പാപ്പരാസികളെക്കൊണ്ട് തോറ്റു! അര്‍ജുന്‍ കപൂറും മലൈകയും വേര്‍പിരിയുന്നോ? റിപ്പോര്‍ട്ടിന് പിന്നിലെ യാഥാര്‍ത്ഥ്യം ഇങ്ങനെ!

ബോളിവുഡ് സിനിമയിലെ പ്രധാന താരജോഡികളിലൊരാളാണ് അര്‍ജുന്‍ കപൂറും മലൈക അറോറയും. സ്‌ക്രീനില്‍ ഒന്നിച്ചിട്ടില്ലെങ്കിലും ജീവിതത്തില്‍ ഒന്നിക്കാനുള്ള തയ്യാറെടുപ്പിലാണ് ഇരുവരും. ഇവരുടെ പ്രണയത്തെക്കുറിച്ചുള്ള വിശേഷങ്ങള്‍ സിനിമാലോകത്തും വലിയ ചര്‍ച്ചയായിരുന്നു. ഇവരുടെ പ്രായവ്യത്യാസത്തെക്കുറിച്ച് പറഞ്ഞുള്ള വിമര്‍ശനങ്ങളുണ്ടായിരുന്നു. സ്ഥിരമായി പൊതുവേദിയില്‍ ഒന്നിച്ച് പ്രത്യക്ഷപ്പെടാന്‍ തുടങ്ങിയതോടെയായിരുന്നു ഇരുവരും പ്രണയത്തിലാണെന്നുള്ള പ്രചാരണങ്ങള്‍ ശക്തമായത്. 2022ല്‍ ഇരുവരും വിവാഹിതരായേക്കുമെന്നുള്ള വിവരങ്ങളും പുറത്തുവന്നിരുന്നു.
പൊതുവെ ക്രിസ്്തുമസും പുതുവത്സരവുമെല്ലാം ഒന്നിച്ച് ആഘോഷിക്കുന്നവരാണ് മലൈകയും അര്‍ജുനും. ഇത്തവണ ആഘോഷങ്ങളില്‍ ഇരുവരും ഉണ്ടായേക്കില്ലെന്നുള്ള റിപ്പോര്‍ട്ടുകളാണ് കഴിഞ്ഞ ദിവസം പുറത്തുവന്നത്. ഇരുവരും തമ്മില്‍ സ്വരച്ചേര്‍ച്ചയിലല്ലെന്നും വേര്‍പിരിയാനുള്ള തീരുമാനത്തിലാണെന്നുമായിരുന്നു റിപ്പോര്‍ട്ടുകള്‍. ക്ഷണനേരം കൊണ്ടായിരുന്നു റിപ്പോര്‍ട്ട് വൈറലായി മാറിയത്. പതിവിന് വ്യത്യസ്തമായി ഇത്തവണ ക്രിസ്തുമസും പുതുവത്സരവും അര്‍ജുനും മലൈകയും ഒന്നിച്ചല്ല ആഘോഷിക്കുന്നത് എന്ന കാര്യം ശരിയാണ്. എന്നാല്‍ അതിന് പിന്നിലെ യഥാര്‍ത്ഥ കാരണം മറ്റൊന്നാണെന്നാണ് ആരാധകരുടെ കണ്ടെത്തല്‍.
സിനിമാതിരക്കുകളുമായി ബന്ധപ്പെട്ട് അര്‍ജുന്‍ വിദേശത്തായിരിക്കുമെന്നും പ്രണയിനിക്ക് അരികിലേക്ക് പറന്നെത്താനുള്ള സാഹചര്യമില്ലെന്നുള്ള വിവരങ്ങളും പുറത്തുവന്നിട്ടുണ്ട്. ഇവരുടെ ബന്ധത്തില്‍ പ്രശ്‌നങ്ങളൊന്നുമില്ലെന്നും ആഘോഷങ്ങളില്‍ ഒത്തുചേരാനാവാത്തത് അര്‍ജുന്റെ തിരക്ക് കാരണമാണെന്നുമാണ് ആരാധകരും പറയുന്നത്. തിരിച്ചെത്തിയതിന് ശേഷം തങ്ങളുടെ ഒത്തുചേരല്‍ ആഘോഷമാക്കി മാറ്റാനുള്ള തീരുമാനത്തിലാണ് ഇരുവരും.
സല്‍മാന്റെ ഖാന്റെ സഹോദരനായ അര്‍ബാസ് ഖാനില്‍ നിന്നും വിവാഹമോചനം നേടിയതിന് ശേഷമായാണ് മലൈകയുടെ ജീവിതത്തിലേക്ക് അര്‍ജുന്‍ എത്തുന്നത്. ബോണി കപൂറിന്റെ മകനായ അര്‍ജുന്റെ ഈ പ്രണയത്തില്‍ അതൃപ്തി അറിയിച്ച് പ്രിയപ്പെട്ടവരെല്ലാം എത്തിയിരുന്നു. മലൈകയ്ക്ക് പ്രായക്കൂടുതലാണെന്നതായിരുന്നു പ്രധാന വിമര്‍ശനം. ഉപദേശകരെയോ വിമര്‍ശനങ്ങളെയോ കൂസാതെ തങ്ങളുടെ തീരുമാനവുമായി മുന്നോട്ട് പോവുകയായിരുന്നു ഇരുവരും. പ്രായവ്യത്യാസമൊന്നും തങ്ങള്‍ക്ക് വിഷയമേയല്ലെന്ന് ഇരുവരും തെളിയിക്കുകയായിരുന്നു.
2016ലായിരുന്നു മലൈകയും അര്‍ജുനും തമ്മിലുള്ള പ്രണയം തുടങ്ങുന്നത്. 12 വയസ്സിന്റെ പ്രായവ്യത്യാസമുണ്ട് ഇരുവരും തമ്മില്‍. ഒരു പുരുഷന്‍ തന്നേക്കാളും പ്രായം കുറഞ്ഞയാളെ വിവാഹം ചെയ്യുമ്പോള്‍ അത് വിഷയമല്ല, തിരിച്ച് സംഭവിക്കുമ്പോഴാണ് പ്രശ്‌നമാവുന്നത്. രണ്ട് ഹൃദയങ്ങളാണ് ഇവിടെ ഒന്നിക്കുന്നത്. അതിനിടയില്‍ മറ്റ് വിഷയങ്ങളൊന്നും ഒരു തടസമല്ല. ജീവിതത്തിലെ ഏറ്റവും മനോഹരമായ കാര്യമാണ് തന്റെ പ്രണയമെന്നുമായിരുന്നു മുന്‍പ് മലൈക പ്രതികരിച്ചത്.