മുള്ളന്കൊല്ലി: ഒട്ടേറെ പ്രതിസന്ധികള് വിലങ്ങുതടിയായി നില്ക്കുമ്പോഴും പുഞ്ചകൃഷി മുടക്കാതെ മുള്ളന്കൊല്ലി ഗ്രാമപഞ്ചായത്തിലെ സീതാമൗണ്ട് കൊളവള്ളി പാടത്തെ കര്ഷകര്. വേനല്കനക്കുമ്പോഴും കബനിനദിയില് നിന്നും വെള്ളം പമ്പ് ചെയ്ത് വയലൊരുക്കി ഞാറ് നടുന്ന തിരക്കിലാണ് ഇപ്പോള് കൊളവള്ളിയിലെ സ്ത്രീ തൊഴിലാളികള് ഉള്പ്പെടെയുള്ളവര്. ഈ പാടത്ത് നഞ്ചകൃഷി വിളവെടുത്തിട്ട് അധികമായിട്ടില്ല. നെല്ലിന് വിലയില്ലാതായതും, വൈക്കോല് വാങ്ങാനാളില്ലാത്തതുമെല്ലാം കര്ഷകര്ക്ക് ഇത്തവണ കടുത്ത പ്രതിസന്ധിയാണ് സൃഷ്ടിച്ചത്. സാമ്പത്തികമായി പ്രയാസങ്ങളേറെയുണ്ടെങ്കിലും പതിവായി ചെയ്യുന്ന പുഞ്ചകൃഷിയെ ഇത്തവണയും കൈവിടാന് കൊളവള്ളിയിലെ ഒരു പറ്റം കര്ഷകര് തയ്യാറായിട്ടില്ല.
വെള്ളം തേടിയുള്ള യാത്രയില് കബനിനദിയെത്തുന്ന കാട്ടാനകള് നദി കടന്ന് കൊളവള്ളി അടക്കമുള്ള പ്രദേശങ്ങളിലെത്തുന്നത് പതിവാണ്. കൂട്ടത്തോടെ കാട്ടാനകളെത്തിയാല് കൃഷി വ്യാപകമായി നശിപ്പിക്കപ്പെടും. എല്ലാവര്ഷവും ഇതൊക്കെ പതിവാണെങ്കിലും പാരമ്പര്യമായി കൃഷി നടത്തിവരുന്ന കര്ഷകര് പതിവായി വിത്തെറിയും. ആതിര, ഉമ, വലിച്ചൂരി തുടങ്ങിയ ഇനത്തില്പ്പെട്ട നെല്ലുകളാണ് കൊളവള്ളിയിലെ പാടത്ത് കൂടുതലായി നടാറുള്ളത്. കൊളവള്ളിയിലെ പാടത്തിന്റെ ഒരു ഭാഗത്ത് വനംവകുപ്പ് ജണ്ട കെട്ടി തിരിച്ച് കൃഷി മുടക്കിയത് നേരത്തെ വാര്ത്തയായിരുന്നു. പിന്നീട് ജനപ്രതിനിധികളടക്കം ഇടപെട്ടുകൊണ്ടാണ് കൃഷി നടത്താന് അനുമതി നല്കിയത്. ഈ പാടത്തും ഇത്തവണ നൂറുമേനി വിളവാണ് ലഭിച്ചത്. നിരവധി ആവശ്യങ്ങളാണ് ഇവിടുത്തെ കര്ഷകര്ക്ക് അധികാരികള്ക്ക് മുന്നില് ഉന്നയിക്കാനുള്ളത്. അതിലൊന്ന് വരള്ച്ച രൂക്ഷമാകുമ്പോഴുള്ള ജലദൗര്ലഭ്യത്തിന് പരിഹാരം കാണണമെന്നതാണ്.
കബനിനദിയില് ജലമുണ്ടെങ്കില് പോലും എല്ലാ കര്ഷകര്ക്കും ഉപയോഗപ്രദമാകും വിധത്തില് വെള്ളം പമ്പ് ചെയ്യാനുള്ള സംവിധാനങ്ങള് ഇപ്പോഴും ഇവിടെയില്ലെന്നതാണ് പ്രധാന പരിമിതിയായി ചൂണ്ടിക്കാട്ടുന്നത്. പമ്പ് ഹൗസിലേക്ക് വയലിന് നടുവിലൂടെയുള്ള റോഡിന്റെ സ്ഥിതി അതീവ ശോചനീയവസ്ഥയിലാണ്. ഈ റോഡ് കോണ്ക്രീറ്റോ മറ്റോ ഇട്ട് ഗതാഗത യോഗ്യമാക്കണമെന്നതാണ് മറ്റൊരു ആവശ്യം. പമ്പ് ഹൗസില് എന്തെങ്കിലും അറ്റകുറ്റപ്പണി നടത്തേണ്ടി വന്നാല് അങ്ങോട്ട് പോകാനുള്ള പ്രയാസം ഒഴിവാക്കാനാണിത്.
മറ്റൊന്ന് കനാലുകളുടെ നവീകരണമാണ്. കബനിയില് നിന്നും വെള്ളം പമ്പ് ചെയ്ത് എത്തിക്കുന്നുണ്ടെങ്കിലും കനാലുകള് തകര്ന്നുകിടക്കുന്നതിനാല് ഒരിടത്ത് നിന്നും മറ്റൊരിടത്തേക്ക് വെള്ളമെത്തിക്കാന് പ്രയാസമനുഭവിക്കുകയാണ്. അതുകൊണ്ട് തന്നെയാണ് പല കര്ഷകരും പുഞ്ച കൃഷി നടത്താതിരിക്കാനുള്ള കാരണം. ഇത്തരം പ്രതിസന്ധികള്ക്ക് കൂടി പരിഹാരം കാണുകയാണെങ്കില് ഒരു പാടം പോലും ഒഴിച്ചിടാതെ പുഞ്ചകൃഷി നടത്താന് തയ്യാറാകുമെന്നാണ് കര്ഷകര് തന്നെ വ്യക്തമാക്കുന്നത്.