10 ടൺ റേഷനരി പിടിച്ച സംഭവം: ഉദ്യോഗസ്ഥരെ തടഞ്ഞ് പ്രദേശവാസികളുടെ പ്രതിഷേധം; വിജിലന്‍സ് അന്വേഷണം തുടങ്ങി

മാനന്തവാടി: കെല്ലൂരില്‍ റേഷന്‍ അരി സ്വകാര്യ കമ്പനിക്ക് മറിച്ചുവിറ്റ സംഭവത്തില്‍ പ്രതിഷേധവുമായി നാട്ടുകാര്‍. മാനന്തവാടി സപ്ലൈക്കോയുടെ അഞ്ചാം മൈലിലെ ഗോഡൗണിന് മുന്നിലായിരുന്നു പ്രതിഷേധം സംഘടിപ്പിച്ചത്. 10 ടണ്‍ അരിയാണ് സ്വകാര്യ വ്യക്തിയുടെ വീട്ടില്‍ നിന്ന് പിടികൂടിയത്. ഉന്നതതല അന്വേഷണം ആവശ്യപ്പെട്ടായിരുന്നു പ്രതിഷേധം. പരിശോധനക്കെത്തിയ ഉദ്യോഗസ്ഥരെ നാട്ടുകാരും വിവിധ രാഷ്ട്രിയ പാര്‍ട്ടി പ്രവര്‍ത്തകരും ചേര്‍ന്ന് തടഞ്ഞുവെച്ചു. നിര്‍മ്മാണത്തിലിരിക്കുന്ന കെട്ടിടത്തില്‍ റേഷനരി കണ്ടെത്തിയ സംഭവവുമായി ബന്ധപ്പെട്ട് അഞ്ചാം മൈല്‍ മൊക്കം എഫ്സിഐ ഗോഡൗണില്‍ പരിശോധനക്കെത്തിയ സിവില്‍ സപ്ലൈസ് വകുപ്പ് ഉദ്യോഗസ്ഥരെയാണ് തടഞ്ഞുവെച്ചത്.

Also Read: കൈയ്യടി നേടി വയനാട് പോലീസ്; കണ്ടെത്തി നൽകിയത് 2 വർഷം മുൻപ് കാണാതായ മസിനഗുഡി സ്വദേശികളുടെ മകനെ

അതേസമയം റേഷന്‍ അരി കരിഞ്ചന്തയില്‍ വില്‍ക്കുന്നതിനായി സൂക്ഷിച്ച സംഭവത്തില്‍ സിവില്‍ സപ്ലൈസ് വകുപ്പും പോലീസ് വിജിലന്‍സ് വകുപ്പും അന്വേഷണം തുടങ്ങി. ഇതിൻ്റെ ഭാഗമായി കെല്ലൂര്‍ മൊക്കത്തുള്ള സപ്ലൈക്കോ ഗോഡൗണില്‍ സ്റ്റോക്ക് പരിശോധന ആരംഭിച്ചു. സിവില്‍ സപ്ലൈസ് ഉദ്യോഗസ്ഥരുടെ നേതൃത്വത്തിലുള്ള പരിശോധന നാട്ടുകാര്‍ അനുവദിക്കാത്തതിനെ തുടര്‍ന്ന് മാനന്തവാടി തഹസില്‍ദാരുടെ നേതൃത്വത്തിലായിരുന്നു സ്റ്റോക്ക് പരിശോധിച്ചത്. പ്രസ്തുത സംഭവവുമായി ബന്ധപ്പെട്ട് മാനന്തവാടി താലൂക്കിലെ രണ്ട് റേഷന്‍കടകളില്‍ പരിശോധന നടത്തി. ഈ രണ്ട് കടകളുടെയും ലൈസന്‍സ് റദ്ദാക്കുമെന്നാണ് സൂചന.

Also Read: അഭിമാനമായി വയനാട് കളക്ടര്‍; പ്രധാനമന്ത്രിയുടെ പുരസ്‌ക്കാര പട്ടികയില്‍ അവസാന നാലിലിടം നേടി

വ്യാഴാഴ്ചയോടെ മാത്രമേ പരിശോധനകള്‍ പൂര്‍ത്തിയാവൂ. ഇതിനിടെ നാട്ടുകാര്‍ നല്‍കിയ പരാതിയെ തുടര്‍ന്ന് പോലീസ് വിജിലന്‍സ് വിഭാഗവും അന്വേഷണം നടത്തുന്നണ്ട്. വിജിലന്‍സ് സി ഐ ശശിധരന്‍ പരാതിക്കാരില്‍ നിന്നും സിവില്‍ സപ്ലൈസ് ഉദ്യോഗസ്ഥരില്‍ നിന്നും വിവരങ്ങള്‍ ശേഖരിച്ചു. കഴിഞ്ഞ ദിവസമായിരുന്നു നിര്‍മ്മാണത്തിലിരിക്കുന്ന വീട്ടില്‍ നിന്നും വന്‍ റേഷന്‍ അരി ശേഖരം പിടികൂടിയത്.

വയനാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ


വയനാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ