ഷെയ്‍ൻ ഓ‍ർത്തിരിക്കില്ല അത് അച്ഛൻെറ അവസാന സമ്മാനമായിരിക്കുമെന്ന്...

കൊച്ചി: ഒരു നിയോഗം പോലെ അവസാനമായി അബി പങ്കെടുത്ത ചടങ്ങിൽ മകൻ ഷെയ്ൻ നിഗവും ഒപ്പമുണ്ടായിരുന്നു. ദോഹയിൽ നടന്ന പരിപാടിയിൽ മകന് പുരസ്കാരം സമ്മാനിച്ചത് അബിയായിരുന്നു.
അച്ഛൻെറ കയ്യിൽ നിന്ന് അവസാനമായി ഷെയ്ൻ നിഗത്തിന് ലഭിച്ചത് ആ പുരസ്കാരമായിരിക്കും.

ഷെയ്‍ൻ ഒരിക്കലും ഓ‍ർത്തിരിക്കില്ല അത് അച്ഛൻ തനിക്ക് നൽകുന്ന അവസാന സമ്മാനമായിരിക്കുമെന്ന്.
സിനിമാരംഗത്ത് മകൻ താരമായി തുടങ്ങിയപ്പോഴാണ് കലാഭവൻ അബി വിട പറഞ്ഞത്. ഖത്തറിലെ ദോഹയിൽ വച്ചുനടന്ന യുവ അവാർഡ്സിൽ വച്ചാണ് അബിയുടെ കയ്യിൽ നിന്ന് ഷെയ്ൻ പുരസ്കാരം ഏറ്റു വാങ്ങിയിരുന്നത്.

പരിപാടി കഴിഞ്ഞ് ദിവസങ്ങൾക്ക് ശേഷമാണ് ദുരന്തമായി അബിയുടെ മരണവാ‍ർത്ത എത്തുന്നത്.
വളർന്നുവരുന്ന താരങ്ങളുടെ കൂട്ടത്തിൽ മുൻപന്തിയിലാണ് അബിയുടെ മകൻ ഷെയ്ൻ നിഗത്തിന്‍റെ സ്ഥാനം.