അഭിമാനമായി വയനാട് കളക്ടര്‍; പ്രധാനമന്ത്രിയുടെ പുരസ്‌ക്കാര പട്ടികയില്‍ അവസാന നാലിലിടം നേടി

കല്‍പ്പറ്റ: പ്രവര്‍ത്തമികവിന് രാജ്യത്തെ ഐഎഎസ് ഉദ്യോഗസ്ഥര്‍ക്ക് നല്‍കുന്ന പ്രധാനമന്ത്രിയുടെ പുസ്‌ക്കാര പട്ടികയില്‍ അവസാന നാലിലൊരാളായി വയനാട് ജില്ലാ കളക്ടര്‍ അദീല അബ്ദുള്ള. നേരത്തെ 12 പേരടങ്ങുന്ന ചുരുക്കപ്പട്ടികയില്‍ അദീല അബ്ദുള്ള ഇടം നേടിയിരുന്നു. ഇതില്‍ ദക്ഷിണേന്ത്യയില്‍ നിന്നുള്ള നാല് കളക്ടര്‍മാരാണ് അവസാന ചുരുക്കപ്പട്ടികയില്‍ എത്തിയിരിക്കുന്നത്. പ്രവര്‍ത്തന നേട്ടങ്ങളെ കുറിച്ച് കളക്ടര്‍മാര്‍ 15 മിനിറ്റ് നീണ്ടുനില്‍ക്കുന്ന പവര്‍ പോയിന്റ് അവതരണം ഈ ഘട്ടത്തില്‍ നടത്തിയിരുന്നു.

Also Read: വയനാട്ടിൽ 169 പേര്‍ക്ക് കൂടി കൊവിഡ്; ആരോഗ്യ പ്രവർത്തകർക്കും കെഎസ്ആര്‍ടി ജീവനക്കാര്‍ക്കും രോഗം

ആദ്യ 12 പേരുടെ പട്ടികയില്‍ ആറാമതായാണ് നേരത്തെ അദീല അബ്ദുള്ള ഇടം പിടിച്ചിരുന്നത്. മുന്‍ഗണനാ മേഖലയിലെ സമഗ്രവികസനത്തിനായുള്ള പ്രവര്‍ത്തനങ്ങള്‍ മുന്‍നിര്‍ത്തിയാണ് പുരസ്‌ക്കാരപ്പട്ടിക തയാറാക്കുന്നത്. വയനാട്ടില്‍ ജില്ലാ കളക്ടറായി എത്തിയതിന് പിന്നാലെ നിരവധി ശ്രദ്ധേയമായ പ്രവര്‍ത്തനങ്ങളാണ് അദീല അബ്ദുള്ള നടത്തിയത്. ഏറ്റവുമൊടുവില്‍ കൊവിഡുമായി ബന്ധപ്പെട്ട പ്രവര്‍ത്തനങ്ങളിലും പരാതികള്‍ക്കിട നല്‍കാത്ത വിധത്തിലാണ് പ്രതിരോധ നടപടികളുമായി കളക്ടര്‍ മുന്നോട്ടുപോകുന്നത്. കര്‍ണാടക, തമിഴ്‌നാട് തുടങ്ങിയ സംസ്ഥാനങ്ങളുമായി അതിര്‍ത്തി പങ്കിടുന്ന ജില്ലയിലെന്ന നിലയില്‍ വയനാട് ഏറെ ആശങ്കയിലായിരുന്നു. പതിനാലോളം അതിര്‍ത്തികളുള്ള ജില്ലയില്‍ ആളുകളുടെ വരവും പോക്കും ഒരു പോലെ രോഗവ്യാപനത്തിന് കാരണമാകുമെന്ന ഭീതി നിലനിന്നിരുന്നപ്പോഴും അവസരോചിതമായ ഇടപെടലും, പ്രതിരോധ നടപടികളുമാണ് ജില്ലാ കളക്ടറുടെ നേതൃത്വത്തില്‍ നടന്നത്.

Also Read: തദ്ദേശ തെരഞ്ഞെടുപ്പ്; വയനാട്ടില്‍ ഗ്രാമപഞ്ചായത്തുകളിലെ സംവരണവാര്‍ഡ് നറുക്കെടുപ്പ് പൂര്‍ത്തിയായി

ആദിവാസികള്‍ ഏറ്റവുമധികമുള്ള ജില്ലയില്‍ അവരുടെ ക്ഷേമപ്രവര്‍ത്തനങ്ങള്‍ക്കും കളക്ടര്‍ പ്രാധാന്യം നല്‍കുന്നുണ്ട്. പരാതി പരിഹാര അദാലത്തുകള്‍ നടത്തി ജനങ്ങളുടെ കാലങ്ങളായുള്ള ആവശ്യങ്ങള്‍ക്ക് പരിഹാരം കാണാനും അദീല അബ്ദുള്ളക്ക് സാധിച്ചിട്ടുണ്ട്. അതേസമയം കാര്‍ഷികമേഖലയില്‍ കൂടുതല്‍ പദ്ധതിക്ക് വായ്പ ലഭ്യമാക്കിയതടക്കമുള്ള പ്രവര്‍ത്തനങ്ങളാണ് പട്ടികയില്‍ ഇടം പിടിക്കാനുള്ള പ്രധാന കാരണം. 34 കാരിയായ അദീല അബ്ദുല്ല 2012 ബാച്ച് ഐഎഎസ് ഉദ്യോഗസ്ഥയാണ്. കോഴിക്കോട് കുറ്റ്യാടി സ്വദേശിയായ അദീല 2019 നവംബറിലാണ് വയനാട് ജില്ല കളക്ടറായി ചുമതലയേറ്റത്. പ്രധാനമന്ത്രിയുടെ പുരസ്‌ക്കാരം വയനാട് കളക്ടര്‍ക്ക് ലഭിച്ചാല്‍ അത് ജില്ലയെ സംബന്ധിച്ച് അഭിമാനമുഹൂര്‍ത്തവും ചരിത്രവുമായി മാറും.


വയനാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ

വയനാട് ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ