താനും ജിമ്മിക്കി കമ്മലിന്‍റെ ആരാധകനെന്ന് അഭിഷേക് ബച്ചൻ

ജിമ്മിക്കി കമ്മൽ തരംഗം തീരുന്നില്ലെന്ന് വേണം പറയാൻ. ഓണത്തിനിറങ്ങിയ ഈ പാട്ടിന് ചുവട് വയ്ക്കാത്തവരായി ആരും തന്നെയുണ്ടാകില്ല. പല പതിപ്പുകളിലുള്ള വീഡിയോകളാണ് പുറത്ത് വന്നത്. എല്ലാം ഒന്നിനൊന്ന് ഹിറ്റായിരുന്നു. ഇപ്പോഴിതാ ബോളിവുഡ് താരം അഭിഷേക് ബച്ചനും ജിമ്മിക്കി കമ്മലിനെ ഏറ്റെടുത്തിരിക്കുകയാണ്. താനും ജിമ്മിക്കി കമ്മലിന്‍റെ ആരാധകനാണെന്നാണ് അഭിഷേക് പറയുന്നത്. താരം ട്വിറ്ററിലാണ് ഇക്കാര്യം കുറിച്ചത്.

Current obsession: Jimikki kammal. Can’t stop listening to it!! Awesomeness. #jimikki #newfav #gottagetupandancehttps://t.co/IZoo2qiLci — Abhishek Bachchan (@juniorbachchan) December 1, 2017
''ജിമ്മിക്കി കമ്മൽ എത്രകേട്ടിട്ടും മതിവരുന്നില്ല, പാട്ടിനോട് അത്ര അഭിനിവേശമെന്നാണ്'' താരം ട്വിറ്ററിൽ കുറിച്ചത്. പാട്ടിന്‍റെ ലിങ്കും താരം ഇതോടൊപ്പം പങ്കുവച്ചിട്ടുണ്ട്. അഭിഷേകിന്‍റെ ട്വീറ്റ് സംഗീത സംവിധായകൻ ഷാൻ റഹ്മാനും പങ്കുവച്ചു. ഇതിന് സംവിധായകനും ചിത്രത്തിലെ അഭിനേതാവുമായ ജൂഡ് ആന്‍റണി നൽകി ഒരു കിടിലൻ കമന്‍റ്. 'എന്‍റെ തല കണ്ടാൽ പിന്നെല്ലാം ഹിറ്റാ' എന്നായിരുന്നു ജൂഡിന്‍റെ പ്രതികരണം.



ലാൽ ജോസ് സംവിധാനം ചെയ്ത വെളിപാടിന്‍റെ പുസ്തകത്തിലെ ഈ പാട്ടിന് അത്രമാത്രം സ്വീകാര്യതയാണ് ലഭിച്ചത്. മൂന്ന് കോടിയിലധികം കാഴ്ചക്കാരാണ് കുറഞ്ഞകാലം കൊണ്ട് ജിമ്മിക്കി കമ്മൽ കണ്ടിരിക്കുന്നത്. അനിൽ പനച്ചൂരാന്‍റെ വരികൾക്ക് ഈണം പകർന്നിരിക്കുന്നത് ഷാൻ റഹ്മാനാണ്. വിനീത് ശ്രീനിവാസനും രഞ്ജിത്ത് ഉണ്ണിയും ചേർന്നാണ് ഗാനമാലപിച്ചിരിക്കുന്നത്.