32 വര്‍ഷങ്ങള്‍ പൂ‍ർത്തിയായി; വൈറലായി ലാലിന്‍റെ വിവാഹ ചിത്രം

നടനായും സംവിധായകനായും നിര്‍മ്മാതാവായുമൊക്കെ സിനിമാ പ്രേക്ഷകരുടെ മനം കവർന്നയാളാണ് ലാല്‍. സാമൂഹ്യമാധ്യമങ്ങളിലുള്‍പ്പെടെ സജീവമായ താരത്തിന്‍റെ പുതിയ ചിത്രം പ്രഭാസ് നായകനാകുന്ന ബ്രഹ്മാണ്ഡ ചിത്രം 'സാഹോ'യാണ്. ആഗസ്റ്റ് 30നാണ് ചിത്രത്തിന്‍റെ റിലീസ്. താരത്തിന്‍റെ വിവാഹ വാര്‍ഷിക ദിനമായ ഇന്ന് അദ്ദേഹം തന്‍റെ 32 വര്‍ഷം പഴക്കമുള്ള വിവാഹ ചിത്രം ആരാധകര്‍ക്കായി ഔദ്യോഗിക ഫേസ്ബുക്ക് പേജില്‍ പങ്കു വച്ചിരിക്കുകയാണ്.

Also Read: മകളുടെ വിവാഹ നിശ്ചയത്തിന് ഡാൻസ് കളിച്ച് ലാൽ

നിരവധി ലൈക്കുകളും ഷെയറുകളുമാണ് ചിത്രത്തിന് ലഭിക്കുന്നത്. പള്ളിയിൽ വെച്ച് മിന്നുകെട്ട് കഴിഞ്ഞ് ഭാര്യ നാന്‍സിയുമായി ഇറങ്ങിവരുന്ന ചിത്രമാണ് താരം പങ്കുവെച്ചിരിക്കുന്നത്. ചിത്രം ഇതിനോടകം സമൂഹമാധ്യമങ്ങളിലുള്‍പ്പെടെ ഏറെ വൈറലായി കഴിഞ്ഞിരിക്കുകയാണ്.

ഇപ്പോഴും താങ്കള്‍ ഫ്രീക്കനാണല്ലോ ,വിവാഹ വാര്‍ഷികാശംസകള്‍ നേരുന്നു തുടങ്ങി നിരവധി കമന്‍റുകളാണ് ഫോട്ടോയ്ക്ക് ലഭിച്ചുകൊണ്ടിരിക്കുന്നത്. ജീൻപോള്‍ ലാൽ, മോണിക്ക ലാൽ എന്നിവരാണ് ഇവരുടെ മക്കള്‍.

Also Read: ഇത് ഫുൾ ഫ്രീക്ക്; ഹണി ബീ 2വിന്‍റെ മേക്കിങ് വീഡിയോ

1986-ൽ പപ്പൻ പ്രിയപ്പെട്ട പപ്പൻ എന്ന സിനിമയുടെ കഥ എഴുതിക്കൊണ്ടാണ് ലാൽ സിനിമയിലേക്ക് എത്തിയത്. 89-ൽ റാംജിറാവു സ്പീക്കിങ്ങിലൂടെ സിദ്ദിഖിനൊപ്പം സംവിധാനത്തിലേക്ക് കടന്നു. 1994-ൽ മാനത്തെ കൊട്ടാരത്തിലൂടെയാണ് ലാൽ സിനിമയിൽ അഭിനയിച്ചുതുടങ്ങിയത്. 2012-ൽ ഒഴിമുറി എന്ന സിനിമയിലെ പ്രകടനത്തിലൂടെ ദേശീയ ചലച്ചിത്ര അവാര്‍ഡിൽ പ്രത്യേക പരാമര്‍ശം നേടുകയുണ്ടായി. തലപ്പാഴ്, അയാള്‍, സഖറിയായുടെ ഗര്‍ഭിണികള്‍ തുടങ്ങിയ ചിത്രങ്ങളിലൂടെ മികച്ച നടനുള്ള സംസ്ഥാനപുരസ്കാരവും അദ്ദേഹം നേടുകയുണ്ടായി.