പൗരത്വ ഭേദഗതി നിയമത്തിനെതിരെ പ്രതികരിച്ചു; താപ്സിയുടെ 'ഥപ്പഡ്' കാണരുതെന്ന് ഹാഷ്ടാഗ് ക്യാമ്പയിന്‍

ഥപ്പഡ് പ്രദര്‍ശിപ്പിക്കരുതെന്നും ചിത്രം കാണാന്‍ ആരും പോകരുതെന്നും ആവശ്യപ്പെട്ടു കൊണ്ട് സോഷ്യല്‍ മീഡിയയില്‍ ക്യാമ്പയിന്‍ ആരംഭിച്ചിരിക്കുകയാണ്. ബോയ്ക്കോട്ട് ഥപ്പഡ് എന്ന ഹാഷ് ടാഗ് ട്രെന്റായി മാറിയിരിക്കുകയാണ്.

പൗരത്വ ഭേദഗതി നിയമത്തിനെതിരെ താപ്സിയും അനുഭവ് സിന്‍ഹയും നിലപാടുകളെടുത്തിരുന്നു. ഇതാണ് ചിലരെ പ്രകോപിപ്പിച്ചത്. സംഘപരിവാര്‍ പ്രവര്‍ത്തകരാണ് താരത്തിനും സിനിമയ്ക്കുമെതിരെ രംഗത്തെത്തിയിരിക്കുന്നത്.

നേരത്തെ, ജെഎന്‍യുവില്‍ സമരം നടത്തിയ വിദ്യാര്‍ത്ഥികളെ കാണാന്‍ താപ്സി എത്തിയിരുന്നു. മുമ്പും സാമൂഹിക വിഷയങ്ങളില്‍ തന്‍റെ നിലപാട് തുറന്നു പറഞ്ഞിട്ടുള്ള താരമാണ് താപ്സി.

ഗാര്‍ഹിക പീഡനത്തെ കുറിച്ച് പറയുന്ന ചിത്രമാണ് ഥപ്പഡ്. ആര്‍ട്ടിക്കിള്‍ 15 ന് ശേഷം അനുഭവ് സിന്‍ഹ സംവിധാനം ചെയ്യുന്ന ചിത്രമാണ് ഥപ്പഡ്. മുഖത്തടിക്കുന്നതിനെ തുടര്‍ന്ന് വിവാഹ മോചനം നേടാന്‍ ശ്രമിക്കുന്ന യുവതിയുടെ കഥയാണ് ചിത്രം പറയുന്നത്.

ചിത്രത്തെ കുറിച്ച് മികച്ച പ്രതികരണങ്ങളാണ് പ്രീമിയര്‍ ഷോയ്ക്ക് പിന്നാലെ ലഭിക്കുന്നത്. പ്രമുഖ നിരൂപകരും മാധ്യമങ്ങളും ചിത്രം നിര്‍ബന്ധമായും കണ്ടിരിക്കേണ്ടതാണെന്ന് റിപ്പോര്‍ട്ട് ചെയ്യുന്നുണ്ട്.