ത്രിതലപഞ്ചായത്ത് തെരഞ്ഞെടുപ്പ് മാറ്റിവെക്കണമെന്ന് കേരള കോൺഗ്രസ് ജേക്കബ്ബ് വിഭാഗം

കല്‍പ്പറ്റ: കൊവിഡ് വ്യാപനം നിയന്ത്രിക്കുന്നത് വരെ ത്രിതലപഞ്ചായത്ത് തെരഞ്ഞെടുപ്പ് മാറ്റിവെക്കണമെന്ന് കേരള കോണ്‍ഗ്രസ് (ജേക്കബ്) വര്‍ക്കിംഗ് ചെയര്‍മാന്‍ എംസി സെബാസ്റ്റ്യന്‍ വയനാട് പ്രസ്സ്‌ ക്ലബ്ബില്‍ നടത്തിയ വാര്‍ത്താസമ്മേളനത്തില്‍ ആവശ്യപ്പെട്ടു. ഇക്കാര്യം ആവശ്യപ്പെട്ടു കൊണ്ട് തെരഞ്ഞെടുപ്പ് കമ്മീഷനും, മനുഷ്യാവകാശ കമ്മീഷനും നിവേദനം നല്‍കിയിട്ടുണ്ട്. രോഗവ്യാപനം നിലനില്‍ക്കുന്ന സാഹചര്യത്തില്‍ തെരഞ്ഞെടുപ്പ് കമ്മീഷന്‍ സര്‍വകക്ഷിയോഗം വിളിച്ച് ഉചിതമായ തീരുമാനമെടുക്കാന്‍ തയ്യാറാകണം.

Also Read: വയനാട്ടില്‍ 18 പേര്‍ക്ക് കൂടി കൊവിഡ്; 15 പേര്‍ക്ക് സമ്പര്‍ക്ക രോഗബാധ, 17 പേര്‍ക്ക് രോഗമുക്തി

ഭയമില്ലാതെ വോട്ട് ചെയ്യാന്‍ ജനങ്ങള്‍ക്ക് സമയം നീട്ടി നല്‍കണമെന്നും അദ്ദേഹം പറഞ്ഞു. മൂന്ന് മുന്നണികളും തെരഞ്ഞെടുപ്പിന് സജ്ജമാണെന്ന് പറയുമ്പോഴും സജ്ജരാകാത്ത വലിയ ശതമാനം വോട്ടര്‍മാരുണ്ട്. 60 വയസ് കഴിഞ്ഞവര്‍ പുറത്തിറങ്ങരുത് എന്ന നിര്‍ദേശം നിലനില്‍ക്കുന്ന സാഹചര്യമാണ്. ജനസംഖ്യയുടെ കാര്യത്തില്‍ മധ്യവയസ്‌ക്കര്‍ കൂടുതലാണ്. ഓരോ ദിവസവും കൊവിഡ് രോഗികളുടെ എണ്ണം വര്‍ധിക്കുന്ന സാഹചര്യമാണ് കേരളത്തിലുള്ളത്. സ്വന്തമായി വാഹനമില്ലാത്തവര്‍ രാഷ്ട്രീയ പാര്‍ട്ടികള്‍ ഏര്‍പ്പാടാക്കുന്ന വാഹനങ്ങളില്‍ കയറുമോ എന്ന കാര്യവും സംശയമാണ്.

Also Read: വഴിയോരത്ത് വീണ്ടും കടുവയുടെ സാന്നിധ്യം; ബത്തേരി-പുല്‍പ്പള്ളി റോഡിലൂടെ പോകുന്ന യാത്രക്കാര്‍ ഭീതിയില്‍, വീഡിയോ കാണാം!

രോഗവ്യാപനത്തിന്റെ തീവ്രത മനസിലാക്കിയാണ് ഐഎംഎ തെരഞ്ഞെടുപ്പ് മാറ്റണമെന്ന് നിര്‍ദേശിച്ചതെന്നും അദ്ദേഹം കൂട്ടിച്ചേര്‍ത്തു. രോഗവ്യാപനം നിയന്ത്രണ വിധേയമാകുകയും ആളുകള്‍ ഭയമില്ലാതെ വോട്ട് രേഖപ്പെടുത്തുന്നതിനായി പുറത്തിറങ്ങുകയും ചെയ്യുന്നത് വരെ തിരഞ്ഞെടുപ്പ് മാറ്റി വെക്കണം. അതിന് എല്ലാ രാഷ്ട്രീയ പാര്‍ട്ടികളും തയ്യാറാകണം. കൊവിഡ് 19 ആശങ്കാജനകമായി വര്‍ധിക്കുന്ന ചില ജില്ലകളുണ്ട്. അതോടൊപ്പം ദിനംപ്രതി വര്‍ധിക്കുന്ന കണ്ടെയ്ന്‍മെന്റ് സോണുകള്‍ രോഗവ്യാപനത്തിന്റെ തീവ്രത കാണിക്കുന്നതാണ്. ഇത്തരം സാഹചര്യത്തില്‍ തെരഞ്ഞെടുപ്പ് നടത്തിയാല്‍ സ്ഥാനാര്‍ഥികളും പ്രവര്‍ത്തകരും രോഗികളായി മാറിയേക്കാം. ഇക്കാര്യങ്ങളെല്ലാം കമ്മീഷന്‍ വിലയിരുത്തണമെന്നാണ് ആവശ്യമെന്നും എം സി സെബാസ്റ്റ്യന്‍ പറഞ്ഞു. ജില്ലാ സെക്രട്ടറി ജിതേഷ് കുര്യാക്കോസ് പങ്കെടുത്തു.