മദ്യപാനവും ബഹളവും, ഫോൺ എടുത്തില്ലെങ്കിൽ പോലും അടി; സൽമാനുമായുള്ള ബ്രേക്കപ്പ്; കോടികൾ ആസ്തിയുള്ള ബച്ചൻ കുടുംബത്തിൽ ഐശ്വര്യ എത്തിയപ്പോൾ; ബാലു പറയുന്നു

സംവിധായകൻ മണിരത്നത്തിന്റെ സിനിമയിൽ അഭിനയിക്കുക എന്നത് ഇന്ത്യയിലെ ഓരോ സിനിമാ താരത്തിന്റെയും ആഗ്രഹമാണ് എങ്കിൽ, ഐശ്വര്യയുടെ റിലീസ് ചെയ്യപ്പെട്ട ആദ്യചിത്രം തന്നെ അദ്ദേഹത്തോടൊപ്പം ആയിരുന്നു. ഇരുവർ എന്ന ക്ലാസിക് ചിത്രത്തിന് ശേഷം ബ്രഹ്മാണ്ഡ സംവിധായകൻ ശങ്കറിനൊപ്പം ജീൻസ് എന്ന സിനിമയിൽ കൂടി തിളങ്ങിയതോടെ ഐശ്വര്യയുടെ കോൾ ഷീറ്റ് അനുസരിച്ച് സംവിധായകർ സിനിമയുടെ ഷെഡ്യൂൾ നിശ്ചയിക്കുന്ന അവസ്ഥ വരെയെത്തി.

പ്രണയബന്ധങ്ങളുടെ പേരിലും ഇന്ത്യൻ സിനിമയിൽ ഇന്നും ചർച്ച ചെയ്യപ്പെടുന്ന ഒരാളാണ് ഐശ്വര്യ. ബോളിവുഡിന്റെ ഭായ് ജാൻ സൽമാൻ ഖാനുമായി ബന്ധപ്പെട്ടാണ് ഐശ്വര്യയുടെ പേര് ആദ്യം വാർത്തകളിൽ നിറഞ്ഞത്. സൽമാനുമായി പിരിഞ്ഞതിന് ശേഷം വിവേക് ഒബ്‌റോയിയുമായി ഐശ്വര്യ പ്രണയത്തിലായി എന്ന് വാർത്തകൾ ഉണ്ടായിരുന്നു.

ബോളിവുഡ് ഇൻഡസ്ട്രിയിൽ ശക്തമായ ബന്ധങ്ങൾ ഉള്ള സൽമാൻ ഖാനും, ഐശ്വര്യയും തമ്മിലുള്ള പ്രണയം ഇന്നും ചർച്ച ചെയ്യപ്പെടുന്ന ഒരു വിഷയമാണ്. സൽമാൻ പിന്നീടൊരു വിവാഹം ചെയ്യാതിരിക്കാൻ കാരണമായി പോലും ഈ പ്രണയത്തെ വ്യാഖ്യാനിക്കുന്നവരുണ്ട്. രണ്ടു വർഷത്തോളം ഇരുവരും പ്രണയത്തിലായിരുന്നു എങ്കിലും, പിന്നീട് വേർപിരിഞ്ഞു.

സൽമാൻ ഖാന്റെ അക്രമാസക്തമായ സ്വഭാവവും, മദ്യാസക്തിയുമാണ് ഇരുവർക്കുമിടയിലെ ബന്ധം തകരാൻ കാരണമായതെന്ന് ഐശ്വര്യ ഒരിക്കൽ വെളിപ്പെടുത്തിയിരുന്നു. കോളുകൾ എടുത്തില്ല എങ്കിൽ പോലും സൽമാൻ ശാരീരികമായി ഉപദ്രവിച്ചിരുന്നു എന്നും, ഭാഗ്യവശാൽ വലിയ മുറിവുകൾ ഒന്നും സംഭവിച്ചില്ല എന്നും ഐശ്വര്യ പറഞ്ഞിരുന്നു.

സൽമാനുമായുള്ള ബന്ധത്തെ ഒരിക്കലും ഓർമിക്കാൻ ആഗ്രഹിക്കാത്ത ദുഃസ്വപ്നം എന്നാണ് ഐശ്വര്യ അന്ന് വിശേഷിപ്പിച്ചതെന്ന് പറയുകയാണ് തമിഴ് സിനിമ നിരൂപകനായ ചെയ്യാർ ബാലു അഗയം തമിഴ് ചാനലിലൂടെ.

ഐശ്വര്യ അഭിനയിക്കുന്ന സിനിമകളിലും സൽമാൻ കൈ കടത്താൻ ശ്രമിച്ചത് നടിയെ വളരെ അസ്വസ്ഥയാക്കിയിരുന്നു. ഷാരൂഖ് ഖാനോടൊപ്പം ചൽത്തേ ചൽത്തേ എന്ന സിനിമയിൽ അഭിനയിക്കാൻ ഐശ്വര്യയെ ആണ് നിർമ്മാതാക്കൾ ആദ്യം സമീപിച്ചത് എങ്കിലും, സൽമാൻ ഖാൻ ഭീഷണിപ്പെടുത്തിയതോടെ ആ അവസരം റാണി മുഖർജിക്ക് ലഭിച്ചു.

ഒരിക്കൽ ഐശ്വര്യയുടെ വീട്ടിൽ ചെന്ന സൽമാൻ വാതിലിൽ മുട്ടി വിളിച്ചു. ആരും തുറക്കാതെ വന്നപ്പോൾ ശക്തിയായി തുടരെ തുടരെ വാതിലിൽ അടിച്ചതോടെ ഐശ്വര്യയുടെ അച്ഛന് വാതിൽ തുറക്കേണ്ടി വന്നു. തന്റെയും കുടുംബത്തിന്റെയും അന്തസ്സിന് മുറിവേൽക്കുന്ന ഒന്നും അനുവദിക്കാൻ സാധ്യമല്ലെന്നു വെളിപ്പെടുത്തിയ ഐശ്വര്യ, ഇനിയൊരിക്കലും സൽമാൻ ഖാനോടൊപ്പം ജോലി ചെയ്യില്ല എന്നും പ്രഖ്യാപിച്ചു.

അഭിഷേക് ബച്ചനെ വിവാഹം ചെയ്യുക വഴി, ഐശ്വര്യ ഇന്ത്യൻ സിനിമയിലെ മുൻനിര കുടുംബങ്ങളിൽ ഒന്നായ ബച്ചൻ കുടുംബത്തിന്റെ മരുമകളായി മാറി. നാലായിരം കോടി രൂപയോളം ആസ്തിയുള്ള ബച്ചൻ കുടുംബത്തിലെ മരുമകളുടെ വ്യക്തിഗത ആസ്തി 800 കോടിയിലധികമാണ്. അമിതാബ് ബച്ചന്റെ മരുമകൾ ആയതോടെ പ്രശസ്ത താരം സൽമാൻ ഖാനുമായി ബന്ധപ്പെട്ട വിവാദങ്ങളിൽ നിന്ന് രക്ഷ നേടാനും ഐശ്വര്യയ്ക്ക് സാധിച്ചുവെന്നും ബാലു പറഞ്ഞു.