര്‍ക്ക പട്ടികയിലുളള 36 കാരനായ പനവല്ലി സ്വദേശിയും ചെന്നൈ കോയമ്പേട് മാര്‍ക്കറ്റില്‍ നിന്നെത്തിയ ചീരാല്‍ സ്വദേശിയുടെ സമ്പര്‍ക്ക പട്ടികയിലുളള നെന്മേനി സ്വദേശിയായ 29 കാരനുമാണ് പരിശോധന ഫലം നെഗറ്റീവായതിനെ തുടര്‍ന്ന് അശുപത്രി വിട്ടത്.

Also Read: പാലക്കാട് ആശങ്കയില്‍... രണ്ട് പേര്‍ക്ക് രോഗം ബാധിച്ചത് സമ്പര്‍ക്കം മൂലം, ഇത്രയും പോസിറ്റീവ് കേസുകള്‍ ജില്ലയില്‍ ആദ്യം!

നിലവില്‍ 12 പേരാണ് മാനന്തവാടി ജില്ലാ ആശുപത്രിയില്‍ കൊവിഡ് ബാധിതരായി ചികിത്സയില്‍ കഴിയുന്നത്. മറ്റ് 9 പേരും ചികിത്സയില്‍ ഇതേ ആശുപത്രിയില്‍ കഴിയുന്നുണ്ട്. അതേസമയം, ജില്ലയില്‍ നിരീക്ഷണത്തില്‍ കഴിയുന്നവരുടെ എണ്ണം വര്‍ധിക്കുകയാണ്. ശനിയാഴ്ച്ച മാത്രം 178 പേരെ കൂടി പുതിയതായി നിരീക്ഷണത്തിക്കിയിട്ടുണ്ട്. നിലവില്‍ 3628 പേരാണ് ജില്ലയില്‍ നിരീക്ഷണത്തിലുളളത്. ഇതില്‍ 1500 പേര്‍ കൊവിഡ് കെയര്‍ സെന്‍ററിലാണ് കഴിയുന്നത്. ജില്ലയില്‍ നിന്നും ഇതുവരെ പരിശോധനയ്ക്ക് അയച്ച 1537 സാമ്പിളുകളില്‍ 1336 എണ്ണത്തിന്റെ ഫലം ലഭിച്ചു. ഇതില്‍ 1313 എണ്ണം നെഗറ്റീവാണ്.

Also Read: മുംബൈ ട്രെയിനില്‍ കണ്ണൂരില്‍ ഇറങ്ങിയവരുടെ വിവര ശേഖരണം ശ്രമകരം; എത്തിയത് 400 പേര്‍, 4 ജില്ലകളിലെ യാത്രക്കാര്‍!

ശനിയാഴ്ച്ച അയച്ച 38 സാമ്പിളുകളുടെ പരിശോധനാ ഫലം ഉള്‍പ്പെടെ 194 സാമ്പിളുകളുടെ ഫലം ലഭിക്കുവാന്‍ ബാക്കിയുണ്ട്. സെന്‍റിനല്‍ സര്‍വൈലന്‍സിന്‍റെ ഭാഗമായി ഇന്നലെ 30 സാമ്പിളുകള്‍ കൂടി അയച്ചിട്ടുണ്ട്. ജില്ലാ മാനസികാരോഗ്യ പരിപാടിയുടെ നേതൃത്വത്തില്‍ ശനിയാഴ്ച്ച നിരീക്ഷണത്തില്‍ കഴിയുന്ന 330 പേര്‍ക്ക് കൗണ്‍സിലിംഗും നല്‍കി. ജില്ലയിലെ കണ്ടെയിന്‍‌മെന്‍റ് സോണുകളുടെ എണ്ണം വീണ്ടും കുറഞ്ഞു. എടവക ഗ്രാമപഞ്ചായത്തിലെ 1,2,3,4 ,5,6,7,8,11,13,15,17,18,19 വാര്‍ഡുകളെ കണ്ടെയിന്‍മെന്‍റ് സോണില്‍ നിന്നൊഴിവാക്കി ജില്ലാ കളക്ടര്‍ ഉത്തരവായി. പഞ്ചായത്തിലെ 9,10 വാര്‍ഡുകള്‍ വീണ്ടും കണ്ടെന്‍മെന്‍റ് സോണില്‍ തുടരും.