കല്പ്പറ്റ: വയനാട് ജില്ലയിലെ ഭൂമിയുമായി ബന്ധപ്പെട്ട വിഷയങ്ങള് പരിഹരിക്കുന്നതിനായി പ്രത്യേക യജ്ഞം നടത്തുമെന്ന് റെവന്യൂമന്ത്രി കെ രാജന്. ഫയല് തീര്പ്പാക്കാന് അദാലത്ത് സംഘടിപ്പിക്കുമെന്നും, അര്ഹരായ എല്ലാവര്ക്കും പട്ടയം നല്കുമെന്നും, സര്വ്വെ നടപടികള് വേഗത്തിലാക്കുമെന്നും മന്ത്രി വ്യക്തമാക്കി. മന്ത്രിയുടെ അധ്യക്ഷതയില് വയനാട് കലക്ട്രേറ്റില് ചേര്ന്ന റവന്യൂ ഉദ്യോഗസ്ഥരുടെ യോഗത്തിലാണ് ഇക്കാര്യം വ്യക്തമാക്കിയത്. കാരാപ്പുഴ ജലസേചനപദ്ധതിക്ക് വേണ്ടി കുടി ഒഴിപ്പിക്കപ്പെട്ടവരുടെ പുനരധിവാസം ഡിസംബര് 31-നകം പൂര്ത്തീകരിക്കും.
നയപരമായ കാര്യങ്ങളിലെ തീരുമാനം സര്ക്കാര് കൈക്കൊള്ളുമെന്നും മന്ത്രി വ്യക്തമാക്കി. എല്ലാവര്ക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാര്ട്ട് എന്ന ലക്ഷ്യവുമായാണ് സര്ക്കാര് മുന്നോട്ട് പോകുന്നത്. അര്ഹരായ എല്ലാവര്ക്കും പട്ടയം നല്കും. കൈവശരേഖയുളളവര്ക്ക് മാത്രം പട്ടയം നല്കുന്നതിലുപരി ഭൂരഹിതായ പരമാവധി ആളുകളെ ഭൂമിയുടെ അവകാശികളാക്കുന്നതിനുളള നടപടികളാണ് നടത്തുന്നത്. ഇതിനായി മിച്ചഭൂമി ഉള്പ്പെടെ അനധികൃതമായി കൈവശം വെച്ചിരിക്കുന്ന ഭൂമി തിരിച്ച് പിടിക്കുന്നതിനുളള നടപടികള് വേഗത്തിലാക്കും.
ഇതിനായി ജില്ലകളിലെ ലാന്റ് ട്രൈബൂണലുകളെയും താലൂക്ക് ലാന്റ് ബോര്ഡുകളെയും ക്രിയാത്മകാമാക്കി ഭൂരഹിതരായ എല്ലാവര്ക്കും ഭൂമി നല്കുന്നതിനുളള നടപടി ഉണ്ടാകുമെന്നും മന്ത്രി പറഞ്ഞു. ജില്ലയിലെ താലൂക്ക് ലാന്റ് ബോര്ഡുകളില് നിലനില്ക്കുന്ന 206-ഓളം കേസുകള് സമയബന്ധിതമായി പൂര്ത്തീകരിക്കാനുളള സമയക്രമം ഉണ്ടാക്കും. ഹാരിസണ് മലയാളം ഉള്പ്പെടെ അധികമായി ഭൂമി കണ്ടെത്തിയ 49 പേര്ക്ക് എതിരായി നിയമനടപടികള് സ്വീകരിച്ച് വരികയാണ്. ഏഴ് കേസുകള് ഇതിനകം ഫയല് ചെയ്തു കഴിഞ്ഞു. മറ്റ് കേസുകളും ഫയല് ചെയ്യുന്നതിനുളള നടപടിക്രമങ്ങള് തുടങ്ങിയിട്ടുണ്ടെന്നും മന്ത്രി പറഞ്ഞു.
റവന്യൂ സെക്രട്ടറിയറ്റ് മുതല് വില്ലേജ് ഓഫീസ് വരെയുളള റവന്യൂ വകുപ്പിന്റെ കീഴിലുളള മുഴുവന് ഓഫീസുകളിലും ഫയല് തീര്പ്പാക്കാന് അദാലത്ത് സംഘടിപ്പിക്കും. സെപ്റ്റംബര് 22 മുതല് 10 ദിവസം വകുപ്പുമന്ത്രിയുടെയും അഡീഷണല് ചീഫ് സെക്രട്ടറിയുടെയും നേതൃത്വത്തില് റവന്യൂ സെക്രട്ടറിയേറ്റിലുളള ഫയലുകള് തീര്പ്പാക്കും. തുടര്ച്ചയായി ഒക്ടോബര് 15നകം ലാന്റ് റവന്യൂ കമ്മീഷണറേറ്റില് അദാലത്ത് നടത്തും.
ഒക്ടോബര് മാസം അവസാനത്തോടെ കളക്ട്രേറ്റുകളിലെ അദാലത്തുകള് പൂര്ത്തീകരിക്കും. നവംബര് മാസത്തില് താലൂക്ക് ഓഫീസുകളിലും ഡിസംബര് 31നകം വില്ലേജ് ഓഫീസ് തലത്തിലും ഫയല് അദാലത്ത് നടത്തുമെന്നും മന്ത്രി പറഞ്ഞു. താലൂക്ക് തലങ്ങളില് അദാലത്തിന് ജില്ലാകലക്ടര് നേതൃത്വം നല്കും. വില്ലേജുകളില് ചുരുങ്ങിയത് ഒരു ഡെപ്യൂട്ടി കളക്ടര് ഉള്പ്പെടെയുളള ഉദ്യോഗസ്ഥര് പങ്കെടുക്കും. അദാലത്തിലൂടെ റവന്യൂവകുപ്പില് തീര്പ്പാക്കാതെ കിടക്കുന്ന പരമാവധി ഫയലുകള് തീര്പ്പാക്കാനാണ് ഉദ്ദേശിക്കുന്നത്. ഇതോടൊപ്പം റവന്യൂവകുപ്പിന്റെ പ്രവര്ത്തനത്തിന് ഒരു പൊതുകലണ്ടര് തയ്യാറാക്കുമെന്നും മന്ത്രി വ്യക്തമാക്കി.