ഉപേക്ഷിക്കപ്പെട്ട നിലയിലൊരു കുഞ്ഞ്
25 വര്‍ഷംമുമ്പ് മലപ്പുറം കോട്ടയ്ക്കല്‍ പൂക്കിപ്പറമ്പിൽ കടത്തിണ്ണയില്‍ ഉറുമ്പരിച്ച് ഉപേക്ഷിക്കപ്പെട്ട നിലയിലായിരുന്നു കുഞ്ഞിനെ കണ്ടെത്തിയിരുന്നത്. കോഴിച്ചന്ന കണ്ടംതിറയിലെ നാടോടിയായ തങ്കമ്മ എന്ന എണ്‍പതുകാരി അന്ന് ആ കുഞ്ഞിനെ മകളായി ഏറ്റെടുത്തിരുന്നു. അന്ന് നടൻ വികെ ശ്രീരാമൻ വഴി സുരേഷ് ഗോപി ഈ കുട്ടിയുടെ കാര്യങ്ങൾ അന്വേഷിച്ചറിഞ്ഞിരുന്നു.
ഭിക്ഷാടന മാഫിയയുടെ ഉപദ്രവം
തങ്കമ്മ ആക്രിപെറുക്കിയും നാട്ടുകാരുടെ സഹായംകൊണ്ടുമൊക്കെയാണ് ശ്രീദേവിയെ അന്ന് വളർത്തിയത്. കോഴിച്ചന്ന എ.എം.എല്‍.പി. സ്‌കൂളില്‍ ശ്രീദേവിയെ തങ്കമ്മ ചേർക്കുകയുമുണ്ടായി. അതിനിടയിൽ ഭിക്ഷാടന മാഫിയ അവളെ ഉപദ്രവിച്ചുതുടങ്ങിയതോടെ അന്ന് മമ്മൂട്ടി ഫാന്‍സ് അസോസിയേഷന്‍ ഇടപെട്ട് ശ്രീദേവിയെ ആലുവയില്‍ ജോസ് മാവേലി നടത്തുന്ന ജനസേവാ ശിശുഭവനിൽ എത്തിക്കുകയായിരുന്നു. അവിടെ വെച്ചാണ് സുരേഷ് ഗോപി ശ്രീദേവിയെ വീണ്ടും കണ്ടത്.
അപ്രതീക്ഷിത കൂടിക്കാഴ്ച
ഇന്ന് ശ്രീദേവി, കാവശ്ശേരിയിൽ ഫാൻസി സ്റ്റോ‍ർ നടത്തുന്ന സതീഷിന്‍റെ ഭാര്യയും നാലരവയസ്സുകാരി ശിവാനിയുടെ അമ്മയുമാണ്. അന്നത്തെ ആ കുട്ടി കാവശ്ശേരിയിലുണ്ടെന്ന് കേട്ടറിഞ്ഞാണ് പലഹാരവുമായി സുരേഷ് ഗോപി ശ്രീദേവിയെ കാണാനെത്തിയത്. ഇപ്പോൾ വിവാഹശേഷമാണ് ശ്രീദേവിയെ തേടി സുരേഷ് ഗോപി വീണ്ടും വീട്ടിലെത്തിയത്. ‘അന്നുകണ്ട ഈ മുഖം ഇപ്പോഴും ഓര്‍മയുണ്ട് മകളേ’ എന്നാണ് സുരേഷ് ഗോപി ശ്രീദേവിയോട് പറഞ്ഞത്.
വീടു നൽകുമെന്ന ഉറപ്പ്
തനിക്ക് സ്വന്തം വീടില്ലെന്നും കടബാധ്യതയുണ്ടെന്നുമുള്‍പ്പെടെയുള്ള ചില ജീവിത പ്രശ്നങ്ങള്‍ ശ്രീദേവി സുരേഷ് ഗോപിയോട് പറയുകുയുണ്ടായി. അപ്രതീക്ഷിത കൂടിക്കാഴ്ചയിൽ കരഞ്ഞുകലങ്ങിയ കണ്ണുകളുമായി അവള്‍ സുരേഷ് ഗോപിയുടെ നെഞ്ചോട് ചേർന്ന് നിന്ന് തേങ്ങി. ശ്രീദേവി പറഞ്ഞതെല്ലാം കേട്ടുനിന്ന സുരേഷ് ഗോപി പ്രശ്ന പരിഹാരത്തിന് ശ്രമം നടത്തുമെന്ന ഉറപ്പും നൽകിയാണ് മടങ്ങിയത്.