അപ്രതീക്ഷിതമായി പിന്നണി ഗാനരംഗത്ത്
കഴിഞ്ഞ ദിവസമാണ് മലയാളത്തിന്റെ പ്രിയ താരം മഞ്ജു വാര്യര്‍ അടക്കമുള്ള 9 പ്രമുഖര്‍ ഈ ഗാനം ഫേസ്ബുക്ക് പേജിലൂടെ റിലീസ് ചെയ്തത്. ഫൗസിയ അബൂബക്കറിന്റെ വരികള്‍ക്ക് സംഗീതം നല്‍കിയത് സി റ്റി വിശ്വജിത്താണ്. ഓള്‍ ഇന്ത്യാ റേഡിയോ ബി ഹൈഗ്രേഡ് ആര്‍ട്ടിസ്റ്റും സംഗീത അധ്യാപികയുമായ സൗമ്യ കല്‍പ്പറ്റയില്‍ സ്വന്തമായി ഒരു സംഗീത സ്‌കൂള്‍ നടത്തിവരുന്നതിനിടെയാണ് അപ്രതീക്ഷിതമായി പിന്നണി ഗാനരംഗത്തെത്തുന്നത്.
സൗമ്യക്ക് അവസരം ലഭിച്ചത് ഇങ്ങനെ
സോഷ്യല്‍ മീഡിയയില്‍ പാടിയ ഒരു ഗാനം സംഗീത സംവിധായകന്‍ വിശ്വജിത്ത് കണ്ടതോടെയാണ് സിനിമയിലേക്ക് സൗമ്യക്ക് അവസരം ലഭിക്കുന്നത്. തന്റെ ആദ്യചിത്രത്തില്‍ തന്നെ മറ്റൊരു ഗാനം കൂടി പാടാനും ഈ ഗായികക്ക് അവസരം ലഭിച്ചു. പതിനായിരങ്ങളാണ് യൂട്യൂബിലൂടെ ഈ ഗാനം ആസ്വദിച്ചത്. സംഗീതാഭിരുചിയുള്ള കുടുംബത്തില്‍ ജനിച്ച സൗമ്യയുടെ ആദ്യ ഗുരു അമ്മ സുചിത്രയാണ്. മൂന്ന് വയസുമുതലാണ് സംഗീതാഭ്യാസം ആരംഭിച്ചത്.
സംഗീതത്തോടൊപ്പം നൃത്തവും
സംഗീതത്തോടൊപ്പം നൃത്തവും അഭ്യസിച്ചു. സ്‌കൂള്‍ കലോത്സവങ്ങളില്‍ ഭരതനാട്യം, കുച്ചിപ്പുടി, മോഹിനിയാട്ടം, നാടോടിനൃത്തം എന്നിവയില്‍ തുടര്‍ച്ചയായി ഒന്നാംസ്ഥാനം നേടി. ലളിതഗാനം, മാപ്പിളപ്പാട്ട്, ശാസ്ത്രീയ സംഗീതം, പദ്യപാരായണം , കഥാപ്രസംഗം, ഗസല്‍ എന്നിവയിലും സൗമ്യ സമ്മാനങ്ങള്‍ വാരിക്കൂട്ടി. കലോത്സവത്തില്‍ തുടര്‍ച്ചയായി അഞ്ചുവര്‍ഷം വയനാട് ജില്ലയിലെ കലാതിലക പട്ടം നേടാന്‍ കഴിഞ്ഞുവെന്നതും സൗമ്യയുടെ മാത്രം പ്രത്യേകതയാണ്. ഉര്‍ദ്ദു പദ്യപാരായണത്തില്‍ സംസ്ഥാന തലത്തില്‍ രണ്ടുവര്‍ഷം ഒന്നാം സ്ഥാനം നേടാനും സൗമ്യക്ക് സാധിച്ചു.
പ്രശസ്തരോടൊപ്പം നിരവധി വേദികൾ
നാട്ടിലും പുറത്തുമായി പ്രശസ്ത സംഗീതജ്ഞരായ പി ജയചന്ദ്രന്‍, ഉണ്ണിമേനോന്‍, ബിജു നാരായണന്‍ തുടങ്ങിയവരുമായി സൗമ്യ നിരവധി വേദി പങ്കിട്ടിട്ടുണ്ട്. ഒട്ടേറെ ആല്‍ബങ്ങളിലും ഇതിനകം തന്നെ സൗമ്യക്ക് പാടാന്‍ സാധിച്ചു. വിവാഹ ശേഷം ദുബായില്‍ താമസിച്ചിരുന്ന കാലയളവില്‍ കൈരളി ടിവിയുടെ 'വോയ്‌സ് ഓഫ് യുഎഇ 2014 പുരസ്‌ക്കാരം നേടിയിട്ടുണ്ട്.
ഇപ്പോൾ അധ്യാപിക
ചിത്രം കടപ്പാട്: Soumya Bijoy Kurup/Facebook
യുഎഇയിലെ ഏറ്റവും കാഴ്ച്ചക്കാരുള്ള മലയാളം ചാനല്‍ ആയ എന്‍ടിവിയില്‍ അവതാരകയായും പ്രവര്‍ത്തിച്ചിട്ടുണ്ട് ഈ കലാകാരി. ഒരുകാലത്ത് വയനാട്ടിലെ ഏറ്റവും പ്രശസ്തമായ ഗാനമേള ട്രൂപ്പിലെ പ്രധാന ഗായികയായിരുന്നു സൗമ്യ. പിണങ്ങോട് ഐശ്വര്യയില്‍ ശ്രീധരന്‍-സുചിത്ര ദമ്പതികളുടെ മകളായ സൗമ്യ സ്വകാര്യ സ്‌കൂളില്‍ അധ്യാപികയാണ്. ഭര്‍ത്താവ് മുട്ടില്‍ സ്വദേശി ബിജോയി. ഏക മകള്‍ ശ്രദ്ധ ബിജോയ്.