തുടര്‍ച്ചയായ കൊവി‍ഡ് സ്ഥിരീകരണം, വയനാട് ആശങ്കയില്‍... ചൊവ്വാഴ്ച രോഗം സ്ഥിരീകരിച്ചത് 2 പേര്‍ക്ക്

കല്‍പ്പറ്റ: വയനാട്ടില്‍ രണ്ട് പേര്‍ക്ക് കൂടി കൊവിഡ് സ്ഥിരീകരിച്ചു. ജില്ലയില്‍ തുടര്‍ച്ചയായി കൊവിഡ് സ്ഥിരീകരിക്കുന്നത് ആശങ്ക വര്‍ധിപ്പിക്കുന്നുണ്ട്. ബാംഗ്ലൂരില്‍ നിന്നും ജൂണ്‍ 16ന് ജില്ലയില്‍ എത്തിയ 24 കാരനായ വെങ്ങപ്പള്ളി സ്വദേശിക്കും, ജൂണ്‍ ഇരുപതാം തീയതി രോഗം സ്ഥിരീകരിച്ച് ജില്ലാ ആശുപത്രിയില്‍ ചികിത്സയിലുള്ള മൂപ്പൈനാട് സ്വദേശിയായ ഏഴ് വയസുകാരന്‍റെ 33 കാരിയായ അമ്മയ്ക്കുമാണ് ചൊവ്വാഴ്ച രോഗം സ്ഥിരീകരിച്ചിരിക്കുന്നത്.

Also Read: കൊവിഡ് കാലത്തും ബിജെപിയുടെ 'കൊലവിളി മുദ്രാവാക്യം'; മഴയിലും തിളക്കുന്നു കണ്ണൂരിലെ അക്രമ രാഷ്ട്രീയം!!

സാമ്പിള്‍ പരിശോധന പോസിറ്റീവ് ആയതിനെ തുടര്‍ന്ന് ഇവരെ ആശുപത്രിയില്‍ പ്രവേശിപ്പിച്ചു. അതേസമയം ആശ്വാസമായി രണ്ട് പേര്‍ കൂടി ജില്ലയില്‍ രോഗമുക്തരായി. മെയ് 27ന് ആശുപത്രിയില്‍ പ്രവേശിപ്പിച്ച 53 കാരനായ പനമരം സ്വദേശിയും ജൂണ്‍ നാലിന് അഡ്മിറ്റ് ചെയ്യപ്പെട്ട ഗൂഡല്ലൂര്‍ സ്വദേശിയായ 47 കാരിയുമാണ് രോഗമുക്കി നേടി ആശുപത്രി വിട്ടത്. അതേസമയം, 217 പേര്‍ ചൊവ്വാഴ്ച്ച നിരീക്ഷണ കാലം പൂര്‍ത്തിയാക്കിട്ടുണ്ട്. ചൊവ്വാഴ്ച നിരീക്ഷണത്തിലായ 272 പേര്‍ ഉള്‍പ്പെടെ നിലവില്‍ 3585 പേര്‍ നിരീക്ഷണത്തിലുണ്ട്.

Also Read: മദ്യപിക്കുന്നതിനിടെ തര്‍ക്കം... മലപ്പുറത്ത് മധ്യവയസ്ക്കന്‍ തലക്കടിയേറ്റ് മരിച്ചു, സുഹൃത്ത് അറസ്റ്റില്‍!

ഇതില്‍ 38 പേര്‍ മാനന്തവാടി ജില്ലാ ആശുപത്രിയിലും 1603 പേര്‍ വിവിധ കോവിഡ് കെയര്‍ സെന്ററുകളിലുമാണ് നിരീക്ഷണത്തില്‍ കഴിയുന്നത്. വയനാട്ടില്‍ നിന്നും ഇതുവരെ പരിശോധനയ്ക്ക് അയച്ച 2821 ആളുകളുടെ സാമ്പിളുകളില്‍ 2426 ആളുകളുടെ ഫലം ലഭിച്ചതില്‍ 2375 നെഗറ്റീവും 51 ആളുകളുടെ സാമ്പിള്‍ പോസിറ്റീവുമാണ്. 392 സാമ്പിളുകളുടെ ഫലം ലഭിക്കുവാന്‍ ബാക്കിയുണ്ട്. സാമൂഹ്യ വ്യാപനം നടന്നിട്ടുണ്ടോ എന്ന് പരിശോധിക്കുന്നതിന്റെ ഭാഗമായി ജില്ലയില്‍ നിന്നും ആകെ 4147 സാമ്പിളുകള്‍ പരിശോധനയ്ക്കായി അയച്ചിട്ടുണ്ട്. ഇതില്‍ ഫലം ലഭിച്ച 3660 ല്‍ 3635 നെഗറ്റീവും 25 പോസിറ്റീവുമാണ്.