അമല പോള്‍ നിരസിച്ചത്
പൊന്നിയിന്‍ സെല്‍വനിലേക്ക് മണിരത്‌നം വിളിച്ചിരുന്നുവെന്ന് അമല പോള്‍ വ്യക്തമാക്കിയിരുന്നു. ആ സമയത്ത് മാനസികമായി അത്ര നല്ല അവസ്ഥയിലായിരുന്നില്ല. അങ്ങനെയാണ് ചിത്രം ഉപേക്ഷിക്കേണ്ടി വന്നത്. അതില്‍ തനിക്ക് സങ്കടമൊന്നുമില്ലെന്നായിരുന്നു ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തില്‍ അമല പറഞ്ഞത്. മണിരത്നത്തിന്റെ സിനിമയില്‍ അഭിനയിക്കുകയെന്നത് സ്വപ്‌നതുല്യമായ കാര്യമാണ്. അതിനായി അവസരം വന്ന സമയത്ത് അത് സ്വീകരിക്കാനായില്ല.
സിജു വിത്സണ്‍
പത്തൊന്‍പതാം നൂറ്റാണ്ടില്‍ അഭിനയിച്ച് വരുന്നതിനിടയിലായിരുന്നു സിജു വിത്സണിന് പൊന്നിയിന്‍ സെല്‍വനിലേക്ക് ക്ഷണം ലഭിച്ചത്. ഷെഡ്യൂള്‍ ബ്രേക്കായിരുന്ന സമയമായിരുന്നു. കഥാപാത്രത്തിന്റെ ലുക്ക് മാറ്റാനാവാത്തതില്‍ ചിത്രം നിരസിക്കുകയായിരുന്നു. മണിരത്‌നത്തിനൊപ്പം പ്രവര്‍ത്തിക്കണമെന്നാഗ്രഹിച്ചിരുന്നു. ഭാവിയില്‍ അതിന് അവസരം ലഭിക്കുമെന്നാണ് കരുതുന്നത്. പൊന്നിയിന്‍ സെല്‍വന്‍ മിസ്സായതില്‍ സങ്കടമില്ലെന്നും ആ സമയത്ത് പത്തൊന്‍പതാം നൂറ്റാണ്ടിനെക്കുറിച്ച് മാത്രമായിരുന്നു താന്‍ ആലോചിച്ചിരുന്നതെന്നും സിജു വിത്സണ്‍ വ്യക്തമാക്കിയിരുന്നു.
കീര്‍ത്തിയും അനുഷ്‌കയും
പൊന്നിയിന്‍ സെല്‍വനിലേക്ക് കീര്‍ത്തി സുരേഷിനും അവസരം ലഭിച്ചിരുന്നു. അഭിനയപ്രാധാന്യമുള്ള വേഷത്തിലേക്കായിരുന്നു താരപുത്രിയെ വിളിച്ചത്. മറ്റൊരു സിനിമയുമായി ബന്ധപ്പെട്ട തിരക്കുകളിലായതോടെയാണ് കീര്‍ത്തി നോ പറഞ്ഞത്. കുന്ദവിയുടെ വേഷത്തിലേക്ക് ആദ്യം തീരുമാനിച്ചിരുന്നത് അനുഷ്ക ഷെട്ടിയെ ആയിരുന്നുവെന്നും അവര്‍ നിരസിച്ചതോടെയാണ് ചിത്രത്തിലേക്ക് തൃഷ എത്തിയതെന്നുള്ള വിവരങ്ങളും പ്രചരിച്ചിരുന്നു.
വേറെയും താരങ്ങള്‍
തെലുങ്കിലെ സൂപ്പര്‍താരങ്ങളിലൊരാളായ മഹേഷ് ബാബുവിനെ ടൈറ്റില്‍ റോളിലേക്ക് ക്ഷണിച്ചിരുന്നു. സിനിമയുടെ ചിത്രീകരണം വൈകിയതോടെയായിരുന്നു അദ്ദേഹം പിന്‍മാറിയതെന്നുള്ള റിപ്പോര്‍ട്ടുകളും പുറത്തുവന്നിരുന്നു. ചിത്രീകരണം വൈകിയതോടെയാണ് വിജയും ചിത്രവുമായി സഹകരിക്കാതിരുന്നത്. സത്യരാജിനേയും ചിത്രത്തിലേക്ക് ക്ഷണിച്ചിരുന്നുവെങ്കിലും തിരക്ക് കാരണം അദ്ദേഹവും പിന്‍മാറുകയായിരുന്നു.