മുത്തശ്ശിയുടെ വിയോഗത്തില്‍ സങ്കടം സഹിക്കാനാവാതെ സിതാര! മകളെ ആശ്വസിപ്പിക്കാന്‍ പാടുപെട്ട് മഹേഷ് ബാബു! കണ്ണ് നനയിക്കുന്ന വീഡിയോ

തെലുങ്ക് സിനിമയിലെ സൂപ്പര്‍താരമായ മഹേഷ് ബാബുവിന്റെ അമ്മയുടെ വിയോഗത്തില്‍ ആദരാഞ്ജലി അറിയിച്ച് സിനിമാലോകത്തുള്ളവരെല്ലാം എത്തിയിരുന്നു. പുലര്‍ച്ചെ നാല് മണിയോടെയായാണ് ഇന്ദിരാദേവി അന്തരിച്ചത്. ഹൈദരാബാദിലെ സ്വകാര്യ ആശുപത്രിയില്‍ ചികിത്സയില്‍ കഴിഞ്ഞ് വരികയായിരുന്നു അവര്‍. തെലുങ്ക് സൂപ്പര്‍താരമായിരുന്ന കൃഷ്ണയെയാണ് ഇന്ദിരാദേവി വിവാഹം ചെയ്തത്. ഇവരുടെ മകനാണ് മഹേഷ് ബാബു. ഇന്ദിരാദേവിയുമായി വേര്‍പിരിഞ്ഞതിന് പിന്നാലെയായാണ് കൃഷ്ണ വിജയനിര്‍മ്മലയുമായി ഒന്നിച്ചത്.
കൃഷ്ണയുമായി വേര്‍പിരിഞ്ഞതിന് ശേഷം തനിച്ചായിരുന്നു ഇന്ദിരാദേവി. അടുത്തിടെയായിരുന്നു മഹേഷിന്റെ സഹോദരനായ രമേഷ് ബാബു അന്തരിച്ചത്. മുത്തശ്ശിയുടെ വിയോഗം അറിഞ്ഞതോടെ മഹേഷിന്റെ മകളായ സിതാരയും സങ്കടത്തിലായിരുന്നു. മകളെ ആശ്വസിപ്പിക്കാനായി ശ്രമിക്കുന്ന മഹേഷിന്റെയും ഭാര്യയുടേയും വീഡിയോ സോഷ്യല്‍മീഡിയയിലൂടെ വൈറലായിരുന്നു. അമ്മയുടെ ചുമലില്‍ വീണ് സങ്കടത്തോടെ കരയുകയായിരുന്നു സിതാര. പിന്നീടാണ് മഹേഷും മകളെ മടിയിലിരുത്തി ആശ്വസിപ്പിക്കാന്‍ ശ്രമിച്ചത്.
കണ്ണുകള്‍ തുടക്കുമ്പോഴും വാവിട്ട് കരയുകയായിരുന്നു സിതാര. മകളുടെ ചുമലില്‍ തട്ടി ആശ്വസിപ്പിക്കുന്ന മഹേഷിനെയും വീഡിയോയില്‍ കാണാം. ഹാര്‍ട്ട് ടച്ചിംഗ് വീഡിയോ എന്നായിരുന്നു കമന്റുകള്‍. ഇന്ദിരാദേവിക്ക് നിത്യശാന്തി ലഭിക്കട്ടെയെന്ന കമന്റുകളും വീഡിയോയ്ക്ക് താഴെയുണ്ട്.
ഇന്ദിര അമ്മയുടെ വിയോഗത്തില്‍ ദു:ഖിക്കുന്നു, അവരുടെ ആത്മാവിന് ശാന്തി നേരുന്നുവെന്നായിരുന്നു സംവിധായകനായ ബോബി എഴുതിയത്. ഇന്ദിരാദേവിയുടെ വിയോഗത്തെക്കുറിച്ചുള്ള വാര്‍ത്ത അറിഞ്ഞപ്പോള്‍ സങ്കടം തോന്നി. കൃഷ്ണയ്ക്കും മഹേഷ് ബാബുവിനും കുടുംബാംഗങ്ങള്‍ക്കും അഗാധമായ അനുശോചനം രേഖപ്പെടുത്തുന്നുവെന്നായിരുന്നു ചിരഞ്ജീവി ട്വീറ്റ് ചെയ്തത്.