വീണ്ടും ഒന്നിക്കാനായി കാത്തിരിക്കാറുണ്ട്: ജീവിതത്തിലെ ദൈര്‍ഘ്യമേറിയ ബന്ധത്തെക്കുറിച്ച് സല്‍മാന്‍ ഖാന്റെ വാക്കുകള്‍! 11 വര്‍ഷമായി ഈ ബന്ധം കൂടെയുണ്ടെന്നും നടന്‍!

സ്‌ക്രീനിലും ജീവിതത്തിലും പ്രണയമുണ്ടായിട്ടുണ്ടെങ്കിലും ഇന്നും അവിവാഹിതനായി തുടരുകയാണ് സല്‍മാന്‍ ഖാന്‍. തന്റെ ബന്ധങ്ങള്‍ക്കെല്ലാം ആയുസ് കുറവായിരുന്നുവെന്ന് നടന്‍ പറയുന്നു. എന്നാല്‍ 10 വര്‍ഷമായി തന്റെ കൂടെയുള്ള ആത്മാര്‍ത്ഥമായൊരു ബന്ധത്തെക്കുറിച്ചും അദ്ദേഹം വാചാലനാവുന്നുണ്ട്. ബിഗ് ബോസ് സീസണ്‍ 15 ന് ആരംഭിക്കുന്നതിന് മുന്നോടിയായുള്ള വീഡിയോയിലൂടെയാണ് അദ്ദേഹം രസകരമായ വിശേഷങ്ങള്‍ പങ്കുവെച്ചത്. 2010 ല്‍ ബിഗ് ബോസ് സീസണ്‍ 4ലൂടെയാണ് സല്‍മാന്‍ ഖാന്‍ ഷോയിലേക്കെത്തുന്നത്. 11 വര്‍ഷത്തിനിപ്പുറം പ്രേക്ഷകരുടേയും മത്സരാര്‍ത്ഥികളുടേയും പ്രിയപ്പെട്ട അവതാരകനായി മുന്നേറുകയാണ് അദ്ദേഹം.
ജീവിതത്തില്‍ ഒരു പതിറ്റാണ്ടിലധികം കാലം നീണ്ടുനിന്ന വേറൊരു ബന്ധവും ഉണ്ടായിട്ടില്ലെന്നാണ് സല്‍മാന്‍ പറയുന്നത്. ജീവിതത്തില്‍ തന്നെ സ്ഥിരത കൊണ്ടുവന്ന ഷോയാണ് ബിഗ് ബോസ്്. ഒരു സീസണ്‍ അവസാനിക്കുമ്പോള്‍ അടുത്ത സീസണ്‍ തുടങ്ങാനായി കാത്തിരിക്കുന്ന സ്ഥിതി വിശേഷമാണ്. ബിഗ് ബോസും എന്നപ്പോലെ ബാച്ചിലറാണ്. അതാണ് ഞങ്ങള്‍ ബോസാണെന്ന് സ്വയം കരുതുന്നതെന്നും അദ്ദേഹം പറയുന്നു. ഒരുപാട് ഇഷ്ടപ്പെട്ട പരിപാടി കൂടിയാണ് ബിഗ് ബോസ്.
ബിഗ് ബോസ് അവതാരകനായതിന് ശേഷം ജീവിതത്തിലും ഒരുപാട് മാറ്റങ്ങള്‍ വന്നിരുന്നു. എന്റെ ക്ഷമ തന്നെ നഷ്ടമാവുന്ന തരത്തിലുള്ള കാര്യങ്ങള്‍ അരങ്ങേറിയിട്ടുണ്ട്. കാര്യങ്ങള്‍ കൈവിട്ട് പോവുമെന്ന അവസ്ഥയിലും സംയമനത്തോടെ കൈകാര്യം ചെയ്യാന്‍ എന്നെ പ്രാപ്തനാക്കിയത് ഈ ഷോയാണ്. ജീവിതത്തില്‍ നിരവധി പേരെ പരിചയപ്പെടാനും അവരെ മനസ്സിലാക്കാനുമുള്ള അവസരവും ബിഗ് ബോസ് നല്‍കുന്നുണ്ട്. വൈകാതെ തന്നെ കളേഴ്‌സ് ടിവി തന്റെ പ്രതിഫലം കൂട്ടി നല്‍കുമെന്നാണ് കരുതുന്നതെന്നുമായിരുന്നു അദ്ദേഹം പറഞ്ഞത്.
100 ദിവസം ബിഗ് ബോസിന്റെ ടാസ്‌ക്കുകളും നിബന്ധനകളും പാലിച്ച് കഴിയുകയെന്നത് വലിയൊരു കാര്യം തന്നെയാണ് പങ്കെടുത്തവരെല്ലാം പറഞ്ഞത്. ഫോണും സോഷ്യല്‍ മീഡിയയും ടെലിവിഷനുമൊന്നുമില്ലാതെയുള്ള ജീവിതം പല കാര്യങ്ങളും മനസ്സിലാക്കിത്തന്നുവെന്നും താരങ്ങള്‍ പറഞ്ഞിരുന്നു. ഹിന്ദിയില്‍ വന്‍വിജയമായി മാറിയ ഷോ മലയാളത്തിലും ആരംഭിച്ചിരുന്നു. സാബുമോന്‍ അബ്ദുസമദായിരുന്നു ആദ്യ സീസണിലെ വിജയി. മോഹന്‍ലാലാണ് മൂന്ന് സീസണും അവതരിപ്പിച്ചത്. കൊവിഡ് വ്യാപനത്തെ തുടര്‍ന്ന് ബിഗ് ബോസ് സീസണ്‍ 2 നിര്‍ത്തിവെക്കുകയായിരുന്നു. മൂന്നാം സീസണിലും കൊവിഡ് വില്ലനായെത്തിയെങ്കിലും വോട്ടിംഗിലൂടെ വിജയിയെ തീരുമാനിച്ച് ഫിനാലെ നടത്തുകയായിരുന്നു. ബിഗ് ബോസ് സീസണ്‍ 4നെക്കുറിച്ചുള്ള ചര്‍ച്ചകള്‍ സജീവമാണ്. ഇത്തവണ അവതാരകനായി മോഹന്‍ലാല്‍ ഉണ്ടാവില്ലെന്ന തരത്തിലുള്ള റിപ്പോര്‍ട്ടുകളും പുറത്തുവന്നിരുന്നു.